ಕನ್ನಡ ಚಿತ್ರರಂಗವೆಂದರೆ, ಕನ್ನಡವೆಂದರೆ ನನಗೆ ಇವರೇ ಫಸ್ಟ್ ಎಂದ ತೆಲುಗಿನ ಜಾನಿ ಮಾಸ್ಟರ್!

ಕನ್ನಡದ ಇಬ್ಬರು ಸ್ಟಾರ್‌ಗಳ ಬಗ್ಗೆ ಜಾನಿ ಮಾಸ್ಟರ್ ಮಾತು

ಕಾರ್ಯಕ್ರಮದಲ್ಲಿ ಚಿತ್ರದ ಮೇಕಿಂಗ್ ಹಾಗೂ ಹಾಡುಗಳ ಬಗ್ಗೆ ಮಾತನಾಡಿ ರಿಚ್ ಆಗಿ ಮೂಡಿಬರುವಂತೆ ಶ್ರಮವಹಿಸಿದ ಚಿತ್ರತಂಡವನ್ನು ಹೊಗಳಿದ ಜಾನಿ ಮಾಸ್ಟರ್ ಕನ್ನಡದ ಸ್ಟಾರ್ ನಟರಾದ ಪುನೀತ್ ರಾಜ್‌ಕುಮಾರ್ ಹಾಗೂ ಕಿಚ್ಚ ಸುದೀಪ್ ಕುರಿತು ಮಾತನಾಡಿದರು. ಮೊದಲಿಗೆ ಪುನೀತ್ ರಾಜ್‌ಕುಮಾರ್ ಅವರ ಕುರಿತು ಮಾತನಾಡಿದ ಜಾನಿ ಮಾಸ್ಟರ್ ಕನ್ನಡ ಚಿತ್ರರಂಗವೆಂದರೆ, ಕನ್ನಡ ಚಿತ್ರವೆಂದರೆ ನನಗೆ ಮೊದಲ ನೆನಪಾಗುವುದೇ ಪುನೀತ್ ಸರ್ ಎಂದ ಜಾನಿ ಮಾಸ್ಟರ್ ನೀವು ಎಲ್ಲೇ ಇದ್ದರೂ ನಾನು ನಿಮ್ಮನ್ನು ಪ್ರೀತಿಸುತ್ತೇನೆ ಎಂದು ಅಪ್ಪು ಅವರನ್ನು ಹೊಗಳಿದರು. ಬಳಿಕ ಕಿಚ್ಚ ಸುದೀಪ್ ಕುರಿತು ಮಾತನಾಡಿದ ಜಾನಿ ಮಾಸ್ಟರ್ ನನ್ನಣ್ಣ ಕಿಚ್ಚ ಸುದೀಪ್ ಸಹ ಚಿತ್ರದಲ್ಲಿ ನಟಿಸಿದ್ದಾರೆ, ಅವರು 100% ಅಬ್ಬರಿಸಿರುತ್ತಾರೆ ಎಂಬುದು ತಿಳಿದಿದೆ, ಇಡೀ ಚಿತ್ರತಂಡಕ್ಕೆ ಒಳ್ಳೆಯದಾಗಲಿ ಎಂದು ಶುಭ ಕೋರಿದರು.

ಇಬ್ಬರ ಜತೆಗೂ ಕೆಲಸ ಮಾಡಿದ್ದ ಜಾನಿ

ಇನ್ನು ಜಾನಿ ಮಾಸ್ಟರ್‌ಗೆ ಪುನೀತ್ ರಾಜ್‌ಕುಮಾರ್ ಹಾಗೂ ಕಿಚ್ಚ ಸುದೀಪ್ ಇಬ್ಬರ ಜತೆಗೂ ಸಮಯ ಕಳೆದ ಅನುಭವವಿದೆ. ತೆಲುಗಿನಲ್ಲಿ ಯಶಸ್ವಿ ನೃತ್ಯ ಸಂಯೋಜಕರಾಗಿದ್ದ ಜಾನಿ ಮಾಸ್ಟರ್‌ ಪುನೀತ್ ರಾಜ್‌ಕುಮಾರ್ ನಟನೆಯ ರಾಜ್‌ಕುಮಾರ ಚಿತ್ರದ ಮೂಲಕ ಕನ್ನಡ ಚಲನಚಿತ್ರರಂಗಕ್ಕೆ ಕಾಲಿಟ್ಟರು, ಬಳಿಕ ಅಪ್ಪು ನಟನೆಯ ನಟಸಾರ್ವಭೌಮ ಹಾಗೂ ಯುವರತ್ನ ಚಿತ್ರಗಳಲ್ಲೂ ಸಹ ಜಾನಿ ಮಾಸ್ಟರ್ ಪುನೀತ್ ರಾಜ್‌ಕುಮಾರ್‌ಗೆ ಸ್ಟೆಪ್ಸ್ ಪಾಠ ಮಾಡಿದ್ರು. ಇತ್ತ ಕಿಚ್ಚ ಸುದೀಪ್ ನಟನೆಯ ವಿಕ್ರಾಂತ್ ರೋಣ ಚಿತ್ರದ ಚಾರ್ಟ್‌ಬಸ್ಟರ್ ರಾರಾ ರಕ್ಕಮ್ಮ ಹಾಡಿಗೆ ಸಹ ಇದೇ ಜಾನಿ ಮಾಸ್ಟರ್ ನೃತ್ಯ ಸಂಯೋಜಿಸಿದ್ದರು.

ಕಬ್ಜ ಪುನೀತ್ ರಾಜ್‌ಕುಮಾರ್‌ಗೆ ಅರ್ಪಣೆ

ಪುನೀತ್ ರಾಜ್‌ಕುಮಾರ್ ನಿಧನ ಹೊಂದಿದ ಬಳಿಕ ಬಿಡುಗಡೆಗೊಂಡ ಬಹುತೇಕ ಎಲ್ಲಾ ಚಿತ್ರಗಳು ಸಹ ಅವರಿಗೆ ಶ್ರದ್ಧಾಂಜಲಿ ಸಲ್ಲಿಸುವ ಮೂಲಕ ಆರಂಭಗೊಂಡಿವೆ. ಹಲವು ನಿರ್ದೇಶಕರು ತಮ್ಮ ಚಿತ್ರಗಳನ್ನು ಪುನೀತ್ ರಾಜ್‌ಕುಮಾರ್ ಅವರಿಗೆ ಅರ್ಪಿಸಿದ್ದಾರೆ. ಅದರಲ್ಲೂ ಕನ್ನಡ ಚಲಚಿತ್ರರಂಗದ ಕೀರ್ತಿ ಪತಾಕೆಯನ್ನು ಹಾರಿಸಿದ ಚಿತ್ರಗಳಾದ ಕೆಜಿಎಫ್ ಹಾಗೂ ಕಾಂತಾರ ಚಿತ್ರಗಳನ್ನೂ ಸಹ ಅವುಗಳ ನಿರ್ದೇಶಕರು ಪುನೀತ್‌ ರಾಜ್‌ಕುಮಾರ್ ಅವರಿಗೆ ಅರ್ಪಿಸಿದ್ದರು. ಈ ಸಾಲಿಗೆ ಇದೀಗ ನಿರ್ದೇಶಕ ಆರ್ ಚಂದ್ರು ಸಹ ಸೇರಿಕೊಂಡಿದ್ದು, ತಮ್ಮ ಕಬ್ಜ ಚಿತ್ರವನ್ನು ಪುನೀತ್ ರಾಜ್‌ಕುಮಾರ್ ಅವರಿಗೆ ಅರ್ಪಿಸುವುದಾಗಿ ಹೇಳಿಕೆ ನೀಡಿದ್ದಾರೆ.