ಕನ್ನಡ ಚಿತ್ರರಂಗದ ಮೊಟ್ಟ ಮೊದಲ ರೀಮೇಕ್ ಚಿತ್ರ ಯಾವುದು?

'ಬೆಟ್ಟದ ಕಳ್ಳ' ಮೊಟ್ಟ ಮೊದಲ ರೀಮೇಕ್ ಸಿನಿಮಾ

1957ರಲ್ಲಿ ಬಿಡುಗಡೆಯಾಗಿದ್ದ 'ಬೆಟ್ಟದ ಕಳ್ಳ' ಸಿನಿಮಾ, ಕನ್ನಡ ಚಿತ್ರರಂಗದಲ್ಲಿ ಮೂಡಿ ಬಂದ ಮೊಟ್ಟ ಮೊದಲ ರೀಮೇಕ್ ಚಿತ್ರ. ಕಲ್ಯಾಣ್ ಕುಮಾರ್ ನಾಯಕನಾಗಿದ್ದ ಈ ಚಿತ್ರದಲ್ಲಿ ಮೈನಾವತಿ, ಆರ್.ನಾಗೇಂದ್ರ ರಾವ್, ಉದಯ್ ಕುಮಾರ್, ಜಿ.ವಿ ಅಯ್ಯರ್ ಸೇರಿದಂತೆ ಹಲವರು ನಟಿಸಿದ್ದರು.

ಎಂ.ಜಿ.ಆರ್ ಚಿತ್ರದ ರೀಮೇಕ್

1954ರಲ್ಲಿ ತಮಿಳು ಭಾಷೆಯಲ್ಲಿ ತೆರೆಕಂಡಿದ್ದ 'ಮಲೈಕಳ್ಳನ್' ಸಿನಿಮಾ ಬಂದಿತ್ತು. ತಮಿಳು ಸೂಪರ್ ಸ್ಟಾರ್ ಎಂ.ಜಿ.ಆರ್ ಈ ಚಿತ್ರದಲ್ಲಿ ನಾಯಕನಾಗಿ ನಟಿಸಿದ್ದರು. ಈ ಚಿತ್ರವನ್ನೇ 1957ರಲ್ಲಿ ಕನ್ನಡಕ್ಕೆ ತರಲಾಯಿತು. ಎಂ.ಜಿ.ಆರ್ ಮಾಡಿದ್ದ ಪಾತ್ರದಲ್ಲಿ ಕಲ್ಯಾಣ್ ಕುಮಾರ್ ನಟಿಸಿದ್ದರು. ಜುಲೈ 22 ರಂದೇ ಈ ಸಿನಿಮಾ ಬಿಡುಗಡೆಯಾಗಿತ್ತು.

ಎರಡೂ ಚಿತ್ರಕ್ಕೆ ಒಬ್ಬರೇ ನಿರ್ದೇಶಕರು

ಅಂದ್ಹಾಗೆ, ತಮಿಳಿನಲ್ಲಿ ಮಲೈಕಳ್ಳನ್ ಸಿನಿಮಾ ನಿರ್ದೇಶನ ಮಾಡಿದ್ದ ಎಸ್.ಎಂ ಶ್ರೀರಾಮಲು ನಾಯ್ಡು ಅವರೇ ಕನ್ನಡದಲ್ಲಿ 'ಬೆಟ್ಟದ ಕಳ್ಳ' ಚಿತ್ರಕ್ಕೆ ಆಕ್ಷನ್ ಕಟ್ ಹೇಳಿದ್ದರು. ದಾಖಲೆಗಳ ಪ್ರಕಾರ, ಈ ಚಿತ್ರವೇ ಕನ್ನಡಕ್ಕೆ ಬಂದ ಮೊಟ್ಟ ಮೊದಲ ರೀಮೇಕ್ ಚಿತ್ರ ಆಗಿದೆ.

ನಮ್ಮ ಚಿತ್ರಗಳು ಬೇರೆ ಕಡೆ ಹೋಗಿದ್ದವು

1957ರಲ್ಲಿ ಕನ್ನಡಕ್ಕೆ ಮೊದಲ ರೀಮೇಕ್ ಸಿನಿಮಾ ಬಂದಿದೆ ಎಂದು ಇತಿಹಾಸ ಹೇಳುತ್ತಿದೆ. ವಿಶೇಷ ಏನಪ್ಪಾ ಅಂದ್ರೆ, ಅಷ್ಟರಲ್ಲಾಗಲೇ ಕನ್ನಡ ಸಿನಿಮಾಗಳು ಬೇರೆ ಭಾಷೆಗೆ ರೀಮೇಕ್ ಆಗಿತ್ತು. ಉದಾಹರಣೆಗೆ ಡಾ ರಾಜ್ ಕುಮಾರ್ ಅಭಿನಯದ ಬೇಡರ ಕಣ್ಣಪ್ಪ ಸಿನಿಮಾ 1954ರಲ್ಲಿ ಬಿಡುಗಡೆಯಾಯಿತು. ಈ ಚಿತ್ರ ತಮಿಳಿನಲ್ಲಿ ಡಬ್ ಆಯ್ತು. ತೆಲುಗಿನಲ್ಲಿ ಮತ್ತು ಹಿಂದಿಯಲ್ಲಿ ರೀಮೇಕ್ ಆಯ್ತು. ಇದೊಂದೆ ಸಿನಿಮಾ ಅಲ್ಲ, ಇನ್ನು ಹಲವು ಸಿನಿಮಾಗಳು ರೀಮೇಕ್ ಆಗಿರಬಹುದು.