ಪಾಸಿಟಿವ್ವೊ ನೆಗೆಟಿವ್ವೊ, ಎಲ್ಲರ ಕಣ್ಣು, ಕೆಂಗಣ್ಣು ಸೋನು ಮೇಲೆ!

ಇಬ್ಬರು ಸ್ಪರ್ಧಿಗಳ ಎಂಟ್ರಿಗೆ ಆಕ್ರೋಶ

ಬಿಗ್‌ಬಾಸ್‌ ಓಟಿಟಿ ಮನೆಗೆ ಮೊದಲ ಇಬ್ಬರು ಸ್ಪರ್ಧಿಗಳಾಗಿ ಸಂಖ್ಯಾಶಾಸ್ತ್ರಜ್ಞ ಆರ್ಯವರ್ಧನ್ ಗುರೂಜಿ ಹಾಗೂ ಸೋನು ಶ್ರೀನಿವಾಸ್ ಗೌಡ ಎಂಟ್ರಿ ಕೊಟ್ಟಿದ್ದಾರೆ. ಆದರೆ ಇವರಿಬ್ಬರ ಬಗ್ಗೆಯೂ ಸೋಷಿಯಲ್ ಮೀಡಿಯಾದಲ್ಲಿ ಅಸಮಾಧಾನ ವ್ಯಕ್ತವಾಗ್ತಿದೆ. ಕಿಚ್ಚನನ್ನು ಸೇರಿದಂತೆ ಶೋ ಆಯೋಜಕರನ್ನು ನೆಟ್ಟಿಗರು ತರಾಟೆಗೆ ತೆಗೆದುಕೊಂಡಿದ್ದಾರೆ. ಅಶ್ಲೀಲವಾಗಿ ಕಾಣಿಸಿಕೊಳ್ಳುವ ಸೋನು ಅನ್ನು ಬಿಗ್‌ಬಾಸ್ ಮನೆಗೆ ಕಳುಹಿಸಿ, ಶೋ ಜನಪ್ರಿಯತೆ ಹಾಳು ಮಾಡಿದ್ದೀರಿ ಎಂದು ಕಾಮೆಂಟ್‌ಗಳ ಸುರಿಮಳೆಗೈಯ್ಯುತ್ತಿದ್ದಾರೆ.

ಆಸ್ಟ್ರೇಲಿಯಾಗೆ ಹೋಗ್ಬೇಕಂತೆ ಸೋನು

ವೇದಿಕೆಯಲ್ಲಿ ಪ್ಲೇ ಆದ ವಿಟಿಯಲ್ಲಿ ಸೋನು ಆಡಿರುವ ಮಾತುಗಳ ಕೆಲವರಿಗೆ ಅಸಮಾಧಾನ ತಂದಿದೆ. "ನನಗೆ ಭಾರತದಲ್ಲಿ ಇರಲು ಇಷ್ಟವಿಲ್ಲವಂತೆ, ಇಲ್ಲಿ ಫ್ಯಾನ್ಸ್ ಕಿರಿಕಿರಿ ಜಾಸ್ತಿ, ಆರಾಮಾಗಿ ರಸ್ತೆಯಲ್ಲಿ ನಡೆದುಕೊಂಡ ಹೋಗುವುದಕ್ಕೂ ಭಯ. ಅಂಗಡಿಗೆ ಹೋಗಿ ಗೋಲ್ಗೊಪ್ಪಾ ತಿನ್ನೋದಕ್ಕೂ ಆಗ್ತಿಲ್ಲ. ಅದನ್ನು ವಿಡಿಯೋ ಮಾಡಿ ಟ್ರೋಲ್ ಮಾಡಿಬಿಡ್ತಾರೆ. ಇಲ್ಲಿ ನನಗಿಷ್ಟ ಬಂದಂತೆ ಇರಲು ಫ್ರೀಡಂ ಇಲ್ಲ, ಆಸ್ಟ್ರೇಲಿಯಾಗೆ ಹೋಗಿ ಸೆಟಲ್ ಆಗ್ತೀನಿ' ಎಂದಿದ್ದಾರೆ. ಇದನ್ನೇ ಸುದೀಪ್ ಎದುರು ಪುನರುಚ್ಛರಿಸಿದ್ದಾರೆ.

ಸ್ಮೋಕಿಂಗ್ ಮಾಡ್ತೀನಿ

ಇನ್ನು ವಾಯ್ಸ್‌ ಬಗ್ಗೆ ಬಿಗ್‌ಬಾಸ್ ಮನೆಯಲ್ಲಿ ಮತ್ತೊಬ್ಬ ಸ್ಪರ್ಧಿ ರೂಪೇಶ್ ಶೆಟ್ಟಿ ಜೊತೆ ಮಾತುಕತೆ ನಡೀತು. ಈ ವೇಳೆ ನಾನು ಸ್ಮೋಕ್ ಮಾಡ್ತೀನಿ ಎಂದು ಸೋನು ಬೋಲ್ಡ್ ಆಗಿ ಹೇಳಿದ್ದಾರೆ. ರೂಪೇಶ್ ನಾನು ಸ್ಮೋಕ್ ಮಾಡುವುದಿಲ್ಲ ಎಂದಿದ್ದು, ಇದಕ್ಕೆ ಪ್ರತಿಕ್ರಿಯಿಸಿದ ಸೋನುಗೌಡ, ನೀವು ಸ್ಮೋಕ್, ಡ್ರಿಂಗ್ಸ್ ಏನು ಮಾಡುವುದಿಲ್ವಾ ಅದಕ್ಕೆ ಇಷ್ಟು ಗಟ್ಟಿಯಾಗಿದ್ದೀರಿ, ನಾನು ಸ್ಮೋಕ್ ಮಾಡುತ್ತೇನೆ ಎಂದರು. ಇದಕ್ಕೆ ರೂಪೇಶ್ ಅಚ್ಚರಿ ವ್ಯಕ್ತಪಡಿಸಿದ್ದರು. ಅದರಲ್ಲೇನು ತಪ್ಪು ಅನ್ನುವ ರೀತಿ ಸೋನು ತಿರುಗಿ ಪ್ರಶ್ನಿಸಿದ್ದಾರೆ.

ಬೆತ್ತಲೆ ವಿಡಿಯೋ ಬಗ್ಗೆ ಏನಂದ್ರು?

ಕೆಲ ದಿನಗಳ ಹಿಂದೆ ಸೋಶಿಯಲ್ ಮೀಡಿಯಾದಲ್ಲಿ ಸೋನು ಬೆತ್ತಲೆ ವಿಡಿಯೋ ಸಹ ಲೀಕ್ ಆಗಿ ವೈರಲ್ಲಾಗಿತ್ತು. ಈ ಬಗ್ಗೆ ಮಾತನಾಡಿರುವ ಸೋನು ವೈರಲ್ ಆಗಿರುವ ವಿಡಿಯೋದಲ್ಲಿ ನನ್ನ ತಪ್ಪಿಲ್ಲ ಎಂದಿದ್ದಾರೆ. ಇನ್ನು ಸೋನು ಗೌಡ ಪರವಾಗಿಯೂ ಕೆಲವರು ಸೋಷಿಯಲ್ ಮೀಡಿಯಾದಲ್ಲಿ ಮಾತನಾಡುತ್ತಿದ್ದಾರೆ.