ವೆಬ್ ಸರಣಿ ಆಗಲಿದೆ ಮಾಜಿ ಪ್ರಧಾನಿ ಪಿವಿ ನರಸಿಂಹರಾವ್ ಜೀವನ

ಪ್ರಕಾಶ್ ಝಾ ನಿರ್ದೇಶನ

ತೆಲಂಗಾಣದಲ್ಲಿ ಹುಟ್ಟಿ ಬೆಳೆದ ಪಿ.ವಿ.ನರಸಿಂಹರಾವ್ ಬಗ್ಗೆ ತೆಲುಗು ಜನಗಳಿಗೆ ವಿಪರೀತ ಅಭಿಮಾನ. ಇದೇ ಅಭಿಮಾನದ ಕಾರಣದಿಂದ ಇದೀಗ ವೆಬ್ ಸರಣಿ ನಿರ್ಮಾಣಕ್ಕೆ ಕೈ ಹಾಕಿದ್ದಾರೆ ಜನಪ್ರಿಯ ಸಿನಿಮಾ ನಿರ್ಮಾಪಕ ಅಲ್ಲು ಅರವಿಂದ್. ವೆಬ್ ಸರಣಿಯನ್ನು ರಾಷ್ಟ್ರಪ್ರಶಸ್ತಿ ವಿಜೇತ ನಿರ್ದೇಶಕ ಪ್ರಕಾಶ್ ಝಾ ನಿರ್ದೇಶನ ಮಾಡಲಿದ್ದಾರೆ. ಈ ವೆಬ್ ಸರಣಿಯು ತೆಲುಗು, ತಮಿಳು, ಮಲಯಾಳಂ, ಕನ್ನಡ ಹಾಗೂ ಹಿಂದಿ ಭಾಷೆಗಳಲ್ಲಿ ವೀಕ್ಷಿಸಲು ಲಭ್ಯವಾಗಲಿದೆ. ಇದು ಭಾರತದ ಮೊದಲ ಪ್ಯಾನ್ ಇಂಡಿಯಾ ವೆಬ್ ಸರಣಿ ಆಗಲಿದೆ.

'ಆಹಾ' ಒಟಿಟಿಯಲ್ಲಿ ಪ್ರಸಾರ

ವೆಬ್ ಸರಣಿಗೆ 'ಹಾಫ್ ಲಯನ್' ಎಂದು ಹೆಸರಿಡಲಾಗಿದೆ. ಪಿ.ವಿ.ನರಸಿಂಹರಾವ್ ಬಾಲ್ಯ, ಯೌವ್ವನ, ಹೋರಾಟ, ರಾಜಕೀಯ, ಪ್ರಧಾನಿಯಾಗಿ ಕಾರ್ಯ ಇನ್ನಿತರೆ ವಿಷಯಗಳ ಮೇಲೆ ವೆಬ್ ಸರಣಿ ಬೆಳಕು ಚೆಲ್ಲಲಿದೆ. ಈ ವೆಬ್ ಸರಣಿಯ ಅಲ್ಲು ಅರವಿಂದ್ ಮಾಲೀಕತ್ವದ 'ಆಹಾ' ಒಟಿಟಿಯಲ್ಲಿ ಪ್ರಸಾರವಾಗಲಿದೆ. ವೆಬ್ ಸರಣಿಯನ್ನು ಆಹಾ ಸ್ಟುಡಿಯೋಸ್ ಮತ್ತು ಅಪ್ಲಾಸ್ ಎಂಟರ್ಟೈನ್‌ಮೆಂಟ್ ಜಂಟಿಯಾಗಿ ನಿರ್ಮಾಣ ಮಾಡಲಿದೆ. ವೆಬ್ ಸರಣಿಗೆ ಪಾತ್ರಧಾರಿಗಳ ಆಯ್ಕೆ ನಡೆಯುತ್ತಿದ್ದು, ಚಿತ್ರೀಕರಣ ಶೀಘ್ರದಲ್ಲಿಯೇ ಪ್ರಾರಂಭವಾಗಲಿದೆ.

'ಹಾಫ್ ಲಯನ್' ಪುಸ್ತಕ ಆಧರಿಸಿ ನಿರ್ಮಾಣ

ಪಿ.ವಿ.ನರಸಿಂಹರಾವ್ ಭಾರತದ ದುರದೃಷ್ಟವಂತ ಪ್ರಧಾನಿ ಎಂದೂ ಕರೆಯಲಾಗುತ್ತದೆ. ಅವರ ಸೇವಾ ಅವಧಿಯಲ್ಲಿ ಬಾಬ್ರಿ ಮಸೀದಿ ಧ್ವಂಸ ಪ್ರಕರಣ, ಹಿಂದು-ಮುಸ್ಲಿಂ ಧಂಗೆಗಳು ಇನ್ನೂ ಹಲವು ಸೂಕ್ಷ್ಮ ವಿಷಯಗಳು ನಡೆದವು. ಬಾಬ್ರಿ ಮಸೀದಿ ಧ್ವಂಸ ಘಟನೆಯನ್ನು ತಡೆಯುವಲ್ಲಿ ನರಸಿಂಹರಾವ್ ವಿಫಲರಾದರು ಎಂಬ ಆರೋಪವೂ ಅವರ ಮೇಲಿದೆ. ಅವರ ಜೀವನ, ಆಡಳಿತ, ಆಡಳಿತಾವಧಿಯಲ್ಲಿ ನಡೆದ ಘಟನೆಯಗಳ ಬಗ್ಗೆ ವಿನಯ್ ಸತ್ಪತಿ ಅವರು ಪುಸ್ತಕ ಬರೆದಿದ್ದು, ಪುಸ್ತಕವನ್ನು ಆಧರಿಸಿಯೇ ಇದೀಗ ವೆಬ್ ಸರಣಿ ನಿರ್ಮಾಣಗೊಳ್ಳಲಿದೆ.

ಹಲವು ಬಯೋಪಿಕ್‌ಗಳು ತೆರೆಗೆ ಬಂದಿವೆ

ಕೆಲವು ವರ್ಷಗಳಲ್ಲಿ ಬಾಲಿವುಡ್ ಹಾಗೂ ಇತರ ಚಿತ್ರರಂಗದಲ್ಲಿ ಹಲವು ಬಯೋಪಿಕ್‌ಗಳು ತೆರೆಗೆ ಬಂದಿವೆ ಮತ್ತು ಸೂಪರ್ ಹಿಟ್ ಆಗಿವೆ. ಮಿಲ್ಕಾ ಸಿಂಗ್‌ರ ಜೀವನ ಆಧರಿತ 'ಭಾಗ್ ಮಿಲ್ಕಾ ಭಾಗ್' ಸಿನಿಮಾ ದೊಡ್ಡ ಹಿಟ್ ಆದ ಬಳಿಕ ಸಾಲು-ಸಾಲಾಗಿ ಕ್ರೀಡಾಪಟುಗಳ ಜೀವನ ಸಿನಿಮಾ ಆಗಲು ಆರಂಭವಾದವು. ಮೇರಿಕೋಮ್ ಜೀವನ ಆಧರಿಸಿದ ಸಿನಿಮಾ ತೆರೆಗೆ ಬಂತು. ಸೈನಾ ನೆಹ್ವಾಲ್ ಜೀವನ ಆಧರಿಸಿದ 'ಸೈನಾ' ಸಿನಿಮಾ ತೆರೆಗೆ ಬಂತು. ಹಾಕಿ ಆಟಗಾರ ಸಂದೀಪ್ ಸಿಂಗ್ ಜೀವನ ಆಧರಿಸಿದ 'ಸೂರ್ಮ', 'ಎಂಎಸ್ ಧೋನಿ', 'ಅಜರ್', 'ಪಾನ್ ಸಿಂಗ್ ತೋಮರ್' , ಪೋಗಟ್ ಜೀವನ ಆಧರಿಸಿದ 'ದಂಗಲ್' ಇನ್ನೂ ಹಲವು ಸಿನಿಮಾಗಳು ಈಗಾಗಲೇ ತೆರೆಗೆ ಬಂದಿವೆ. ಇದೀಗ ಕ್ರಿಕೆಟಿಗ ಕಪಿಲ್ ದೇವ್ ಜೀವನ ಆಧರಿಸಿದ '83', ಮಿಥಾಲಿ ರಾಜ್ ಜೀವನ ಆಧರಿಸಿದ 'ಶಭಾಸ್ ಮಿಥು' ತೆರೆಗೆ ಬರಲಿವೆ.