ಕನ್ನಡದ ಬಗ್ಗೆ ಡಿಸ್ನಿ ಹಾಟ್‌ಸ್ಟಾರ್ ತಾತ್ಸಾರ: ಆಕ್ರೋಶ

ಜಾಹೀರಾತು ನೀಡಿದೆ ಹಾಟ್‌ಸ್ಟಾರ್

ವಿಶ್ವದ ಬೃಹತ್ ಒಟಿಟಿಗಳಲ್ಲಿ ಒಂದಾಗಿರುವ ಡಿಸ್ನಿ ಪ್ಲಸ್ ಹಾಟ್‌ಸ್ಟಾರ್ ಒಟಿಟಿ, ಭಾರತದಲ್ಲಿ ತಮ್ಮ ಮಾರುಕಟ್ಟೆ ವಿಸ್ತರಣೆ ಪ್ರಯತ್ನದಲ್ಲಿದ್ದು, ಭಾರತದ ಸ್ಥಳೀಯ ಭಾಷೆಗಳ ಕಂಟೆಂಟ್ ಅನ್ನು ನೀಡಲು ಆರಂಭಿಸಿದೆ. ನಾವು ಪ್ರಾದೇಶಿಕ ಭಾಷೆಗೆ ಆದ್ಯತೆ ನೀಡುತ್ತಿದ್ದೇನೆ ಎಂಬುದನ್ನು ತೋರ್ಪಡಿಸಿಕೊಳ್ಳಲು ಸಾಮಾಜಿಕ ಜಾಲತಾಣದಲ್ಲಿ ಕೆಲವು ಜಾಹೀರಾತುಗಳನ್ನು ಸಹ ಡಿಸ್ನಿ ಪ್ಲಸ್ ಹಾಟ್‌ಸ್ಟಾರ್ ನೀಡಿದೆ.

ಕನ್ನಡ ಭಾಷೆಗೆ ಪರಭಾಷೆ ನಟನ ಚಿತ್ರ!

ಇಂಥಹುದೇ ಒಂದು ಜಾಹೀರಾತಿನಲ್ಲಿ. 'ಭಾಷೆ ಯಾವುದಾದರೂ ಆಗಿರಲಿ, ಕತೆಗಳು ನಿಲ್ಲುವುದಿಲ್ಲ' ಎಂಬ ಕ್ಯಾಪ್ಷನ್ ಅಡಿ. ವಿವಿಧ ಭಾಷೆಗಳ ಸಿನಿಮಾ ರಂಗದ ಸಿನಿಮಾಗಳ ಚಿತ್ರಗಳನ್ನು ಪ್ರದರ್ಶಿಸಲಾಗಿದೆ. ತೆಲುಗು ಭಾಷೆಗೆ 'ಬಾಹುಬಲಿ' ಸಿನಿಮಾದ ಚಿತ್ರ. ತಮಿಳಿಗೆ ಧನುಶ್ ನಟನೆಯ 'ಮಾರಿ' ಸಿನಿಮಾದ ಚಿತ್ರ. ಹಿಂದಿಗೆ ಅಜಯ್ ದೇವಗನ್ ನಟನೆಯ 'ದೃಶ್ಯಂ' ಸಿನಿಮಾದ ದೃಶ್ಯ. ಪಂಜಾಬಿಗೆ 'ಜಟ್ ಔರ್ ಜೂಲಿಯೆಟ್' ಸಿನಿಮಾ ದೃಶ್ಯ, ಮಲಯಾಳಂಗೆ ಸಾಯಿ ಪಲ್ಲವಿ ನಟನೆಯ 'ಪ್ರೇಮಂ' ಸಿನಿಮಾದ ಚಿತ್ರವನ್ನು ನೀಡಲಾಗಿದೆ. ಆದರೆ ಕನ್ನಡದ ಸಿನಿಮಾ ರಂಗಕ್ಕೆ ಮಾತ್ರ ಬೇರೆ ಭಾಷೆಯ ಸಿನಿಮಾದ ಚಿತ್ರ ನೀಡಲಾಗಿದೆ.

ಪ್ರಾದೇಶಿಕ ಸಿನಿಮಾ ರಂಗದ ಬಗ್ಗೆ ಅಜ್ಞಾನ

ಕನ್ನಡ ಸಿನಿಮಾಕ್ಕೆ ತೆಲುಗು ನಟ ನಾನಿ ನಟಿಸಿರುವ 'ಜೆರ್ಸಿ' ಸಿನಿಮಾದ ಚಿತ್ರವನ್ನು ನೀಡಲಾಗಿದೆ. ಡಿಸ್ನಿ ಪ್ಲಸ್ ಹಾಟ್‌ಸ್ಟಾರ್‌ನಲ್ಲಿ ಕನ್ನಡ ಸಿನಿಮಾಗಳು ಇಲ್ಲವೆಂದೇನಿಲ್ಲ. 'ಸಂಗೊಳ್ಳಿ ರಾಯಣ್ಣ', 'ಗಾಳಿಪಟ', 'ಮುಂಗಾರು ಮಳೆ', 'ಮಾಣಿಕ್ಯ', 'ಸಿಂಪಲ್ ಆಗ್ ಒಂದ್ ಲವ್ ಸ್ಟೋರಿ' ಇನ್ನು ಹಲವು ಸಿನಿಮಾಗಳಿವೆ. ಆದರೆ ಡಿಸ್ನಿ ಹಾಟ್‌ಸ್ಟಾರ್‌ನವರು ಕನ್ನಡ ಸಿನಿಮಾದ ಜಾಹೀರಾತಿಗೆ ತೆಲುಗು ಸಿನಿಮಾದ ನಟನ ಚಿತ್ರವನ್ನು ಬಳಸಿರುವುದು ಪ್ರಾದೇಶಿಕ ಭಾಷೆಗಳು, ಹಾಗೂ ಪ್ರಾದೇಶಿಕ ಸಿನಿಮಾ ರಂಗಗಳ ಬಗ್ಗೆ ಅವರಿಗಿರುವ ಅಜ್ಞಾನವನ್ನು ಸೂಚಿಸುತ್ತಿದೆ.

23 ಲಕ್ಷ ಕೋಟಿ ಖರ್ಚು ಮಾಡಲಿದೆ ಡಿಸ್ನಿ ಪ್ಲಸ್

ಡಿಸ್ನಿ ಪ್ಲಸ್ ಹಾಟ್‌ಸ್ಟಾರ್ ವಿಶ್ವದ ಬೃಹತ್ ಒಟಿಟಿಗಳಲ್ಲಿ ಒಂದಾಗಿದ್ದು ಭಾರತ ಮಾತ್ರವಲ್ಲದೆ ವಿಶ್ವದೆಲ್ಲೆಡೆ ತನ್ನ ಮಾರುಕಟ್ಟೆಯನ್ನು ವಿಸ್ತರಿಸಲು ಯತ್ನಿಸುತ್ತಿದೆ. 2022ರಲ್ಲಿ ಕಂಟೆಂಟ್‌ಗಾಗಿ ಸರಿ ಸುಮಾರು 23 ಲಕ್ಷ ಕೋಟಿ ಹಣವನ್ನು ಡಿಸ್ನಿ ಪ್ಲಸ್ ಹಾಟ್‌ಸ್ಟಾರ್ ಖರ್ಚು ಮಾಡಲಿದೆ. ಡಿಸ್ನಿ ಹಾಟ್‌ಸ್ಟಾರ್ ಈಗಾಗಲೇ ಭಾರತ ಸೇರಿದಂತೆ ಹಲವು ದೇಶಗಳಲ್ಲಿ ಅತಿ ಹೆಚ್ಚು ಚಂದಾದಾರರನ್ನು ಹೊಂದಿರುವ ಒಟಿಟಿ. ಲೈವ್ ಟಿವಿ, ಅತ್ಯುತ್ತಮ ಹಾಲಿವುಡ್ ಸಿನಿಮಾ, 'ಗೇಮ್ ಆಫ್ ಥ್ರೋನ್ಸ್' ಹಾಗೂ ಇತರೆ ಜನಪ್ರಿಯ ವೆಬ್ ಸರಣಿಯನ್ನು ಡಿಸ್ನಿ ಹಾಟ್‌ಸ್ಟಾರ್ ಹೊಂದಿದೆ. ಇದರ ಜೊತೆಗೆ ಇನ್ನಷ್ಟು ಒರಿಜಿನಲ್ ಕಂಟೆಂಟ್ ಹಾಗೂ ಪ್ರಾದೇಶಿಕ ಭಾಷೆಗಳ ಕಂಟೆಂಟ್‌ ಕಡೆಗೆ ಡಿಸ್ನಿ ಹಾಟ್‌ಸ್ಟಾರ್ ಗಮನ ನೀಡಲಿದೆ.