ಕೊನೆಗೂ ತೆರೆಮೇಲೆ ಬರ್ತಿದೆ ಯೋಗಿಯ 'ದುನಿಯಾ'

ಎಲ್ಲಾ ಅಂದುಕೊಂಡಂತೆ ಆಗಿದ್ದರೆ ಇಷ್ಟೊತ್ತಿಗಾಗಲೇ ಯೋಗಿ ಅಭಿನಯದ 'ದುನಿಯಾ' ಸಿನಿಮಾ ಬಿಡುಗಡೆ ಆಗಬೇಕಿತ್ತು. ಆದರೆ, ಟೈಟಲ್ ಸಮಸ್ಯೆಯಿಂದ ತಡವಾಗಿತ್ತು. ನಂತರ ಚಿತ್ರದ ಹೆಸರು ಬದಲಾಯಿಸಿಕೊಂಡು, ಈಗ ಸೆನ್ಸಾರ್ ಮುಗಿಸಿಕೊಂಡು ತೆರೆಗೆ ಬರಲು ಸಜ್ಜಾಗಿದೆ.

ಮೊದಲು ಈ ಚಿತ್ರಕ್ಕೆ ದುನಿಯಾ-2' ಎಂದು ಹೆಸರಿಡಲಾಗಿತ್ತು. ಆದರೆ, ಆ ಟೈಟಲ್ ಬೇರೆ ಸಿನಿಮಾಗೆ ಬಳಸಿದ್ದರಿಂದ ಅದು ಸಾಧ್ಯವಾಗಲಿಲ್ಲ. ಅಂದ್ಹಾಗೆ, ಸೂರಿ ನಿರ್ದೇಶನ ಮಾಡಿದ್ದ 'ದುನಿಯಾ' ಸಿನಿಮಾ ಬಿಡುಗಡೆಯಾಗಿ ಫೆಬ್ರವರಿ 23ಕ್ಕೆ 11 ವರ್ಷವಾಗುತ್ತದೆ. ಅಂದು 'ಯೋಗಿ ದುನಿಯಾ' ಬಿಡುಗಡೆ ಮಾಡುವ ಯೋಚನೆ ಇತ್ತು. ಆದರೆ, ಅಂದು ಟಗರು' ರಿಲೀಸ್ ಆಗುತ್ತಿರುವುದರಿಂದ ಮಾರ್ಚ್ 9 ರಂದು ಬಿಡುಗಡೆ ಮಾಡಲು ಚಿತ್ರತಂಡ ನಿರ್ಧರಿಸಿದೆ.

ಅಂದ್ಹಾಗೆ, ಯೋಗಿಗೆ ನಾಯಕಿಯಾಗಿ ಹಿತಾ ಚಂದ್ರಶೇಖರ್ ನಟಿಸಿದ್ದಾರೆ. ಮಿಕ್ಕಂತೆ ವಸಿಷ್ಠ ಸಿಂಹ ಒಂದು ಪ್ರಮುಖ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದಾರೆ. ಹರಿ ಈ ಚಿತ್ರಕ್ಕೆ ಕಥೆ, ಚಿತ್ರಕಥೆ ಮತ್ತು ಸಂಭಾಷಣೆಯನ್ನು ಬರೆದು ನಿರ್ದೇಶಿಸಿದ್ದಾರೆ. ಯೋಗಿ ತಂದೆ ಟಿ.ಪಿ. ಸಿದ್ಧರಾಜು ನಿರ್ಮಾಣ ಮಾಡಿದ್ದಾರೆ. ಇನ್ನುಳಿದಂತೆ ಬಿ.ಜೆ. ಭರತ್ ಅವರ ಸಂಗೀತ ಈ ಚಿತ್ರಕ್ಕಿದೆ.

ಸದ್ಯ, ಸಿನಿಮಾ ನೋಡಿರುವ ಸೆನ್ಸಾರ್ ಮಂಡಳಿ ಚಿತ್ರಕ್ಕೆ 'ಎ' ಪ್ರಮಾಣಪತ್ರ ನೀಡಿದ್ದಾರೆ. ಟ್ರಾವೆಲ್ ಏಜೆಂಟ್ ಪಾತ್ರದಲ್ಲಿ ನಾಯಕ ನಟ ಯೋಗಿ ಅಭಿನಯಿಸಿದ್ದು, ಯೋಗಿ ಅವರ ಅಣ್ಣ ಮಹೇಶ್ ಕೂಡ ಚಿತ್ರದಲ್ಲಿ ಬಣ್ಣ ಹಚ್ಚಿದ್ದು, ಮುಸ್ಲಿಂ ಹುಡುಗನ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದಾರೆ.