ಗುರುಶಿಷ್ಯರು, ಮಾನ್ಸೂನ್ ರಾಗ, ತೋತಾಪುರಿ ಓಟಿಟಿ ಬಿಡುಗಡೆ ದಿನಾಂಕ ಬಹಿರಂಗ

ಗುರು ಶಿಷ್ಯರು

ಶರಣ್ ಹಾಗೂ ನಿಶ್ವಿಕಾ ನಾಯ್ಡು ನಾಯಕ ಮತ್ತು ನಾಯಕಿಯಾಗಿ ಅಭಿನಯಿಸಿದ್ದ ಗುರು ಶಿಷ್ಯರು ಚಿತ್ರ ಇದೇ ತಿಂಗಳ 11ರಿಂದ ಜೀ ಫೇವ್ ಅಪ್ಲಿಕೇಶನ್‌ನಲ್ಲಿ ವೀಕ್ಷಿಸಲು ಲಭ್ಯವಿರಲಿದೆ. ಈ ಕುರಿತಾಗಿ ಜೀ ಫೈವ್ ಕೂಡ ಸಾಮಾಜಿಕ ಜಾಲತಾಣದಲ್ಲಿ ಪೋಸ್ಟ್ ಮಾಡಿಕೊಂಡಿದ್ದು ಮಾಹಿತಿಯನ್ನು ಹಂಚಿಕೊಂಡಿದೆ. ದೇಶಿ ಕ್ರೀಡೆ ಖೋ ಖೋ ಕುರಿತಾದ ಕತೆಯನ್ನು ಹೊಂದಿರುವ ಗುರು ಶಿಷ್ಯರು ಚಿತ್ರ ಕುಟುಂಬ ಸಮೇತರಾಗಿ ಕುಳಿತು ವೀಕ್ಷಿಸಬಹುದಾದಂತ ಚಿತ್ರವಾಗಿದೆ. ಇಷ್ಟು ದಿನ ನಟನಾಗಿ ಮಾತ್ರ ಕೆಲಸ ನಿರ್ವಹಿಸಿದ್ದ ಶರಣ್ ಈ ಚಿತ್ರಕ್ಕೆ ತರುಣ್ ಸುಧೀರ್ ಜತೆ ಕೈ ಜೋಡಿಸಿ ಬಂಡವಾಳ ಹೂಡಿ ನಿರ್ಮಾಪಕ ಕೂಡ ಆಗಿದ್ದರು ಮತ್ತು ಜೆಂಟಲ್‌ಮನ್ ರೀತಿಯ ಒಳ್ಳೆ ಕಂಟೆಂಟ್ ಚಿತ್ರವನ್ನು ನಿರ್ದೇಶಿಸಿದ್ದ ಜಡೇಶ್ ಕುಮಾರ್ ಹಂಪಿ ಈ ಚಿತ್ರವನ್ನು ನಿರ್ದೇಶಿಸಿದ್ದಾರೆ.

ಮಾನ್ಸೂನ್ ರಾಗ

ಧನಂಜಯ್, ರಚಿತಾ ರಾಮ್, ಯಶಾ ಶಿವಕುಮಾರ್, ಅಚ್ಯುತ್ ಕುಮಾರ್ ಹಾಗೂ ಸುಹಾಸಿನಿ ಮುಖ್ಯ ಭೂಮಿಕೆಯಲ್ಲಿ ಕಾಣಿಸಿಕೊಂಡಿದ್ದ ಮಾನ್ಸೂನ್ ರಾಗ ತೆಲುಗಿನ ಕೇರ್ ಆಫ್ ಕಂಚೆರಪಾಲೆಂ ಎಂಬ ಚಿತ್ರದ ರಿಮೇಕ್ ಆಗಿತ್ತು. ಚಿತ್ರ ನಿರೀಕ್ಷಿಸಿದ ಯಶಸ್ಸು ಕಾಣುವಲ್ಲಿ ವಿಫಲವಾದರೂ ಬಿಡುಗಡೆಗೂ ಮುನ್ನ ಒಂದಷ್ಟು ಸದ್ದು ಮಾಡಿತ್ತು. ರಿಮೇಕ್ ಎಂಬ ಕಾರಣಕ್ಕೆ ಈ ಚಿತ್ರವನ್ನು ನೋಡುವತ್ತ ಬಹುತೇಕರು ಆಸಕ್ತಿ ತೋರಲಿಲ್ಲ ಎಂದರೆ ತಪ್ಪಾಗಲಾರದು. ಹೀಗೆ ಬಾಕ್ಸ್ ಆಫೀಸ್‌ನಲ್ಲಿ ಸಾಮಾನ್ಯವೆನಿಸಿಕೊಂಡ ಮಾನ್ಸೂನ್ ರಾಗ ಚಿತ್ರ ಇದೇ ನವೆಂಬರ್ 25ರಿಂದ ಜೀ ಫೈವ್ ಅಪ್ಲಿಕೇಶನ್‌ನಲ್ಲಿ ಪ್ರಸಾರವಾಗಲಿದೆ.

ತೋತಾಪುರಿ

ಕಾಂತಾರ ಜತೆ ಚಿತ್ರಮಂದಿರಕ್ಕೆ ಬಂದ ಜಗ್ಗೇಶ್ ಹಾಗೂ ಅಧಿತಿ ಪ್ರಭುದೇವ ಅಭಿನಯದ ಮತ್ತು ವಿಜಯ್ ಪ್ರಸಾದ್ ನಿರ್ದೇಶನದ ತೋತಾಪುರಿ ಮಿಶ್ರ ಪ್ರತಿಕ್ರಿಯೆ ಪಡೆದುಕೊಂಡಿತು. ಬಾಕ್ಸ್ ಆಫೀಸ್‌ನಲ್ಲಿ ಅಬ್ಬರಿಸುವಲ್ಲಿ ವಿಫಲವಾದ ತೋತಾಪುರಿ ಚಾಪ್ಟರ್ 1 ಚಿತ್ರ ಜೀ ಫೈವ್ ಅಪ್ಲಿಕೇಶನ್‌ನಲ್ಲಿ ಡಿಸೆಂಬರ್ ತಿಂಗಳು ಸ್ಟ್ರೀಮ್ ಆಗಲಿದೆ.