ಕೀರ್ತಿ ಸುರೇಶ್‌ಗೆ ಬ್ಯಾಡ್ ಲಕ್: ಈ ಸಲ ಆದರೂ ಕೈ ಹಿಡಿಯುತ್ತಾ ಅದೃಷ್ಟ?

ಮತ್ತೆ ಒಟಿಟಿಗೆ ಕೀರ್ತಿ ಸುರೇಶ್ ಸಿನಿಮಾ?

ಲಾಕ್‌ಡೌನ್ ಸಮಯದಲ್ಲಿ ಕೀರ್ತಿ ಸುರೇಶ್ ಅಭಿನಯದ ಎರಡು ಚಿತ್ರಗಳು ಒಟಿಟಿಯಲ್ಲಿ ಬಿಡುಗಡೆಯಾಗಿದೆ. ಆ ಎರಡೂ ಪ್ರಾಜೆಕ್ಟ್ ಮಕಾಡೆ ಮಲಗಿದವು. ಆ ನಿರಾಸೆಯಿಂದ ಹೊರಬರುವುದಕ್ಕೂ ಮುಂಚೆ ಕೀರ್ತಿ ನಟಿಸಿರುವ ಮತ್ತೊಂದು ಚಿತ್ರ ಒಟಿಟಿಯಲ್ಲಿ ರಿಲೀಸ್ ಮಾಡಲು ಚಿತ್ರತಂಡ ಮುಂದಾಗಿದೆ ಎಂಬ ಸುದ್ದಿ ಚರ್ಚೆಯಾಗ್ತಿದೆ. ಈ ಬಗ್ಗೆ ಚಿತ್ರತಂಡ ಸ್ಪಷ್ಟನೆ ನೀಡಿದೆ.

ಥಿಯೇಟರ್‌ನಲ್ಲೇ 'ಗುಡ್ ಲಕ್ ಸಖಿ'

'ಗುಡ್ ಲಕ್ ಸಖಿ' ಸಿನಿಮಾ ಒಟಿಟಿಯಲ್ಲಿ ಬಿಡುಗಡೆಯಾಗಲಿದೆ ಎಂಬ ಸುದ್ದಿ ಸಾಮಾಜಿಕ ಜಾಲತಾಣದಲ್ಲಿ ಹರಿದಾಡುತ್ತಿದೆ. ಅದು ವದಂತಿ ಅಷ್ಟೇ. ನಾವು ರಿಲೀಸ್ ಬಗ್ಗೆ ಯಾವುದೇ ನಿರ್ಧಾರ ತೆಗೆದುಕೊಂಡಿಲ್ಲ ಎಂದು ಚಿತ್ರದ ನಿರ್ಮಾಪಕ ಸುಧೀರ್ ಚಂದ್ರ ಪ್ರಕಟಣೆ ಬಿಡುಗಡೆ ಮಾಡಿದ್ದಾರೆ. ಜೀ ಸಂಸ್ಥೆ ಗುಡ್ ಲಕ್ ಸಖಿ ಚಿತ್ರವನ್ನು ಖರೀದಿ ಮಾಡಿದೆ ಎಂಬ ಸುದ್ದಿ ವರದಿಯಾಗಿದೆ.

ಪೆಂಗ್ವಿನ್ ಮತ್ತು ಮಿಸ್ ಇಂಡಿಯಾ

ಕಳೆದ ಲಾಕ್‌ಡೌನ್ ಸಮಯದಲ್ಲಿ ಕೀರ್ತಿ ಸುರೇಶ್ ನಟಿಸಿದ್ದ 'ಪೆಂಗ್ವಿನ್' ಸಿನಿಮಾ ಅಮೇಜಾನ್ ಪ್ರೈಮ್‌ನಲ್ಲಿ ರಿಲೀಸ್ ಆಗಿತ್ತು. ಅದಾದ ಬಳಿಕ 'ಮಿಸ್ ಇಂಡಿಯಾ' ಚಿತ್ರ ನೆಟ್‌ಫ್ಲಿಕ್ಸ್‌ನಲ್ಲಿ ತೆರೆಕಂಡಿತ್ತು. ಒಟಿಟಿಯಲ್ಲಿ ತೆರೆಕಂಡ ಈ ಎರಡು ಚಿತ್ರಗಳಿಗೂ ನಿರೀಕ್ಷಿತ ಪ್ರತಿಕ್ರಿಯೆ ಸಿಕ್ಕಿಲ್ಲ. ಇದು ಸಹಜವಾಗಿ ಬೇಸರ ಮೂಡಿಸಿತ್ತು.

ಗುಡ್ ಲಕ್ ಸಖಿ ಚಿತ್ರದ ಬಗ್ಗೆ

ಕೀರ್ತಿ ಸುರೇಶ್ ಈ ಚಿತ್ರದಲ್ಲಿ ಶೂಟರ್ ಆಗಿ ಕಾಣಿಸಿಕೊಂಡಿದ್ದಾರೆ. ಇಡೀ ಊರಿನಲ್ಲಿ ಬ್ಯಾಡ್ ಲಕ್ ಸಖಿ ಎಂದು ಕರೆಸಿಕೊಳ್ಳುವ ಹುಡುಗಿ ಹೇಗೆ ಸಾಧನೆ ಮಾಡ್ತಾಳೆ ಎನ್ನುವುದು ಕಥೆ. ಜಗಪತಿ ಬಾಬು ಕೋಚ್ ಪಾತ್ರದಲ್ಲಿ ನಟಿಸಿದ್ದಾರೆ. ಮಹಿಳಾ ಪ್ರಧಾನ ಕಥಾಹಂದರ ಹೊಂದಿರುವ ಈ ಚಿತ್ರ ತಮಿಳು, ತೆಲುಗು ಹಾಗೂ ಮಲಯಾಳಂ ಭಾಷೆಯಲ್ಲಿ ರಿಲೀಸ್ ಆಗಿತ್ತು.