'ಕೆಜಿಎಫ್ 2' ಜೂನ್ 3ರಿಂದ ಅಮೆಜಾನ್‌ನಲ್ಲಿ ಲಭ್ಯ: 'ಫ್ರೀ'ಯಾಗಿ ನೋಡಿ!

ಜೂನ್ 3ರಿಂದ ಅಮೆಜಾನ್‌ನಲ್ಲಿ 'ಕೆಜಿಎಫ್ 2'!

'ಕೆಜಿಎಫ್ 2' ಸಿನಿಮಾವನ್ನು ನೀವಿನ್ನೂ ನೋಡಲೇ ಇಲ್ಲವಾ, ಒಟಿಟಿಯಲ್ಲಿ ಸಿನಿಮಾ ಬರಲಿ ಎಂದು ಕಾಯುತ್ತಿದ್ದೀರಾ? ಅಥವಾ ಸಿನಿಮಾ ನೋಡಿದರೂ ಮತ್ತೆ ಸಿನಿಮಾ ನೋಡಬೇಕು ಎಂದು ಅಂದುಕೊಂಡಿದ್ದೀರಾ? ಅದಕ್ಕೆ ಇನ್ನು ಹೆಚ್ಚು ದಿನ ಕಾಯಬೇಕಾಗಿಲ್ಲ. ಯಾಕೆಂದರೆ 'ಕೆಜಿಎಫ್ 2' ಜೂನ್ 3 ರಿಂದ ಅಮೆಜಾನ್ ಪ್ರೈಂ ವಿಡಿಯೋದಲ್ಲಿ ರಿಲೀಸ್ ಆಗುತ್ತಿದೆ. ಇದು 'ಕೆಜಿಎಫ್ 2' ಅಭಿಮಾನಿಗಳಿಗೆ ಭರ್ಜರಿ ಸುದ್ದಿ.

'ಫ್ರೀ'ಯಾಗಿ 'ಕೆಜಿಎಫ್ 2' ನೋಡ ಬಹುದು!

'ಕೆಜಿಎಫ್ 2' ಸಿನಿಮಾಒಟಿಟಿಯಲ್ಲಿ ರಿಲೀಸ್ ಎಂದಾಕ್ಷಣ ಗಾಬರಿ ಆಯ್ತಾ. ಸಿನಿಮಾ ನೋಡಲು ದುಡ್ಡು ಕಟ್ಟ ಬೇಕಲ್ಲಪ್ಪಾ ಎಂದುಕೊಳ್ಳಬೇಡಿ. ಯಾಕೆಂದರೆ ಈ ಬಾರಿ 'ಕೆಜಿಎಫ್ 2' ನೋಡಲು ಯಾವುದೇ ರೀತಿಯ ಹೆಚ್ಚುವರಿ ಹಣ ಕಟ್ಟಬೇಕಾಗಿಲ್ಲ. ಅಮೆಜಾನ್ ಮೆಂಬರ್‌ಶಿಪ್ ಇದ್ದರೆ ಸಾಕು. ಎಲ್ಲಾ ಸಿನಿಮಾಗಳ ಹಾಗೆ ಈ ಚಿತ್ರವನ್ನು ಅಮೆಜಾನ್‌ನಲ್ಲಿ ನೋಡಬಹುದು.

ಈ ಹಿಂದೆ 199ರೂ. ಕೊಡಬೇಕಿತ್ತು!

ಇನ್ನು ಈ ಹಿಂದೆಯೇ 'ಕೆಜಿಎಫ್ 2' ಸಿನಿಮಾವನ್ನು ಅಮೆಜಾನ್‌ನಲ್ಲಿ ರಿಲೀಸ್ ಮಾಡಲಾಗಿದೆ. ಆದರೆ ಸಿನಿಮಾವನ್ನು ಹೆಚ್ಚುವರಿ ಹಣ ಕೊಟ್ಟು ನೋಡಬೇಕಾಗಿತ್ತು. ಅಂದರೆ 'ಕೆಜಿಎಫ್ 2' ಅಮೆಜಾನ್ ಪ್ರೈಂನಲ್ಲಿ ಲಭ್ಯವಿದ್ದರೂ, ಒಮ್ಮೆ ಸಿನಿಮಾ ನೋಡಲು ಹಣ ಕೊಡಬೇಕಿತ್ತು. ಹಾಗಾಗಿ ಅಮೆಜಾನ್ ಪ್ರೈಂ ಸದಸ್ಯತ್ವ ಇದ್ದರೂ ಕೂಡ ಹೆಚ್ಚುವರಿ 199 ರೂ . ಕೊಟ್ಟು ಸಿನಿಮಾ ನೋಡಬೇಕಿತ್ತು.

50ನೇ ದಿನಕ್ಕೆ ಅಮೇಜಾನ್‌ನಲ್ಲಿ 'ಕೆಜಿಎಫ್ 2'!

ಇನ್ನು 'ಕೆಜಿಎಫ್ 2' ಸಾಲು, ಸಾಲು ದಾಖಲೆಗಳನ್ನು ಮಾಡಿದೆ. ಸದ್ಯ 50 ದಿನದತ್ತ ಓಡುತ್ತಿದೆ. ಸಿನಿಮಾ ರಿಲೀಸ್ ಆಗಿ ಒಟಿಟಿಗೆ ಬಂದರೂ ಕೂಡ, ಚಿತ್ರಮಂದಿರದಲ್ಲಿ ಸಿನಿಮಾ ನೋಡುವವರ ಸಂಖ್ಯೆ ಕಡಿಮೆ ಆಗಿಲ್ಲ. ಇನ್ನು 50ನೇ ದಿನಕ್ಕೆ ಅಮೆಜಾನ್‌ನಲ್ಲಿ ರಿಲೀಸ್ ಆಗಲಿದೆ. ಇಲ್ಲೂ ಕೂಡ ದಾಖಲೆಯನ್ನು ಬರೆಯುವ ನಿರೀಕ್ಷೆ ಹೆಚ್ಚಾಗಿದೆ.