ನೆಟ್‌ಫ್ಲಿಕ್ಸ್‌ನಲ್ಲಿ 'ಕಾಂತಾರ' ಇಂಗ್ಲೀಷ್ ವರ್ಷನ್: ತುಳು ವರ್ಷನ್ ಎಲ್ಲಿ? ಯಾವಾಗ?

ಮಾ. 1ಕ್ಕೆ ಓಟಿಟಿಗೆ ಇಂಗ್ಲೀಷ್‌ ವರ್ಷನ್

ಹೌದು 'ಕಾಂತಾರ' ಸಿನಿಮಾ 5 ಭಾಷೆಗಳಲ್ಲಿ ಮಾತ್ರವಲ್ಲ 7 ಭಾಷೆಗಳಿಗೆ ಡಬ್ ಆಗಿದೆ. 6 ಭಾಷೆಗಳಲ್ಲಿ ಪ್ರೇಕ್ಷಕರ ಮುಂದೆ ಬಂದಿದೆ. ಇನ್ನು ಇಂಗ್ಲೀಷ್‌ ಭಾಷೆಗೆ ಡಬ್ ಮಾಡುವ ಕೆಲಸಗಳು ಭರದಿಂದ ಸಾಗುತ್ತಿದ್ದು ಮಾರ್ಚ್ 1ಕ್ಕೆ ನೆಟ್‌ಫ್ಲಿಕ್ಸ್‌ನಲ್ಲಿ ಸಿನಿಮಾ ಸ್ಟ್ರೀಮಿಂಗ್ ಆಗಲಿದೆ. ಕನ್ನಡದ ಸಿನಿಮಾವೊಂದು ಇಂಗ್ಲೀಷ್‌ ಭಾಷೆಗೆ ಡಬ್ ಆಗುವುದು ಬಹಳ ವಿರಳ. ಆದರೆ 'ಕಾಂತಾರ' ಆ ಮೂಲಕ ಹೊಸ ಮೈಲಿಗಲ್ಲು ಸ್ಥಾಪಿಸುತ್ತಿದೆ. ಇಂಗ್ಲೀಷ್‌ಗೆ ಡಬ್‌ ಆಗಿ ವಿದೇಶಗಳಲ್ಲಿ ಸದ್ದು ಮಾಡಲು ಹೊರಟಿದೆ.

ಸಿಂಪ್ಲಿ ಸೌತ್‌ನಲ್ಲಿ ತುಳು ವರ್ಷನ್

ಹೇಳಿ ಕೇಳಿ 'ಕಾಂತಾರ' ತುಳುನಾಡಿನ ಕಥೆ. ಚಿತ್ರದಲ್ಲಿ ಒಂದಷ್ಟು ತುಳು ಪದಗಳನ್ನು ಕೂಡ ಬಳಸಿಕೊಳ್ಳಲಾಗಿದೆ. ಈ ಸಿನಿಮಾ ರಿಲೀಸ್ ಆಗಿ ಥಿಯೇಟರ್‌ಗಳಲ್ಲಿ ಸದ್ದು ಮಾಡಲು ಆರಂಭಿಸುತ್ತಿದ್ದಂತೆ ತುಳು ಭಾಷೆಗೂ ಡಬ್ ಮಾಡಿ ರಿಲೀಸ್ ಮಾಡುವಂತೆ ಕೆಲವರು ಕೇಳಿದ್ದರು. ನಿರ್ಮಾಪಕರಾದ ವಿಜಯ್ ಕಿರಗಂದೂರ್ ಕೂಡ ಬಹಳ ಮುತುವರ್ಜಿ ವಹಿಸಿ ಚಿತ್ರವನ್ನು ತುಳು ಡಬ್ ಮಾಡಿಸಿ ಥಿಯೇಟರ್‌ಗಳಲ್ಲಿ ರಿಲೀಸ್ ಮಾಡಿಸಿದ್ದರು. ಅಂದಹಾಗೆ 'ಸಿಂಪ್ಲಿ ಸೌತ್‌' ಡಿಜಿಟಲ್ ಫ್ಲಾಟ್‌ಫಾರ್ಮ್‌ನಲ್ಲಿ ಭಾರತ ಬಿಟ್ಟು ಹೊರ ದೇಶಗಳಲ್ಲಿ ತುಳು ವರ್ಷನ್ ಸ್ಟ್ರೀಮಿಂಗ್ ಆಗಲಿದೆ.

'ಕಾಂತಾರ' ಪ್ರೀಕ್ವೆಲ್‌ಗಾಗಿ ಕಸರತ್ತು

ಸಾಮಾನ್ಯವಾಗಿ ಸರಣಿ ಸಿನಿಮಾ ಅಂದಾಗ ಕಥೆಯನ್ನು ಮುಂದುವರೆಸುತ್ತಾರೆ. ಆದರೆ ಮುಂದಿನ ಸಿನಿಮಾದಲ್ಲಿ 'ಕಾಂತಾರ' ಕಥೆ ಹಿಂದಕ್ಕೆ ಹೋಗಲಿದೆ. ಹೌದು ಇತ್ತೀಚೆಗೆ 'ಕಾಂತಾರ' ಶತದಿನೋತ್ಸವ ವೇದಿಕೆಯಲ್ಲಿ ಮಾತನಾಡಿದ ರಿಷಬ್ ಶೆಟ್ಟಿ ನೀವು ನೋಡಿರುವುದು ಕಾಂತಾರ ಭಾಗ-2, ಮುಂದೆ ಬರೋದು 'ಕಾಂತಾರ' ಭಾಗ- 1 ಎಂದಿದ್ದಾರೆ. ಇದನ್ನು ಕೇಳಿ ಕೆಲವರು ಥ್ರಿಲ್ಲಾಗಿದ್ದಾರೆ. ಕಾಡುಬೆಟ್ಟು ಶಿವನ ತಂದೆ ಕಥೆಯನ್ನು ನೋಡಲು ಕಾಯುತ್ತಿದ್ದಾರೆ.

400 ಕೋಟಿ ಬಾಚಿದ್ದ ಸಿನಿಮಾ

ಸೆಪ್ಟೆಂಬರ್ 30ಕ್ಕೆ ಕನ್ನಡದಲ್ಲಿ ತೆರೆಗಪ್ಪಳಿಸಿದ 'ಕಾಂತಾರ' ಮುಂದೆ ನೋಡ ನೋಡುತ್ತಲೇ ಪ್ಯಾನ್ ಇಂಡಿಯಾ ಸಿನಿಮಾ ಆಗಿತ್ತು. ಬರೋಬ್ಬರಿ 400 ಕೋಟಿಗೂ ಅಧಿಕ ಕಲೆಕ್ಷನ್ ಮಾಡಿದ ದಾಖಲೆ ಬರೀತು. ಒಂದರ್ಥದಲ್ಲಿ 'KGF - 2' ಚಿತ್ರವನ್ನು ಮೀರಿಸಿ ಸೆನ್ಸೇಷನ್ ಕ್ರಿಯೇಟ್ ಮಾಡಿತ್ತು. ಪರಭಾಷಿಕರು ಕೂಡ ಸಿನಿಮಾ ನೋಡಿ ಕೊಂಡಾಡಿದರು. ವಿದೇಶದಲ್ಲಿ ಜನ ಟಿಕೆಟ್‌ಗಾಗಿ ಕ್ಯೂ ನಿಂತ ಪ್ರಸಂಗವೂ ನಡೆಯಿತು.