ಡಾನ್ಸ್​ ರಿಯಾಲಿಟಿ ಶೋಗೆ ಜಡ್ಜ್​ ಆದ ಶಿವಗಾಮಿ

ದಕ್ಷಿಣ ಭಾರತದ ಸ್ಟಾರ್ ಹಿರಿಯ ನಟಿ​ ರಮ್ಯ ಕೃಷ್ಣ ತಮ್ಮ ಅಭಿಮಾನಿಗಳಿಗೆ ಗುಡ್​ನ್ಯೂಸ್​ ನೀಡಿದ್ದು, ಮತ್ತೆ ಅವರು ತೆರೆ ಮೇಲೆ ಕಾಣಲು ಸಜ್ಜಾಗಿದ್ದಾರೆ. ರಾಜ್​ಮೌಳಿ ನಿರ್ದೇಶನದ ಬಾಹುಬಲಿ ಚಿತ್ರದ ಬಳಿಕ ಕಿರು ತೆರೆ ಹಾಗೂ ಹಿರಿ ತೆರೆಯಿಂದ ಅಂತರ ಕಾಯ್ದುಕೊಂಡಿದ್ದ ರಮ್ಯಾ ಕೃಷ್ಣ ಇದೀಗ ಮತ್ತೆ ಮುಖ್ಯಭೂಮಿಕೆಗೆ ಬಂದಿದ್ದಾರೆ.

ತೆಲುಗಿನ ಆಹಾ ಓಟಿಟಿಯಲ್ಲಿ ಪ್ರಸಾರವಾಗುತ್ತಿರುವ ಜನಪ್ರಿಯ ಶೋವೊಂದಕ್ಕೆ ರಮ್ಯಾ ಕೃಷ್ಣ ಜಡ್ಜ್​ ಆಗಿ ವೇದಿಕೆ ಹಂಚಿಕೊಳ್ಳುತ್ತಿದ್ದಾರೆ. ಕೇವಲ ನಟನೆಯಷ್ಟೇ ಅಲ್ಲದೇ ಡಾನ್ಸ್​ನಲ್ಲೂ ಪರಿಣಿತಿ ಹೊಂದಿರುವ ರಮ್ಯಾ ಕೃಷ್ಣ ಅವರನ್ನು ರಿಯಾಲಿಟಿ ಶೋ ತಂಡ ಜಡ್ಜ್​ ಆಗಿ ಆಯ್ಕೆ ಮಾಡಿದ್ದಾರೆ.

ತೆಲುಗಿನಲ್ಲಿ ಬಹಳಷ್ಟು ಜನಪ್ರಿಯತೆ ಪಡೆದಿರುವ ಡಾನ್ಸ್​ ಐಕಾನ್​ ಶೋಗಾಗಿ ಇಬ್ಬರು ಜನ ತೀರ್ಪುಗಾರರನ್ನು ಆಯ್ಕೆ ಮಾಡಲಾಗಿದ್ದು, ದಕ್ಷಿಣ ಭಾರತದ ಲೇಡಿ ಸೂಪರ್​ ರಮ್ಯಾ ಕೃಷ್ಣ ಅವರೊಂದಿಗೆ, ಕಿಂಗ್​ ಆಫ್​ ದಿ ಹುಕ್​ ಸ್ಟೆಪ್​ ಮಾಸ್ಟರ್​ ಶೇಖರ್​ ವೇದಿಕೆ ಹಂಚಿಕೊಳ್ಳುತ್ತಿದ್ದಾರೆ.

ಇನ್ನು ತಾವು ಡಾನ್ಸ್​ ಐಕಾನ್​ ಕಾರ್ಯಕ್ರಮದ ತೀರ್ಪುಗಾರರಾಗಿ ಆಯ್ಕೆಯಾಗಿರುವುದಕ್ಕೆ ರಮ್ಯಾ ಕೃಷ್ಣ ಕೂಡ ಖುಷಿ ವ್ಯಕ್ತಪಡಿಸಿದ್ದು, ಇಂತಹ ಅವಕಾಶ ನೀಡಿದ ಕಾರ್ಯಕ್ರಮದ ಆಯೋಜಕರಿಗೆ ಧನ್ಯವಾದ ತಿಳಿಸಿದ್ದಾರೆ. ಡಾನ್ಸ್​ ಐಕಾನ್​ ಮೂಲಕ ನಾನು ಓಟಿಟಿಗೆ ಮೊದಲ ಬಾರಿಗೆ ಪದಾರ್ಪಣೆ ಮಾಡುತ್ತಿದ್ದೇನೆ. ಈ ಕಾರ್ಯಕ್ರಮದ ಬಗ್ಗೆ ನಾನು ಉತ್ಸುಕಳಾಗಿದ್ದೇನೆ. ಮೊದಲ ಬಾರಿಗೆ ತೀರ್ಪು ನೀಡುವ ಅವಕಾಶ ಸಿಕ್ಕಿದೆ. ಈವರೆಗೂ ನಾನು ವಿವಿಧ ರೀತಿಯ ಪಾತ್ರಗಳನ್ನು ಮಾಡಿ ಅಭಿಮಾನಿಗಳನ್ನು ರಂಜಿಸಿದ್ದೇನೆ. ಇದೀಗ ವೀಕೆಂಡ್​ ದಿನಗಳಲ್ಲಿ ಓಟಿಟಿಯಲ್ಲಿ ಅವರು ನನ್ನನ್ನು ನೋಡಬಹುದು. ಈ ಕಾರ್ಯಕ್ರಮದ ಮೂಲಕ ಶ್ರೇಷ್ಠ ನೃತ್ಯ ತಾರೆಗಳನ್ನು ನಾನು ಭೇಟಿಯಾಗಬಹುದು ಎಂದು ರಮ್ಯಾ ಕೃಷ್ಣ ಖುಷಿ ಹಂಚಿಕೊಂಡಿದ್ದಾರೆ.

ಇನ್ನು ಕಾರ್ಯಕ್ರಮದ ಆಯೋಜಕರು ಕೂಡ ಮಾತನಾಡಿದ್ದು, ಡಾನ್ಸ್​ ಐಕಾನ್ ​ ಕಾರ್ಯಕ್ರಮಕ್ಕೆ ದಕ್ಷಿಣ ಭಾರತದ ಲೇಡಿ ಸೂಪರ್​ ಸ್ಟಾರ್​ ರಮ್ಯಾ ಕೃಷ್ಟ ಅವರನ್ನು ಆಯ್ಕೆ ಮಾಡಿದ್ದೇವೆ. ರಮ್ಯಾ ಕೃಷ್ಣ ಅವರ ಚಾರ್ಮಿಂಗ್​, ಆ್ಯಕ್ಟೀವ್​ನೆಸ್ ​ ಎಲ್ಲರಿಗೂ ಸ್ಫೂರ್ತಿ. ಅವರ ವೃತ್ತಿ ಜೀವನದ ಏರಿಳಿತಗಳನ್ನು ನೋಡಿ ಯುವ ಜನತೆ ಕಲಿಯುವ ಅಂಶ ಬಹಳಷ್ಟಿದೆ ಎಂದರು. ಇನ್ನು ಡಾನ್ಸ್​ ಐಕಾನ್​ ಶೋ ಶನಿವಾರ ಹಾಗೂ ಭಾನುವಾರ ಆಹಾ ಓಟಿಟಿಯಲ್ಲಿ ಪ್ರಸಾರವಾಗಲಿದೆ.