ನೆಪೋಟಿಸಂ ಅಂದ್ರೆ ಅಪ್ಪು, ದರ್ಶನ್, ಶಿವಣ್ಣ ಇರ್ತಾ ಇರ್ಲಿಲ್ಲ; ಮಗಳ ಬಗ್ಗೆ ಮಾತನಾಡಿದವರಿಗೆ ಪ್ರೇಮ್ ಟಾಂಗ್!

ನಟಿಯಾಗುವ ಅವಕಾಶ ಸಿಕ್ಕಿದ್ದು ಗಂಧದ ಗುಡಿ ಚಿತ್ರದಿಂದ

ಪುನೀತ್ ರಾಜ್‌ಕುಮಾರ್ ಅಭಿನಯದ ಗಂಧದ ಗುಡಿ ಚಿತ್ರದ ಸೆಲೆಬ್ರಿಟಿ ಪ್ರೀಮಿಯರ್ ಪ್ರದರ್ಶನವನ್ನು ವೀಕ್ಷಿಸಲು ಅಮೃತಾ ಪ್ರೇಮ್ ತಮ್ಮ ತಂದೆಯೊಡನೆ ತೆರಳಿದ್ದರು. ಈ ಸಮಯದಲ್ಲಿ ಅಮೃತಾ ಪ್ರೇಮ್ ಅವರನ್ನು ಕಂಡಿದ್ದ ನಿರ್ದೇಶಕ ಉಮೇಶ್ ಕೆ ಕೃಪ ಈಕೆ ತನ್ನ ಟಗರು ಪಲ್ಯ ಚಿತ್ರಕ್ಕೆ ಸೂಕ್ತವಾದ ನಟಿ ಎಂದು ನಿಶ್ಚಯಿಸಿದ್ದರಂತೆ. ಈ ಮೂಲಕ ನಿರ್ಮಾಪಕ ಡಾಲಿ ಧನಂಜಯ್ ನಟಿಯನ್ನು ಆರಿಸಿ ಎಂದಾಗ ನಿರ್ದೇಶಕ ಉಮೇಶ್ ಕೆ ಕೃಪ ಪ್ರೇಮ್ ಮಗಳ ಬಗ್ಗೆ ಚರ್ಚಿಸಿ ಆಯ್ಕೆ ಮಾಡಿದ್ದರು.

ನೆಪೋಟಿಸಂ ಎಂದವರಿಗೆ ಪ್ರೇಮ್ ಟಾಂಗ್

ಇನ್ನು ಅಮೃತಾ ಪ್ರೇಮ್ ಅವರನ್ನು ನಾಯಕಿಯನ್ನಾಗಿ ಆಯ್ಕೆ ಮಾಡಿದ್ದನ್ನು ನೆಪೋಟಿಸಂ ಎಂದವರ ವಿರುದ್ಧ ನೆನಪಿರಲಿ ಪ್ರೇಮ್ ದನಿ ಎತ್ತಿದ್ದಾರೆ. ನೆಪೋಟಿಸಂ ಎನ್ನುತ್ತಾರಲ್ಲ, ನೆಪೋಟಿಸಂ ಅಂತ ವಿರೋಧಿಸಿದ್ರೆ ಪುನೀತ್ ರಾಜ್‌ಕುಮಾರ್, ಶಿವ ರಾಜ್‌ಕುಮಾರ್ ಹಾಗೂ ದರ್ಶನ್ ರೀತಿಯ ಕಲಾವಿದರೇ ಸಿಗ್ತಾ ಇರಲಿಲ್ಲ, ಯಾವುದೇ ಕಲಾವಿದನಾಗಲಿ ಸ್ವಂತ ಪ್ರತಿಭೆ ಇದ್ರೆ ಮಾತ್ರ ಬೆಳಿತಾರೆ ಎಂದು ಪ್ರೇಮ್ ತಿಳಿಸಿದರು. ಅಷ್ಟೇ ಅಲ್ಲದೇ ಚಿತ್ರರಂಗಕ್ಕೆ ಬಂದು ಇಪ್ಪತ್ತು ವರ್ಷಗಳಾಗಿದ್ದರೂ ಸಹ ತಾನೇನೂ ಶ್ರೀಮಂತನಲ್ಲ, ಇಂದಿಗೂ ತನ್ನ ಮಕ್ಕಳು ಬಿಎಂಟಿಸಿ ಬಸ್‌ನಲ್ಲೇ ಓಡಾಡುತ್ತಾರೆ ಎಂದೂ ಸಹ ಪ್ರೇಮ್ ತಿಳಿಸಿದರು.

ಸ್ಟಾರ್ ನಟರ ಮಕ್ಕಳಿಗೆ ಸಾಮಾನ್ಯರಿಗಿಂತ ಜವಾಬ್ದಾರಿ ಹೆಚ್ಚು

ಇನ್ನೂ ಮುಂದುವರಿದು ಮಾತನಾಡಿದ ಪ್ರೇಮ್ ಸ್ಟಾರ್ ನಟರ ಮಕ್ಕಳಿಗೆ ಸಾಮಾನ್ಯರಿಗಿಂತ ಹೆಚ್ಚು ಜವಾಬ್ದಾರಿ ಇರುತ್ತೆ, ಸ್ಟಾರ್ ಮಕ್ಕಳು ಎಂಬ ಕಾರಣಕ್ಕೆ ರೆಡ್ ಕಾರ್ಪೆಟ್ ಸ್ವಾಗತ ಸಿಗಬಹುದು, ಆದ್ರೆ ಹೆಚ್ಚಿನ ಜವಾಬ್ದಾರಿ ಅವರ ಹೆಗಲ ಮೇಲೆ ಇರುತ್ತೆ. ಇತರರಿಗೆ ಹೊಸಬರು ಏನೋ ಮಾಡಿದ್ದಾರೆ ಬಿಡು ಎನ್ನುತ್ತಾರೆ, ಆದರೆ ಸ್ಟಾರ್ ನಟರ ಮಕ್ಕಳು ಮೊದಲ ಪ್ರಯತ್ನದಲ್ಲೇ ತಮ್ಮನ್ನು ತಾವು ಸಾಬೀತುಪಡಿಸಿಕೊಳ್ಳಲೇಬೇಕು ಎಂದು ತಿಳಿಸಿದರು.