'ಕಾಫಿ ವಿತ್ ಕರಣ್'ಗೆ ಬರುತ್ತಿದ್ದಾರೆ ಅಮೀರ್ ಖಾನ್: ಶಾರುಖ್, ಸಲ್ಮಾನ್ ಬರ್ತಾರಾ?

ಟೀಸರ್‌ನಲ್ಲಿ ಅಮೀರ್ ಖಾನ್ ಎಪಿಸೋಡ್‌ನ ದೃಶ್ಯವಿಲ್ಲ

ಈಗ ಬಿಡುಗಡೆ ಆಗಿರುವ ಟೀಸರ್‌ನಲ್ಲಿ ಅಮೀರ್ ಖಾನ್‌ರ ಎಪಿಸೋಡ್‌ನ ಯಾವುದೇ ದೃಶ್ಯವಿಲ್ಲ. ಆದರೆ ಮೂಲಗಳ ಪ್ರಕಾರ ಅಮೀರ್ ಖಾನ್ 'ಕಾಫಿ ವಿತ್ ಕರಣ್' ಶೋನಲ್ಲಿ ಭಾಗವಹಿಸುತ್ತಾರೆ ಎನ್ನಲಾಗಿದೆ. ಅಮೀರ್ ಖಾನ್ ಸಾಮಾನ್ಯವಾಗಿ ಯಾವುದೇ ರಿಯಾಲಿಟಿ ಶೋ, ಅವಾರ್ಡ್ ಫಂಕ್ಷನ್, ಟಾಕ್ ಶೋಗಳಲ್ಲಿ ಭಾಗವಹಿಸುವುದಿಲ್ಲ. ಹಾಗಾಗಿ ಕಾಫಿ ವಿತ್ ಕರಣ್‌ ಶೋ ಅಂಥಹಾ ಗಾಸಿಪ್ ಟಾಕ್ ಶೋಗೆ ಅಮೀರ್ ಬರುತ್ತಿರುವುದು ಸಹಜವಾಗಿಯೇ ಕುತೂಹಲ ಕೆರಳಿಸಿದೆ.

ಮೂರು ಬಾರಿ ಕಾಫಿ ವಿತ್ ಕರಣ್‌ಗೆ ಬಂದಿದ್ದರು ಅಮೀರ್

ಅಮೀರ್ ಖಾನ್ ಮೂರು ಬಾರಿ ಕಾಫಿ ವಿತ್ ಕರಣ್‌ ಶೋಗೆ ಬಂದಿದ್ದರು. ಆಗ 'ಕಾಫಿ ವಿತ್ ಕರಣ್' ಶೋ ಬಹಳ ಓವರ್‌ ರೇಟೆಡ್ ಎಂದಿದ್ದರು. ಹಾಗೂ ಕರಣ್ ಜೋಹರ್ ನಿರ್ದೇಶನದ 'ಕಭಿ ಖುಷಿ ಕಭಿ ಗಮ್' ಸಿನಿಮಾ ತಮಗೆ ಇಷ್ಟವಾಗಿರಲಿಲ್ಲ ಎಂದು ಸಹ ಹೇಳಿದ್ದರು. ಹಾಗಾಗಿ ಅಮೀರ್ ಖಾನ್ ಮತ್ತೊಮ್ಮೆ ಕಾಫಿ ವಿತ್ ಕರಣ್‌ ಶೋಗೆ ಬರಲಾರರು ಎನ್ನಲಾಗಿತ್ತು, ಆದರೆ ಆಶ್ಚರ್ಯಕರವಾಗಿ ಅಮೀರ್ ಈ ಬಾರಿ ಶೋಗೆ ಬರುತ್ತಿದ್ದಾರೆ.

ಸಿನಿಮಾ ಪ್ರಚಾರಕ್ಕಾಗಿ ಬರುತ್ತಿದ್ದಾರೆ ಅಮೀರ್

ಆದರೆ ಅಮೀರ್ ಖಾನ್ ಈ ಬಾರಿ ಕಾಫಿ ವಿತ್ ಕರಣ್ ಶೋಗೆ ಬರುತ್ತಿರುವುದಕ್ಕೆ ಕಾರಣವೂ ಇದೆ. ಅವರು ತಮ್ಮ ಲಾಭಕ್ಕಾಗಿ ಅಷ್ಟೆ ಈ ಶೋಗೆ ಬರಲಿದ್ದಾರೆ. ಅಮೀರ್ ಖಾನ್ ನಟನೆಯ 'ಲಾಲ್ ಸಿಂಗ್ ಛಡ್ಡಾ' ಸಿನಿಮಾ ಆಗಸ್ಟ್ 11 ರಂದು ಬಿಡುಗಡೆ ಆಗಲಿದೆ. ಅಮೀರ್ ಖಾನ್ ಸೇರಿದಂತೆ ಚಿತ್ರತಂಡ ಈಗಾಗಲೇ ಪ್ರಚಾರ ಪ್ರಾರಂಭಿಸಿದೆ. ಪ್ರಚಾರದ ಭಾಗವಾಗಿ ಅಷ್ಟೆ ಅಮೀರ್ ಖಾನ್ ಈ ಶೋಗೆ ಬರಲಿದ್ದಾರೆ ಎನ್ನಲಾಗುತ್ತಿದೆ.

ಸಲ್ಮಾನ್, ಶಾರುಖ್ ಬರುತ್ತಾರೆಯೇ?

ಅಮೀರ್ ಖಾನ್ ಬರುತ್ತಿರುವ ವಿಷಯ ಗೊತ್ತಾಗುತ್ತಿದ್ದಂರೆ ಸಲ್ಮಾನ್ ಖಾನ್, ಶಾರುಖ್ ಖಾನ್ ಸಹ ಬರುತ್ತಾರಾ? ಎಂಬ ಪ್ರಶ್ನೆ ಎದ್ದಿದೆ. ಆದರೆ ಮೂಲಗಳ ಪ್ರಕಾರ ಶಾರುಖ್ ಖಾನ್ ಈ ಬಾರಿ ಕಾಫಿ ವಿತ್ ಕರಣ್ ಶೋನಲ್ಲಿ ಭಾಗವಹಿಸುತ್ತಿಲ್ಲ. ಕರಣ್‌ ಜೋಹರ್‌ಗೆ ಶಾರುಖ್ ಖಾನ್ ಆತ್ಮೀಯರು, ಆದರೆ ಈ ಹಿಂದೆ ಕೆಲವು ಬಾರಿ ಶಾರುಖ್ ಈ ಶೋನಲ್ಲಿ ಭಾಗವಹಿಸಿದ್ದಾರೆ. ಅಸಲಿಗೆ ಈ ಶೋ ಪ್ರಾರಂಭವಾದಾಗ ಮೊದಲ ಅತಿಥಿಯೇ ಶಾರುಖ್ ಆಗಿದ್ದರು. ಇನ್ನು ಸಲ್ಮಾನ್ ಖಾನ್ ಸಹ ಈ ರೀತಿಯ ಗಾಸಿಪ್ ಆಧರಿತ ಶೋಗಳಿಂದ ದೂರವೇ ಉಳಿಯುತ್ತಾರೆ.