'ನಮ್ಮ ಪ್ರೀತಿಯ ರಾಮು' ಬಳಿಕ ದರ್ಶನ್ ಏಕೆ ಪ್ರಯೋಗಾತ್ಮಕ ಚಿತ್ರಗಳನ್ನು ಮಾಡಲೇ ಇಲ್ಲ?

'ಕುರುಕ್ಷೇತ್ರ' ಪ್ರೆಸ್ ಮೀಟ್ ನಲ್ಲಿ ಪ್ರಶ್ನೆ

ಇತ್ತೀಚಿಗಷ್ಟೆ 'ಕುರುಕ್ಷೇತ್ರ' ಚಿತ್ರದ ಸುದ್ದಿಗೋಷಿಯಲ್ಲಿ ದರ್ಶನ್ 'ನಮ್ಮ ಪ್ರೀತಿಯ ರಾಮು' ಸಿನಿಮಾದ ಬಗ್ಗೆ ಮಾತನಾಡಿದ್ದಾರೆ. 'ನಮ್ಮ ಪ್ರೀತಿಯ ರಾಮು' ಸಿನಿಮಾದ ಸೋಲಿಗೆ ನಿಜವಾದ ಕಾರಣ ಏನು ?, ಆ ಚಿತ್ರದ ನಂತರ ಅಂತಹ ಪ್ರಯೋಗಾತ್ಮಕ ಸಿನಿಮಾಗಳನ್ನು ಏಕೆ ಮಾಡಲಿಲ್ಲ ಎಂಬ ಪ್ರಶ್ನೆಗೆ ದರ್ಶನ್ ಉತ್ತರ ನೀಡಿದ್ದಾರೆ.

ನಿರ್ಮಾಪಕರಿಂದ ಸಮಸ್ಯೆ ಆಗಿತ್ತು

'ನಮ್ಮ ಪ್ರೀತಿಯ ರಾಮು' ಸಿನಿಮಾ ಸೋಲಿಗೆ ಕಾರಣ ಜನರು ಎಂದು ಅನೇಕರು ತಿಳಿದಿದ್ದಾರೆ. ಮಾಸ್ ಮಹಾರಾಜ ದರ್ಶನ್ ರನ್ನು ಜನ ಈ ರೀತಿಯ ಪಾತ್ರಗಳಲ್ಲಿ ನೋಡಲು ಇಷ್ಟ ಪಡುವುದಿಲ್ಲ ಎನ್ನುವುದು ಇನ್ನು ಕೆಲವರ ಅಭಿಪ್ರಾಯ. ಆದರೆ, ದರ್ಶನ್ ಹೇಳುವ ಪ್ರಕಾರ 'ನಮ್ಮ ಪ್ರೀತಿಯ ರಾಮು' ಸಿನಿಮಾಗೆ ಜನರಿಂದ ಒಳ್ಳೆಯ ಪ್ರತಿಕ್ರಿಯೆ ಸಿಕ್ಕಿತಂತೆ. ಆದರೆ, ನಿರ್ಮಾಪಕರ ಸಮಸ್ಯೆಯಿಂದ ಈ ಸಿನಿಮಾ ಜನರಿಗೆ ತಲುಪಲಿಲ್ಲ. ಬಿ ಪಿ ರಾಮೇ ಗೌಡ ಮತ್ತು ಜಿ ನಂದಕುಮಾರ್ ಈ ಸಿನಿಮಾವನ್ನು ನಿರ್ಮಾಣ ಮಾಡಿದ್ದರು.

ಆ ರೀತಿಯ ಕಥೆಗಳು ಬರಲಿಲ್ಲ

'ನಮ್ಮ ಪ್ರೀತಿಯ ರಾಮು' ಸಿನಿಮಾದ ಸೋಲಿನ ನಂತರ ದರ್ಶನ್ ಗೆ ಆ ರೀತಿಯ ಕಥೆಗಳು ಬರಲಿಲ್ಲವಂತೆ. ಹಾಗಾಗಿ ತಮಗೆ ಬರುತ್ತಿದ್ದ ಮಾಸ್ ಸಿನಿಮಾಗಳನ್ನೆ ದರ್ಶನ್ ಹೆಚ್ಚು ಮಾಡಿದ್ದಾರೆ. ಹೀಗಿದ್ದರೂ, ''ಮುಂದೆ ಬೇರೆ ಬೇರೆ ರೀತಿಯ ಪ್ರಯೋಗಾತ್ಮಕ ಪಾತ್ರಗಳು ಬಂದರೆ ಖಂಡಿತ ಮಾಡುತ್ತೇನೆ. ಒಳ್ಳೆಯ ಸಿನಿಮಾಗಳನ್ನು ಮಾಡುವ ಆಸೆ ಖಂಡಿತ ಇದೆ.'' ಎಂದರು ದರ್ಶನ್.

ರಂಗಭೂಮಿ ಅನುಭವ ಇರುವ ದರ್ಶನ್

ದರ್ಶನ್ ಒಂದು ಕಡೆ ಮಾಸ್ ಸಿನಿಮಾಗಳಿಗೆ ಅಂಟಿಕೊಂಡಿದ್ದಾರೆ ನಿಜ. ಆದರೆ, ಆಗಾಗ ಅವರ ಪಾತ್ರದ ಶೈಲಿ ಬದಲಾಗುತ್ತದೆ. 'ನಮ್ಮ ಪ್ರೀತಿಯ ರಾಮು', 'ಅನಾಥರು', 'ಕ್ರಾಂತಿವೀರ ಸಂಗೊಳ್ಳಿ ರಾಯಣ್ಣ' ಹಾಗೂ 'ಕುರುಕ್ಷೇತ್ರ' ಚಿತ್ರಗಳ ಅವರ ಪಾತ್ರಗಳು ದರ್ಶನ್ ನಟನ ಸಾಮರ್ಥ್ಯವನ್ನು ತೋರುತ್ತದೆ. ಅಲ್ಲದೆ, ರಂಗಭೂಮಿ ಅನುಭವ ಹೊಂದಿರುವ ದರ್ಶನ್ ಬೇರೆ ಬೇರೆ ರೀತಿಯ ಪಾತ್ರವನ್ನು ನಿರ್ವಹಿಸುವ ಶಕ್ತಿ ಹೊಂದಿದ್ದಾರೆ.