ಗಣೇಶ್ ಹುಟ್ಟುಹಬ್ಬ ವಿಶ್‌ ನಲ್ಲಿ ತಪ್ಪು: ಯೋಗರಾಜ್ ಭಟ್ ಕೊಟ್ಟ ಕಾರಣ

'ಹುದ್ಟಿಟಹಬ್ಬದ ಶುಶಾಭಯ' ಎಂದು ತಪ್ಪಾಗಿ ಬರೆಯಲಾಗಿದೆ

'ಹುದ್ಟಿಟಹಬ್ಬದ ಶುಶಾಭಯ' ಎಂದು ತಪ್ಪಾಗಿ ಬರೆದಿರುವುದು ಉದ್ದೇಶಪೂರ್ವಕವಾಗಿಯೇ ಎಂದು ಯೋಗರಾಜ್ ಭಟ್ ಹೇಳಿದ್ದು, ಗಾಳಿಪಟ 2 ಸಿನಿಮಾದಲ್ಲಿ ಗಣೇಶ್ ಅವರ ಪಾತ್ರ ಹಾಗೂ ಒಟ್ಟಾರೆ ಕತೆಯಲ್ಲಿ ಕನ್ನಡದ ತಪ್ಪಾದ ಬಳಕೆ ಸಹ ಭಾಗವೇ ಆಗಿದ್ದು, ಅದನ್ನು ಸೂಚಿಸುವ ಸಲುವಾಗಿ ಹೀಗೆ ತಪ್ಪಾಗಿ ಬರೆಯಲಾಗಿದೆ ಎಂದಿದ್ದಾರೆ.

'ಕನ್ನಡ ಬಳಕೆ ಬಗ್ಗೆ ಮಜವಾದ ಸಂಗತಿಗಳು ಸಿನಿಮಾದಲ್ಲಿವೆ'

ಈಗಿನ ಯುವಕರ ಕನ್ನಡ, ಕನ್ನಡದ ಬಳಕೆ, ಯುವಕರ ಐಲುಗಳು, ಅವರ ಕನವರಿಕೆಗಳು, ಯೋಚನೆಗಳು ಹೀಗೆ ಹಲವು ವಿಷಯಗಳ ಬಗ್ಗೆ ಗಾಳಿಪಟ 2 ಸಿನಿಮಾ ಮಾತನಾಡುತ್ತದೆ. ಗಾಳಿಪಟ ಸಿನಿಮಾದಲ್ಲಿ ದಯವಿಟ್ಟು ಪದವನ್ನು 'ದಯವಿಣ್ಣು' ಎಂದು ಗಣೇಶ್ ಬರೆದಿರುತ್ತಾರೆ, ಇದು ಜನರಿಗೆ ಇಷ್ಟವಾಗಿತ್ತು ಹಾಗಾಗಿ ಗಾಳಿಪಟ 2 ನಲ್ಲಿ ಕನ್ನಡದ ಬಳಕೆ ಬಗ್ಗೆ ಕೆಲವು ಮಜವಾದ ಸಂಗತಿಗಳು ಇವೆ ಎಂದಿದ್ದಾರೆ.

ಸಿರಿಗನ್ನಡಂ ಗೆಲ್ಗೆ, ಸರಿಗನ್ನಡಂ ಬಾಳ್ಗೆ

ನಾವು ಕನ್ನಡ ಪದವನ್ನು ತಪ್ಪಾಗಿ ಬಳಸಿದ್ದು ಕೆಲವರಿಗೆ ಇಷ್ಟವಾಗಿದೆ, ಕೆಲವರಿಗೆ ಇಷ್ಟವಾಗಿಲ್ಲ. ಆದರೆ ಅದರ ಹಿಂದಿನ ವ್ಯಂಗ್ಯವನ್ನು ಅರ್ಥ ಮಾಡಿಕೊಳ್ಳಬೇಕು ಎಂಬುದು ಪ್ರಾರ್ಥನೆ ಎಂದ ಭಟ್ಟರು, 'ಸಿರಿಗನ್ನಡಂ ಗೆಲ್ಗೆ, ಸರಿಗನ್ನಡಂ ಬಾಳ್ಗೆ' ಎಂಬ ಹೊಸ ಘೋಷವಾಕ್ಯವನ್ನೇ ನೀಡಿದ್ದಾರೆ ಯೋಗರಾಜ್ ಭಟ್.

ಅರ್ಧ ಚಿತ್ರೀಕರಣ ಮುಗಿದಿದೆ

ಸಿನಿಮಾ ಬಗ್ಗೆ ಮಾತನಾಡಿದ ಯೋಗರಾಜ್ ಭಟ್, ಸಿನಿಮಾದಲ್ಲಿ ಗಣೇಶ್‌ ಅವರ ಪಾತ್ರ ಅದ್ಭುತವಾಗಿದೆ ಸಿನಿಮಾದಲ್ಲಿ ಗಣೇಶ್ ಪಾತ್ರ ಎಷ್ಟು ಲಫಂಗ ಎಂಬುದನ್ನು ತಿಳಿದುಕೊಳ್ಳಲು ನೀವು ಸಿನಿಮಾ ನೋಡಲೇ ಬೇಕು ಎಂದಿರುವ ಯೋಗರಾಜ್ ಭಟ್, ಸಿನಿಮಾದ ಚಿತ್ರೀಕರಣ ಅರ್ಧ ಮುಗಿದಿದೆ, ಲಾಕ್‌ಡೌನ್ ಮುಗಿದ ನಂತರ ಚಿತ್ರೀಕರಣ ಮುಂದುವರೆಸುತ್ತೇವೆ ಎಂದರು.