'ರಾಧೆ ಶ್ಯಾಮ್'ಗೆ ಭರ್ಜರಿ ಒಟಿಟಿ ಆಫರ್: ಡೀಲ್ ಬೇಡ ಅಂತಿದ್ದಾರೆ ನಿರ್ಮಾಪಕ!

350 ಕೋಟಿ ಬಜೆಟ್?

ಯುವಿ ಕ್ರಿಯೇಷನ್ಸ್ ಮತ್ತು ಟಿ-ಸಿರೀಸ್ ಜಂಟಿಯಾಗಿ ನಿರ್ಮಾಣ ಮಾಡಿರುವ ರಾಧೆಶ್ಯಾಮ್ ಚಿತ್ರದ ಬಜೆಟ್ 350 ಕೋಟಿ ಎಂದು ಹೇಳಲಾಗಿದೆ. ಇಷ್ಟು ದೊಡ್ಡ ಬಜೆಟ್ ಹಾಕಿ ಸಿನಿಮಾ ನಿರ್ಮಿಸಿರುವ ನಿರ್ಮಾಪಕರು ನಷ್ಟ ಮಾಡಿಕೊಳ್ಳಲು ಸಿದ್ದರಿಲ್ಲ. ಥಿಯೇಟರ್ ರಿಲೀಸ್ ಮಾಡಿದ್ರೆ ಲಾಭ ಮಾಡಬಹುದು ಎಂಬ ಲೆಕ್ಕಾಚಾರದಲ್ಲಿದೆ ಚಿತ್ರತಂಡ.

ಅಮೆಜಾನ್ ಆಫರ್ 400 ಕೋಟಿ?

ರಾಧೆಶ್ಯಾಮ್ ಚಿತ್ರವನ್ನು ನಾವೇ ಎಕ್ಸ್‌ಕ್ಲೂಸಿವ್ ಆಗಿ ರಿಲೀಸ್ ಮಾಡುತ್ತೇವೆ ಎಂದು ಅಮೇಜಾನ್ ಪ್ರೈಮ್ ಸಂಸ್ಥೆ ಮುಂದೆ ಬಂದಿದೆ. ಅದಕ್ಕಾಗಿ ಸುಮಾರು 400 ಕೋಟಿ ನೀಡುವುದಾಗಿ ಒಪ್ಪಂದಕ್ಕೆ ಸಿದ್ದವಿದೆ. ಆದರೆ, ನಿರ್ಮಾಪಕರು ಥಿಯೇಟರ್ ರಿಲೀಸ್ ಕಡೆ ಹೆಚ್ಚು ಒಲವು ತೋರಿದ್ದಾರೆ ಎನ್ನುವುದು ಇಂಡಸ್ಟ್ರಿ ಟಾಕ್.

ಸಲ್ಮಾನ್ ಖಾನ್ ರಾಧೆ ಚಿತ್ರಕ್ಕೆ ಸಿಕ್ಕಿದ್ದೆಷ್ಟು?

ಸಲ್ಮಾನ್ ಖಾನ್ ನಟನೆಯಲ್ಲಿ ಮೂಡಿಬಂದಿದ್ದ 'ರಾಧೆ' ಚಿತ್ರವನ್ನು ಜೀ 5 ಖರೀದಿ ಮಾಡಿತ್ತು. ಈದ್ ಹಬ್ಬದ ಪ್ರಯುಕ್ತ ಮೇ ತಿಂಗಳಲ್ಲಿ ಎಕ್ಸ್‌ಕ್ಲೂಸಿವ್ ಆಗಿ ರಿಲೀಸ್ ಮಾಡಿತ್ತು. ನಿರೀಕ್ಷೆಯನ್ನು ಹುಸಿಗೊಳಿಸಿದ ರಾಧೆ ಫ್ಲಾಪ್ ಪಟ್ಟಿಗೆ ಸೇರಿಕೊಂಡಿದೆ. ಅಂದ್ಹಾಗೆ, ಜೀ ಸಂಸ್ಥೆ ಈ ಚಿತ್ರವನ್ನು 250 ಕೋಟಿ ನೀಡಿ ಖರೀದಿ ಮಾಡಿತ್ತು.

ನೆಟ್‌ಫ್ಲಿಕ್ಸ್ 300 ಕೋಟಿ?

ಈ ಹಿಂದೆ ನೆಟ್‌ಫ್ಲಿಕ್ಸ್ ಒಟಿಟಿ ವೇದಿಕೆ ರಾಧೆ ಶ್ಯಾಮ್ ಚಿತ್ರಕ್ಕೆ 300 ಕೋಟಿ ನೀಡಲು ಮುಂದಾಗಿತ್ತು. ಆ ಸಂದರ್ಭದಲ್ಲೂ ಯುವಿ ಕ್ರಿಯೇಷನ್ಸ್ ಹಿಂದೆ ಸರಿಯಿತು. ಈಗ ಅಮೇಜಾನ್ 400 ಕೋಟಿ ಆಫರ್ ತಂದಿದೆ. ಈಗಲೂ ನಿರ್ಮಾಪಕರು ನೋ ಎನ್ನುತ್ತಿದ್ದಾರೆ.