ಫಾರ್ಮುಲಾ ಕಾರು ರೇಸರ್ ಜೊತೆ ನಟ ಯಶ್: ಯಾರು ಈ ಹ್ಯಾಮಿಲ್ಟನ್?

ಜಗದ್ವಿಖ್ಯಾತ ರೇಸರ್ ಅನ್ನು ಭೇಟಿಯಾದ ಯಶ್

ಫಾರ್ಮುಲಾ ಕಾರ್‌ ರೇಸಿಂಗ್‌ನ ದಂತಕತೆ ಎಂದೇ ಕರೆಯಲಾಗುವ ಲೀವಿಸ್ ಹ್ಯಾಮಿಲ್ಟನ್ ಜೊತೆ ನಟ ಯಶ್ ಕಾಣಿಸಿಕೊಂಡಿದ್ದಾರೆ. ಹ್ಯಾಮಿಲ್ಟನ್ ಅನ್ನು ಯಶ್ ಅಮೆರಿಕದ ಲಾಸ್ ಏಂಜಲ್ಸ್‌ನಲ್ಲಿ ಭೇಟಿಯಾಗಿದ್ದಾರೆ. ಆಪ್ತವಾಗಿ ಲೀವಿಸ್ ಹ್ಯಾಮಿಲ್ಟನ್ ಜೊತೆ ಯಶ್ ಫೋಟೊಕ್ಕೆ ಫೋಸು ನೀಡಿದ್ದು, ಚಿತ್ರದಲ್ಲಿ ಇನ್ನೂ ಇಬ್ಬರು ಯಶ್ ಹಾಗೂ ಲೀವಿಸ್ ಜೊತೆ ಇದ್ದಾರೆ.

ಲೀವಿಸ್ ಹ್ಯಾಮಿಲ್ಟನ್ ಯಾರು?

ಲೀವಿಸ್ ಹ್ಯಾಮಿಲ್ಟನ್ ಬ್ರಿಟನ್‌ನ ಫಾರ್ಮುಲಾ ಕಾರ್ ರೇಸರ್ ಆಗಿದ್ದು, ಮರ್ಸಿಡೀಸ್ ಪರವಾಗಿ ಫಾರ್ಮುಲಾ ರೇಸ್ ಮಾಡುತ್ತಾರೆ. ಜಗತ್ತಿನ ಅತ್ಯುತ್ತಮ ಫಾರ್ಮುಲಾ ರೇಸರ್‌ಗಳಲ್ಲಿ ಲೀವಿಸ್ ಹ್ಯಾಮಿಲ್ಟನ್ ಸಹ ಒಬ್ಬರು. ಹಲವು ಗೆಲುವುಗಳ ದಾಖಲೆಗಳು ಲೀವಿಸ್ ಹ್ಯಾಮಿಲ್ಟನ್ ಹೆಸರಿಗಿವೆ. ಈ ಫಾರ್ಮುಲಾ ರೇಸರ್‌ ಅನ್ನು ಯಶ್ ಭೇಟಿ ಆಗಿರುವುದು ಏಕೆ ಎಂಬುದು ಕುತೂಹಲಕ್ಕೆ ಕಾರಣವಾಗಿದೆ. ತಮ್ಮ ಮುಂದಿನ ಸಿನಿಮಾಕ್ಕೆ ತರಬೇತಿಯನ್ನೇನಾದರೂ ಪಡೆಯುತ್ತಿದ್ದಾರಾ ಯಶ್ ಎಂದು ಅಭಿಮಾನಿಗಳು ಅನುಮಾನ ವ್ಯಕ್ತಪಡಿಸಿದ್ದಾರೆ.

ಹಾಲಿವುಡ್ ನಿರ್ದೇಶಕನನ್ನು ಭೇಟಿಯಾಗಿದ್ದರು

ಕೆಲವು ದಿನಗಳ ಹಿಂದೆ ನಟ ಯಶ್, ಖ್ಯಾತ ಹಾಲಿವುಡ್ ಸ್ಟಂಟ್‌ಮ್ಯಾನ್ ಜೆಜೆ ಪೆರ್ರಿಯನ್ನು ಭೇಟಿ ಮಾಡಿದ್ದರು. ಜೆಜೆ ಪೆರ್ರಿ ಹಾಲಿವುಡ್‌ನ ಜನಪ್ರಿಯ ಸ್ಟಂಟ್ ಮ್ಯಾನ್ ಹಾಗೂ ಆಕ್ಷನ್ ನಿರ್ದೇಶಕ, ಇತ್ತೀಚೆಗೆ ಸಿನಿಮಾ ನಿರ್ದೇಶಕನಾಗಿಯೂ ಬಡ್ತಿ ಪಡೆದಿದ್ದಾರೆ. ಸೂಪರ್ ಹಿಟ್ ಹಾಲಿವುಡ್ ಸಿನಿಮಾಗಳಾದ 'ಐರನ್ ಮ್ಯಾನ್', 'ಅವತಾರ್', ಆಸ್ಕರ್ ವಿಜೇತ 'ಡಿಜಾಂಗೊ ಅನ್‌ಚೈನ್ಡ್', 'ಅರ್ಗೊ' ಸಿನಿಮಾಗಳಿಗೆ ಸ್ಟಂಟ್ ನಿರ್ದೇಶಕರಾಗಿ ಕೆಲಸ ಮಾಡಿದ್ದಾರೆ. ಜೊತೆಗೆ ಇದೇ ವರ್ಷ ನೆಟ್‌ಫ್ಲಿಕ್ಸ್‌ನಲ್ಲಿ ಬಿಡುಗಡೆ ಆಗಿರುವ 'ಡೇ ಶಿಫ್ಟ್' ಸಿನಿಮಾ ನಿರ್ದೇಶನ ಸಹ ಮಾಡಿದ್ದಾರೆ.

ಯಶ್ ಮುಂದಿನ ಸಿನಿಮಾ ಯಾವುದು?

ಯಶ್ ಮುಂದಿನ ಸಿನಿಮಾ ಬಗ್ಗೆ ದೊಡ್ಡ ಮಟ್ಟದ ಕುತೂಹಲ ಇದೆ. ನರ್ತನ್ ಜೊತೆ ಯಶ್ ಸಿನಿಮಾ ಮಾಡಲಿದ್ದಾರೆ ಎನ್ನಲಾಗಿತ್ತು. ಆದರೆ ನರ್ತನ್ ಹಾಗೂ ಯಶ್ ಕತೆಯ ವಿಷಯದಲ್ಲಿ ಪರಸ್ಪರ ಸಹಾನುಮತಕ್ಕೆ ಬಾರದೇ ಹೋದ ಕಾರಣದಿಂದ ಸಿನಿಮಾ ಮುಂದುವರೆಯಲಿಲ್ಲ. ಇನ್ನು ಶಂಕರ್ ನಿರ್ದೇಶನದ ಸಿನಿಮಾದಲ್ಲಿ ಯಶ್ ನಟಿಸುತ್ತಾರೆ ಎನ್ನಲಾಯಿತು. ಆದರೆ ಅದೂ ಸಹ ಅಧಿಕೃತಗೊಂಡಿಲ್ಲ. ಈ ನಡುವೆ ಯಶ್ ಹಾಲಿವುಡ್‌ ಮೇಲೇನಾದರೂ ಕಣ್ಣಿಟ್ಟಿದ್ದಾರಾ ಎಂಬ ಅನುಮಾನ ಇತ್ತೀಚಿಗಿನ ಅವರ ನಡೆಯಿಂದ ವ್ಯಕ್ತವಾಗುತ್ತಿದೆ.