Bigg Boss OTT Kannada: ಟಾಸ್ಕ್‌ನಲ್ಲಿ ಗೆದ್ದ ನಂದು, ಸೋಮಣ್ಣಗೆ ಸೋಲು

ಟಾಸ್ಕ್ ನೀಡಿದ ಬಿಗ್‌ಬಾಸ್

ನಂದು ತಂಡದಲ್ಲಿ, ಚೈತ್ರಾ ಹಳ್ಳಿಕೆರೆ, ಜಶ್ವಂತ್, ಸಾನಿಯಾ, ಸೋನು ಗೌಡ, ಜಯಶ್ರೀ ಅವರುಗಳು ಇದ್ದರೆ, ಸೋಮಣ್ಣನ ಟೀಂನಲ್ಲಿ ರಾಕೇಶ್, ಉದಯ್, ರೂಪೇಶ್, ಸ್ಪೂರ್ತಿ ಹಾಗೂ ಅಕ್ಷತಾ ಇದ್ದರು. ಇಬ್ಬರಿಗೂ ಮೊದಲ ಟಾಸ್ಕ್ ಎದುರಾಯಿತು. ಅದೆಂದರೆ ಇಬ್ಬರು ಸದಸ್ಯರಿಗೆ ಕಣ್ಣಿಗೆ ಬಟ್ಟೆ ಕಟ್ಟಲಾಗುತ್ತದೆ. ಒಬ್ಬ ವ್ಯಕ್ತಿ ತನ್ನ ಮುಂದಿರುವ ವಸ್ತುವನ್ನು ಬಾಯಿಂದ ಮಾತ್ರ ಮುಟ್ಟಿ ಅಥವಾ ತಿಂದು ಅದನ್ನು ವರ್ಣಿಸಬೇಕು, ಆ ವರ್ಣನೆಯ ಆಧಾರದ ಮೇಲೆ ಎದುರಿಗೆ ಕುಳಿತಿರುವ ವ್ಯಕ್ತಿ ಆ ವಸ್ತು ಏನೆಂದು ಗುರುತು ಹಿಡಿಯಬೇಕು.

ಎಲ್ಲ ವಸ್ತುಗಳನ್ನೂ ಗುರುತಿಸಿದ ನಂದು ತಂಡ

ಮೊದಲಿಗೆ ಟಾಸ್ಕ್‌ನಲ್ಲಿ ಪಾರ್ಟಿಸಿಪೇಟ್ ಮಾಡಿದ ಸೋಮಣ್ಣ ತಂಡ 12 ವಸ್ತುಗಳಲ್ಲಿ 9 ವಸ್ತುಗಳನ್ನು ಸರಿಯಾಗಿ ಗೆಸ್ ಮಾಡಿದರು. ಸ್ಪೂರ್ತಿ ಗೌಡ ಹಾಗೂ ಅಕ್ಷತಾ ಅವರುಗಳು ಹೆಚ್ಚು ವಸ್ತುಗಳನ್ನು ಗೆಸ್ ಮಾಡಲು ವಿಫಲವಾದರು. ಆದರೆ ನಂದು ತಂಡದವರು ಸರಿಯಾದ ನಾಲ್ಕು ಜನರನ್ನು ಆರಿಸಿದ್ದರಾದ್ದರಿಂದ ಸರಿಯಾಗಿ, ಸಮಾಧಾನದಿಂದ ಆಟವಾಡಿ 12 ಕ್ಕೆ 12 ವಸ್ತುಗಳನ್ನು ಸರಿಯಾಗಿ ಗೆಸ್ ಮಾಡಿ ವಿಜೇತರಾದರು.

ಸ್ಪೂರ್ತಿ ಗೌಡ ಸರಿಯಾಗಿ ಆಡಲಿಲ್ಲ

ಆದರೆ ಸೋಮಣ್ಣನ ತಂಡದಲ್ಲಿ ಆಡಿದ ಸ್ಪೂರ್ತಿ ಗೌಡ, ಬಿಸಿಬೇಳೆ ಬಾತ್ ಅನ್ನು ಗೆಸ್ ಮಾಡದೇ ಇರುವುದು ಸೋಮಣ್ಣ ತಂಡಕ್ಕೆ ಅಪಮಾನವಾಗಿ ಕಾಡಿದರೆ, ಬೇರೆಯವರಿಗೆ ತಮಾಷೆಯಾಗಿತ್ತು. ಕಣ್ಣಿಗೆ ಬಟ್ಟೆಕಟ್ಟಿಕೊಂಡು ಬಿಸಿ ಬೇಳೆ ಬಾತ್ ತಿಂದ ಸ್ಪೂರ್ತಿ ಗೌಡ ಅದನ್ನು ಸರಿಯಾಗಿ ವಿವರಿಸಲು ವಿಫಲರಾದರು. ತರಕಾರಿ ಇದೆ, ಬೆಳಿಗ್ಗೆ ತಿಂಡಿಗೆ ತಿನ್ನುತ್ತೇವೆ ಖಾರ ಇದೆ ಎಂದಷ್ಟೆ ಹೇಳಿದರು. ಇಷ್ಟೇ ಮಾಹಿತಿಯಿಂದ ಅಕ್ಷತಾಗೆ ಸರಿಯಾದ ಉತ್ತರ ಗೆಸ್ ಮಾಡಲು ಸಾಧ್ಯವಾಗಲಿಲ್ಲ.

ಹಲವು ಟಾಸ್ಕ್‌ಗಳು ಎದುರಾಗಲಿವೆ

ಈ ವಾರ ಸಾಕಷ್ಟು ಟಾಸ್ಕ್‌ಗಳನ್ನು ಈ ಎರಡು ತಂಡಗಳು ಆಡಬೇಕಾಗಿದೆ. ಮುಂದಿನ ದಿನಗಳಲ್ಲಿ ಕ್ಯಾಪ್ಟೆನ್ಸಿ ಟಾಸ್ಕ್ ಸಹ ಇದೆ. ಈಗ ನಡೆದಿರುವ ಟಾಸ್ಕ್‌ನಲ್ಲಿ ಗೆದ್ದ ತಂಡ ಲಕ್ಷುರಿ ಬಜೆಟ್‌ ಪಡೆಯುವ ಸಾಧ್ಯತೆ ಇದೆ. ಕಳೆದ ವಾರ ಲಕ್ಷುರಿ ಬಜೆಟ್ ಅನ್ನು ರಾಕೇಶ್ ತಂಡ ಪಡೆದುಕೊಂಡಿತ್ತು. ನಾಲ್ಕು ಸಾವಿರ ಪಾಯಿಂಟ್ಸ್‌ನಲ್ಲಿ ಎರಡು ಸಾವಿರಕ್ಕೂ ಅವರು ಸಾಮಾನು ಖರೀದಿ ಮಾಡಲಿಲ್ಲ. ಈ ಬಾರಿ ಏನು ಮಾಡುತ್ತಾರೆ ನೋಡಬೇಕಾಗಿದೆ.