ಅಂಬರೀಶ್ ನೀಡಿದ ಉಡುಗೊರೆ ಬಗ್ಗೆ ಯಶ್ ಭಾವುಕ ನುಡಿ

ನಂಬೋಕೆ ಆಗ್ಲಿಲ್ಲ

ಅಂಬರೀಶ್ ಅವರ ನೀಡಿರುವ ತೊಟ್ಟಿಲಿನ ಬಗ್ಗೆ ಮಾತನಾಡಿದ ಯಶ್ ''ಇದಂತೂ ನಂಬೋಕೆ ಆಗ್ಲಿಲ್ಲ. ನಿಜಕ್ಕೂ ಈ ವಿಷ್ಯ ನನಗೆ ಗೊತ್ತಾದಾಗ ಒಂದು ಕ್ಷಣ ಭಾವುಕನಾದೆ'' ಎಂದು ಯಶ್ ಸುದ್ದಿಗೋಷ್ಠಿಯಲ್ಲಿ ತಿಳಿಸಿದರು.

ಮಂಡ್ಯದಲ್ಲಿ ಒಬ್ಬರು ಹೇಳಿದ್ರು

ಈ ವಿಷ್ಯವನ್ನ ಸುಮಲತಾ ಅವರು ಹೇಳುವುದಕ್ಕೂ ಮುಂಚೆ ಮಂಡ್ಯದಲ್ಲಿ ಒಬ್ಬ ವ್ಯಕ್ತಿ ಹೇಳಿದ್ರಂತೆ. ಆ ಕ್ಷಣವೇ ಭಾವುಕರಾದ ಯಶ್, ಮೂರನೇ ವ್ಯಕ್ತಿ ಹೇಳಿದ್ದರಿಂದ ಗಂಭೀರವಾಗಿ ಪರಿಗಣಿಸಲಿಲ್ಲವಂತೆ. ನಂತರ ಸುಮಲತಾ ಈ ವಿಷ್ಯ ತಿಳಿಸಿದರಂತೆ.

ಸ್ವರ್ಗದಿಂದ ಗಿಫ್ಟ್ ಬಂದಿದೆ

ನಂತರ ಈ ವಿಷ್ಯವನ್ನ ಸುಮಲತಾ ಅವರು ಫೋನ್ ಮಾಡಿದ ಹೇಳಿದ್ರು. 'ನಿನ್ನ ಮಗಳು ಏನು ಅದೃಷ್ಟ ಮಾಡಿರಬೇಕು, ಸ್ವರ್ಗದಿಂದ ತೊಟ್ಟಿಲು ಬಂದಿದೆ ನೋಡು' ಅಂದ್ರು. ನನಗೆ ನಂಬೋಕೆ ಆಗ್ಲಿಲ್ಲ. ಆಮೇಲೆ ಬುಕ್ ಮಾಡಿದ್ದನ್ನ ಹೇಳಿದ್ರು. ''ಬಹುಶಃ ಇದೇ ಅವರ ಕೊನೆ ಗಿಫ್ಟ್. ನಿನ್ನ ಮಗಳಿಗೆ ಸಿಕ್ಕಿದೆ'' ಎಂದರು. ನಿಜಕ್ಕೂ ಖುಷಿ ಆಯ್ತು ಎಂದು ಯಶ್ ಹೇಳಿಕೊಂಡರು.

ನಮ್ಮ ಜೊತೆ ಇರಬೇಕಿತ್ತು

ನನ್ನ ಮತ್ತು ರಾಧಿಕಾ ಮೇಲೆ ಅವರಿಗೆ ವಿಶೇಷವಾದ ಪ್ರೀತಿ ಇತ್ತು. ನಮಗೂ ಅವರ ಮೇಲೆ ಅಷ್ಟೇ ಅಭಿಮಾನ, ಪ್ರೀತಿ ಇತ್ತು. ತಂದೆ ಸ್ಥಾನದಲ್ಲಿದ್ದರು. ಅವರು ಈಗ ಇದ್ದಿದ್ರೆ ಚೆನ್ನಾಗಿರ್ತಿತ್ತು. ನನ್ನ ಮಗಳನ್ನ ನೋಡಬಹುದಿತ್ತು. ಅವರು ಎಲ್ಲೇ ಇದ್ರೂ ಅವರ ಆಶೀರ್ವಾದ ನಮ್ಮ ಮೇಲೆ ಇರುತ್ತೆ. ಅದಕ್ಕೆ ಈ ತೊಟ್ಟಿಲು ಸಾಕ್ಷಿ'' ಎಂದು ಯಶ್ ಸಂತಸ ಹಂಚಿಕೊಂಡರು.