ದುಡ್ಡು ಕೊಟ್ರೆ ಕೋಟಿ ಕೋಟಿ ಯುಟ್ಯೂಬ್ ವ್ಯೂಸ್ ಸಿಗುತ್ತೆ, ಟ್ರೆಂಡ್ ಮಾಡೋಕಾಗಲ್ಲ ಎಂದ ದರ್ಶನ್!

ಓಪನ್ ಆಗಿ ಹೇಳ್ತೀನಿ ಎಂದು ಯುಟ್ಯೂಬ್ ವೀಕ್ಷಣೆ ಬಗ್ಗೆ ಮಾತನಾಡಿದ ದರ್ಶನ್

ಸಂದರ್ಶನದಲ್ಲಿ ದಾಖಲೆಗಳ ಕುರಿತಾದ ಚರ್ಚೆ ಎದುರಾದಾಗ ಮಾತನಾಡಿದ ನಟ ದರ್ಶನ್ ಯುಟ್ಯೂಬ್ ಅನ್ನೇ ಉದಾಹರಣೆಯಾಗಿ ತೆಗೆದುಕೊಳ್ಳೋಣ, ಇದರ ಬಗ್ಗೆ ಕೆಲವರು ಮಾತನಾಡಲ್ಲ, ನಾನು ಓಪನ್ ಆಗಿ ಹೇಳ್ತಿನಿ ಎಂದರು. ಯುಟ್ಯೂಬ್‌ನಲ್ಲಿ ಹಾಡೊಂದು ಬಿಡುಗಡೆಯಾದಾಗ ಒಂದು ಗಂಟೆಗೆ ಒಂದು ಮಿಲಿಯನ್ ವೀಕ್ಷಣೆ ಇರುತ್ತೆ, ಮೂರು ಗಂಟೆ ನಂತರ ಮೂರು ಮಿಲಿಯನ್, ನಂತರದ ದಿನಗಳಲ್ಲಿ ಐವತ್ತು ಹಾಗೂ ನೂರು ಮಿಲಿಯನ್ ತಲುಪುತ್ತವೆ, ಹೀಗೆ ಹಾಡನ್ನು ನೋಡಿದಷ್ಟು ಜನರಲ್ಲಿ 10% ಜನರು ಚಿತ್ರಮಂದಿರಕ್ಕೆ ಬಂದು ಚಿತ್ರವನ್ನು ವೀಕ್ಷಿಸಿದರೆ ಆ ಚಿತ್ರ ಸೂಪರ್ ಹಿಟ್ ಆಗಿಬಿಡುತ್ತೆ, ಆದರೆ ಯಾಕೆ ಆಗಲ್ಲ, ಏಕೆಂದರೆ ವೀಕ್ಷಣೆಗಳನ್ನು ದುಡ್ಡು ಕೊಟ್ಟು ಖರೀದಿಸಬಹುದು ಎಂದು ಹೇಳಿದರು.

ವ್ಯೂಸ್ ಖರೀದಿಸಬಹುದು, ಟ್ರೆಂಡಿಂಗ್ ಮಾಡೊಕಾಗಲ್ಲ

ಇನ್ನೂ ಮುಂದುವರೆದು ಮಾತನಾಡಿದ ದರ್ಶನ್ ಹಾಡುಗಳಿಗೆ ದುಡ್ಡು ಹಾಕಿ ವೀಕ್ಷಣೆಗಳನ್ನು ಕೊಂಡುಕೊಳ್ಳಬಹುದು, ಆದರೆ ಟ್ರೆಂಡಿಂಗ್ ಮಾಡೊಕಾಗಲ್ಲ ಎಂದರು. ಇದಕ್ಕೆ ತಮ್ಮದೇ ಕ್ರಾಂತಿ ಚಿತ್ರದ ಮೂರು ಹಾಡುಗಳನ್ನು ಉದಾಹರಣೆಯನ್ನಾಗಿ ನೀಡಿದ ದರ್ಶನ್ ನಮ್ಮ ಚಿತ್ರದ ಮೂರು ಹಾಡುಗಳು ಟ್ರೆಂಡ್ ಆಗ್ತಿವೆ, ಏಕೆಂದರೆ ನಿಜವಾದ ವೀಕ್ಷಕರು ಹಾಡುಗಳನ್ನು ವೀಕ್ಷಿಸುತ್ತಿದ್ದಾರೆ ಅದಕ್ಕೆ ಟ್ರೆಂಡ್ ಆಗ್ತಿದೆ, ದುಡ್ಡು ಕೊಟ್ಟು ವ್ಯೂಸ್ ಪಡೆದರೆ ಟ್ರೆಂಡ್ ಆಗಲ್ಲ ಎಂದು ತಿಳಿಸಿದರು.

ಕ್ರಾಂತಿ ನಾಲ್ಕನೇ ಹಾಡು ಯಾವಾಗ?

ಇನ್ನು ಕ್ರಾಂತಿ ಚಿತ್ರದ ಮೊದಲ ಮೂರು ಹಾಡುಗಳು ಈಗಾಗಲೇ ಬಿಡುಗಡೆಗೊಂಡಿದ್ದು, ಚಿತ್ರದ ನಾಲ್ಕನೇ ಹಾಡು 'ಡೋಂಟ್ ಮೆಸ್ ವಿಥ್ ಹಿಮ್' ಇದೇ ತಿಂಗಳ 14ರಂದು ಸಂಜೆ 7 ಗಂಟೆಗೆ ತುಮಕೂರಿನ ಬಿಎಚ್ ರಸ್ತೆಯಲ್ಲಿರುವ ಡಾ. ಶಿವಕುಮಾರ ಸ್ವಾಮೀಜಿ ವೃತ್ರದಲ್ಲಿ ಬಿಡುಗಡೆಗೊಳ್ಳಲಿದೆ. ಕ್ರಾಂತಿ ಚಿತ್ರದಲ್ಲಿ ಒಟ್ಟಾರೆ ಐದು ಹಾಡುಗಳಿದ್ದು, ಅಂತಿಮ ಹಾಡನ್ನು ಯಾವ ಊರಿನಲ್ಲಿ ಬಿಡುಗಡೆ ಮಾಡಲಿದ್ದರೋ ಕಾದು ನೋಡಬೇಕಿದೆ.