ಈ ವಾರ ಒಟಿಟಿಗೆ ಬರುತ್ತಿವೆ ಭರ್ಜರಿ ಸಿನಿಮಾಗಳು: ನಿಮ್ಮ ಆಯ್ಕೆ ಯಾವುದು?

ಚಿರಂಜೀವಿಯ 'ಗಾಡ್‌ಫಾದರ್'

ಚಿರಂಜೀವಿ ನಟಿಸಿರುವ ತೆಲುಗು ಸಿನಿಮಾ 'ಗಾಡ್‌ಫಾದರ್' ನೆಟ್‌ಫ್ಲಿಕ್ಸ್‌ನಲ್ಲಿ ನವೆಂಬರ್ 18 ರಂದು ಬಿಡುಗಡೆ ಆಗಲಿದೆ. ಸಿನಿಮಾದಲ್ಲಿ ಚಿರಂಜೀವಿ ಜೊತೆಗೆ ಸಲ್ಮಾನ್ ಖಾನ್ ಸಹ ನಟಿಸಿದ್ದಾರೆ. ಸಲ್ಮಾನ್ ಖಾನ್ ನಟಿಸಿರುವ ಮೊದಲ ತೆಲುಗು ಸಿನಿಮಾ ಇದು. ಸಲ್ಮಾನ್ ಖಾನ್ ನಟಿಸಿದ್ದಾರಾದ್ದರಿಂದಲೇ ಈ ಸಿನಿಮಾವನ್ನು ನೆಟ್‌ಫ್ಲಿಕ್ಸ್‌ ಖರೀದಿಸಿದೆ ಎನ್ನಲಾಗುತ್ತಿದೆ. ಈ ಸಿನಿಮಾವು ತಮಿಳಿನ 'ಲುಸಿಫರ್' ಸಿನಿಮಾದ ರೀಮೇಕ್. ಜೊತೆಗೆ ತೆಲುಗಿನ ಮತ್ತೊಂದು ಸಿನಿಮಾ 'ಐರಾವತಂ' ಸಿನಿಮಾ ಡಿಸ್ನಿ ಹಾಟ್‌ಸ್ಟಾರ್‌ನಲ್ಲಿ ನವೆಂಬರ್ 17 ರಂದು ಬಿಡುಗಡೆ ಆಗಿದೆ.

ತಮಿಳಿನ ಎರಡು ಸಿನಿಮಾ

ಚಿತ್ರಮಂದಿರಗಳಲ್ಲಿ ಬಿಡುಗಡೆ ಆಗಿ ಹಿಟ್ ಆದ ತಮಿಳಿನ ಸ್ಟಾರ್ ನಟ ಕಾರ್ತಿಯ 'ಸರ್ದಾರ್' ಒಟಿಟಿಗೆ ಬಂದಿದೆ. ಅಲ್ಲು ಅರ್ಜುನ್ ತಂದೆ ಅಲ್ಲು ಅರವಿಂದ್ ಒಡೆತನದ ಆಹಾ ಒಟಿಟಿಯಲ್ಲಿ ನವೆಂಬರ್ 18 ರಂದು 'ಸರ್ದಾರ್' ಸಿನಿಮಾ ತಮಿಳು ಹಾಗೂ ತೆಲುಗು ಭಾಷೆಗಳಲ್ಲಿ ತೆರೆಗೆ ಬರಲಿದೆ. ಸಿನಿಮಾದಲ್ಲಿ ರಾಶಿ ಖನ್ನ ನಾಯಕಿ. ಮತ್ತೊಂದು ತಮಿಳು ಸಿನಿಮಾ 'ಅನಲ್ ಮೇಲೆ ಪಣಿ ತುಳಿ' ಸೋನಿ ಲಿವ್‌ನಲ್ಲಿ ನೇರವಾಗಿ ಬಿಡುಗಡೆ ಆಗಿದೆ. ಮಹಿಳಾ ಪ್ರಧಾನ, ಥ್ರಿಲ್ಲರ್ ಕತೆ ಹೊಂದಿರುವ ಈ ಸಿನಿಮಾ ಸೋನಿ ಲಿವ್‌ನಲ್ಲಿ ನವೆಂಬರ್ 17 ರಿಂದ ಸ್ಟ್ರೀಮ್ ಆಗುತ್ತಿದೆ.

'ಧಾರಾವಿ ಬ್ಯಾಂಕ್' ಹಿಂದಿ ವೆಬ್ ಸರಣಿ

ಸುನಿಲ್ ಶೆಟ್ಟಿ, ವಿವೇಕ್ ಒಬೆರಾಯ್ ಇನ್ನೂ ಕೆಲವರು ನಟಿಸಿರುವ 'ಧಾರಾವಿ ಬ್ಯಾಂಕ್' ವೆಬ್ ಸರಣಿ ಮ್ಯಾಕ್ಸ್ ಪ್ಲೇಯರ್‌ನಲ್ಲಿ ಬಿಡುಗಡೆ ಆಗಿದೆ. ಅಂಡರ್‌ವರ್ಲ್ಡ್‌ ಮತ್ತು ಪೊಲೀಸರ ನಡುವೆ ನಡೆವ ಕತೆಯನ್ನು ಈ ವೆಬ್ ಸರಣಿ ಒಳಗೊಂಡಿದೆ. ಸುನಿಲ್ ಶೆಟ್ಟಿ ತಲೈವಾ ಹೆಸರಿನ ಡಾನ್‌ ಪಾತ್ರದಲ್ಲಿ ನಟಿಸಿದ್ದಾರೆ. ಸುಮಾರು 30,000 ಕೋಟಿ ಡೀಲ್‌ನ ಸುತ್ತ ಇಡೀ ವೆಬ್ ಸರಣಿ ನಡೆಯುತ್ತದೆ ಎನ್ನಲಾಗಿದೆ.

ಗರ್ಭಿಣಿ ಮಹಿಳೆಯರ ಸಿನಿಮಾ 'ವಂಡರ್ ವುಮನ್'

'ವಂಡರ್ ವುಮನ್' ಹೆಸರಿನ ಮಹಿಳಾ ಪ್ರಧಾನ ಸಿನಿಮಾ ಒಂದು ಸೋನಿ ಲಿವ್‌ನಲ್ಲಿ ಬಿಡುಗಡೆ ಆಗಿದೆ. ಇಂಗ್ಲೀಷ್, ತಮಿಳು, ಮಲಯಾಳಂ ಎಲ್ಲ ಭಾಷೆಗಳೂ ಒಂದೇ ಸಿನಿಮಾದಲ್ಲಿರುವ ಕಾರಣ ಇದು ನಿರ್ದಿಷ್ಟ ಭಾಷೆಯ ಸಿನಿಮಾ ಎನ್ನಲಾಗದು. ಸಿನಿಮಾವು ಗರ್ಭಿಣಿ ಮಹಿಳೆಯರ ಬಗೆಗಿನ ಸಿನಿಮಾ ಆಗಿದೆ. ಸಿನಿಮಾದಲ್ಲಿ ನಿತ್ಯಾ ಮೆನನ್, ಪಾರ್ವತಿ ತಿರುವೋತು ಇನ್ನೂ ಹಲವು ಉತ್ತಮ ನಟಿಯರಿದ್ದಾರೆ. ಗರ್ಭಿಣಿ ಮಹಿಳೆಯರೆಲ್ಲ ಒಂದೆಡೆ ತರಬೇತಿ ಒಂದಕ್ಕೆ ಸೇರುವ ಅಲ್ಲಿ ಎಲ್ಲರೂ ಆತ್ಮೀಯರಾಗುವ ಕತೆಯನ್ನು ಈ ಸಿನಿಮಾ ಒಳಗೊಂಡಿದೆ. ಸಿನಿಮಾವು ನವೆಂಬರ್ 18 ರಂದು ಸೋನಿ ಲಿವ್‌ನಲ್ಲಿ ಸ್ಟ್ರೀಮ್ ಆಗಲಿದೆ.

'ಸಿತಾ ರಾಮಮ್' ಮತ್ತೆ ಬಿಡುಗಡೆ

ಚಿತ್ರಮಂದಿರದಲ್ಲಿ ಬಿಡುಗಡೆ ಆಗಿ ಸೂಪರ್-ಡೂಪರ್ ಹಿಟ್ ಎನಿಸಿಕೊಂಡು ಸುಂದರ ಪ್ರೇಮಕತೆ 'ಸೀತಾ ರಾಮಮ್' ಇದೀಗ ಡಿಸ್ನಿ ಹಾಟ್‌ಸ್ಟಾರ್‌ನಲ್ಲಿ ಬಿಡುಗಡೆ ಕಂಡಿದೆ. ಈ ಹಿಂದೆ ತೆಲುಗು ತಮಿಳು ಹಾಗೂ ಮಲಯಾಳಂ ಭಾಷೆಗಳಲ್ಲಿ ಅಮೆಜಾನ್ ಪ್ರೈಂನಲ್ಲಿ ಬಿಡುಗಡೆ ಆಗಿ ಹಿಟ್ ಆಗಿದ್ದ ಈ ಸಿನಿಮಾ ಇದೀಗ ಹಿಂದಿಯಲ್ಲಿ ಡಿಸ್ನಿ ಪ್ಲಸ್ ಹಾಟ್‌ಸ್ಟಾರ್‌ನಲ್ಲಿ ತೆರೆಗೆ ಬಂದಿದೆ. ಚಿತ್ರಮಂದಿರ ಹಾಗೂ ಒಟಿಟಿ ಎರಡರಲ್ಲೂ ಈ ಸಿನಿಮಾ ಸೂಪರ್ ಹಿಟ್ ಆಗಿದೆ.