'ಕೆಜಿಎಫ್ 2' ಬಳಿಕ ಮುಂದಿನ ಸಿನಿಮಾ ಯಾವುದು? ಯಶ್ ಕೊಟ್ಟರು ಉತ್ತರ

ಪ್ರೇಕ್ಷಕರಿಗೆ ನಾನು ಉತ್ತರದಾಯಿ: ಯಶ್

''ನಾನು ಮೊದಲೇ ಹೇಳಿದಂತೆ ನಾನು ನನ್ನ ಪ್ರೇಕ್ಷಕರಿಗೆ ಮಾತ್ರವೇ ಉತ್ತರದಾಯಿ. ಪುಣ್ಯಕ್ಕೆ ನನ್ನ ಕುಟುಂಬದಲ್ಲಿಯೂ ಯಾರೂ ಸಹ ನನ್ನನ್ನು ಯಾಕೆ ಸಿನಿಮಾ ಮಾಡುತ್ತಿಲ್ಲ ಎಂದು ಪ್ರಶ್ನೆ ಮಾಡುವುದಿಲ್ಲ. ದುಡಿಯಲೇ ಬೇಕು, ಹಣಕ್ಕಾಗಿಯೇ ಕೆಲಸ ಮಾಡಬೇಕು ಎಂದೇನೂ ಇಲ್ಲ'' ಎಂದರು ಯಶ್.

ಜನರಿಗೆ ಮೆಚ್ಚುಗೆಯಾಗುವಂಥಹಾ ಕೆಲಸ ಮಾಡಬೇಕು: ಯಶ್

''ಜನಗಳು ಉನ್ನತವಾದ ಸ್ಥಾನ, ಪ್ರೀತಿ ಕೊಟ್ಟಿದ್ದಾರೆ. ಅವರಿಗೆ ಮೆಚ್ಚುಗೆಯಾಗುವಂತೆ ಒಳ್ಳೆಯ ಕೆಲಸ ಮಾಡಬೇಕು. ಯಾವುದೇ ಭಾಷೆಯ ಸಿನಿಮಾ ಬಂದರು, 'ಕೆಜಿಎಫ್' ಅನ್ನು ಉದಾಹರಣೆಯಾಗಿಟ್ಟುಕೊಂಡು ಹೆಮ್ಮೆಯಿಂದ ಹೇಳಿಕೊಳ್ಳುವಂಥಹಾ ಕೆಲಸ ಆಗಿದೆ. ಮುಂದೆಯೂ ಹಾಗೇ ಆಗಬೇಕು ಅದಕ್ಕೆ ಸಮಯ ಬೇಕು'' ಎಂದರು ಯಶ್. ಆ ಮೂಲಕ ಇನ್ನೂ ಕೆಲವು ಸಮಯ ತಾವು ಹೊಸ ಸಿನಿಮಾ ಘೋಷಿಸುವುದಿಲ್ಲ ಎಂಬ ಸುಳಿವನ್ನು ಯಶ್ ನೀಡಿದರು.

ನನ್ನ ಕೆಲಸ ನನಗೆ ಸವಾಲಾಗಬೇಕು: ಯಶ್

''ನಮಗೆ ನಾವೇ ಸವಾಲು. 'ಕೆಜಿಎಫ್: ಚಾಪ್ಟರ್ 1' ಹೇಗಿತ್ತು ಎಂಬುದನ್ನು ನೀವೆಲ್ಲ ನೋಡಿದ್ದೀರಿ. 'ಚಾಪ್ಟರ್ 2' ಹೇಗಿದೆ ಎಂಬುದು ನನಗೆ ಗೊತ್ತು. ಈಗ ಮುಂದಿನದ್ದು ಅದಕ್ಕಿಂತಲೂ ಚೆನ್ನಾಗಿರಬೇಕು. ನಾವು ಮಾಡಿದ ಕೆಲಸವೇ ನಮಗೆ ಸವಾಲಾಗಿ ಅದನ್ನು ಮೀರಿಸುವ ಯತ್ನ ಮಾಡುತ್ತಲೇ ಇರಬೇಕು. ಆ ರೀತಿ ಒಳ್ಳೆಯ ಕೆಲಸ ಮಾಡಲು ಸಾಕಷ್ಟು ಸಮಯ ಬೇಕು'' ಎಂದರು ಯಶ್.

'ಕಿರಾತಕ 2' ಒಪ್ಪಿಕೊಂಡಿದ್ದರು ಆದರೆ ಚಿತ್ರೀಕರಣ ಆಗಲಿಲ್ಲ

'ಕೆಜಿಎಫ್ 2' ಸಿನಿಮಾ ಏಪ್ರಿಲ್ 14 ರಂದು ಬಿಡುಗಡೆ ಆಗಲಿದೆ. 'ಕೆಜಿಎಫ್: ಚಾಪ್ಟರ್ 1' ಆದ ಬಳಿಕ ಯಶ್ 'ಕಿರಾತಕರು 2' ಸಿನಿಮಾ ಒಪ್ಪಿಕೊಂಡಿದ್ದರು. ಅದಕ್ಕೆ ಫೋಟೊ ಶೂಟ್ ಸಹ ಆಗಿತ್ತು. ಆದರೆ ಸಿನಿಮಾ ಸೆಟ್ಟೇರಲಿಲ್ಲ. ಕೊನೆಗೆ ಯಶ್ ಅವರು ಬಡ್ಡಿ ಸಮೇತ ನಿರ್ಮಾಪಕರಿಗೆ ಹಣ ವಾಪಸ್ ಮಾಡಿದರು. ಅದಾದ ಬಳಿಕ ಇನ್ನಾವ ಸಿನಿಮಾವನ್ನೂ ಯಶ್ ಒಪ್ಪಿಕೊಂಡಿಲ್ಲ. ಯಶ್, ತಮಿಳಿನ ಶಂಕರ್ ಸಿನಿಮಾದಲ್ಲಿ ನಟಿಸಲಿದ್ದಾರೆ ಎನ್ನಲಾಯ್ತು, ಆದರೆ ಆ ಸುದ್ದಿ ಸುಳ್ಳಾಯಿತು. ಇದೀಗ ತೆಲುಗಿನ ನಿರ್ಮಾಪಕ ದಿಲ್ ರಾಜು ನಿರ್ಮಾಣದ ಸಿನಿಮಾದಲ್ಲಿ ನಟಿಸಲಿದ್ದಾರೆ ಎನ್ನಲಾಗುತ್ತಿದೆ. ಇದರ ನಡುವೆ ಕನ್ನಡದ ನರ್ತನ್ ನಿರ್ದೇಶನದ ಸಿನಿಮಾದಲ್ಲಿ ಯಶ್ ನಟಿಸಲಿದ್ದಾರೆ ಎನ್ನಲಾಗುತ್ತಿದೆ. ಆದರೆ ಅದರ ಬಗ್ಗೆಯೂ ಸ್ಪಷ್ಟನೆ ಇಲ್ಲ. ಆ ಬಗ್ಗೆ ಯಾವುದೇ ಅಧಿಕೃತ ಸುದ್ದಿ ಹೊರಬಿದ್ದಿಲ್ಲ. ಪ್ರಸ್ತುತ ವಿವಿಧ ಜಾಹೀರಾತುಗಳಲ್ಲಿ ಅಷ್ಟೆ ಯಶ್ ನಟಿಸುತ್ತಿದ್ದಾರೆ.