ಓಟಿಟಿಗೆ ಬಂತು ವಿವಾದಾತ್ಮಕ 'ದಿ ಕೇರಳ ಸ್ಟೋರಿ 2' ; ಎಲ್ಲಿ ನೋಡಬಹುದು ? ಇಲ್ಲಿದೆ ಮಾಹಿತಿ

ಕನ್ನಡ ಚಿತ್ರರಂಗವನ್ನು ಹೊರತು ಪಡಿಸಿದರೆ ಅಕ್ಕ-ಪಕ್ಕದ ರಾಜ್ಯಗಳಲ್ಲಿನ ಚಿತ್ರರಂಗದವರಿಗೆ ಸದ್ಯ ಸಿಕ್ವೆಲ್ ಜ್ವರ ಹಿಡಿದಿದೆ. ನಿಜಾ.. ನಮ್ಮಲ್ಲಿ ಕೂಡ ಈ ಟ್ರೆಂಡ್ ಇದೆ. ಆದರೆ.. ಅನ್ಯ ಭಾಷೆಯವರಿಗೆ ಹೋಲಿಸಿದರೆ ಪ್ರಯತ್ನಗಳು ನಡೆಯುತ್ತಿರುವುದು ಕಡಿಮೆ.

ಬೇರೆ ಭಾಷೆಗಳಲ್ಲಿ ಹಳೆಯ ಗೆಲುವನ್ನೇ ಟ್ರಂಪ್ ಕಾರ್ಡ್‌ ಆಗಿ ಉಪಯೋಗಿಸಿಕೊಂಡು ಹಲವರು ಇಲ್ಲಿ ದುಡ್ಡು ಬಾಚಿಕೊಳ್ಳುವ ಪ್ರಯತ್ನವನ್ನು ಮಾಡುತ್ತಿದ್ದಾರೆ. ಯಾರನ್ನೇ ಕೇಳಿ ಎಲ್ಲರಲ್ಲಿಯೂ ತಮ್ಮದೇ ಆದ ಯೂನಿವರ್ಸ್‌ ರೆಡಿಯಾಗಿರುತ್ತೆ. ಆ ಪೈಕಿ ''ದಿ ಕೇರಳ ಸ್ಟೋರಿ'' ಕೂಡ ಒಂದು.

ಹೌದು, 2023ರಲ್ಲಿ ಬಂದ ''ದಿ ಕೇರಳ ಸ್ಟೋರಿ'' ಬಾಕ್ಸಾಫೀಸ್‌ ಕೊಳ್ಳೆ ಹೊಡೆದಿತ್ತು. ಬಾಕ್ಸಾಫೀಸ್‌ನ ಅಂಕಿ ಅಂಶ ಹಂಚಿಕೊಳ್ಳುವ ''ಸ್ಯಾಕ್ನಿಲ್'' ಪ್ರಕಾರ 300 ಕೋಟಿ + ಹಣ ದೋಚಿತ್ತು. ಚಿತ್ರಕ್ಕೆ ಸಿಕ್ಕ ಈ ಅಭೂತಪೂರ್ವ ಪ್ರತಿಕ್ರಿಯೆ ''ದಿ ಕೇರಳ ಸ್ಟೋರಿ'' ಫ್ರಾಂಚೈಸಿಯ ಉಗಮಕ್ಕೂ ಕಾರಣವಾಯ್ತು. ಆ ನಂತರ ಬಂದಿದ್ದೇ '' ದಿ ಕೇರಳ ಸ್ಟೋರಿ 2- ಗೋಸ್ ಬಿಯಾಂಡ್''.

ಈ ವರ್ಷದ ಆರಂಭದಲ್ಲಿ ಅಂದರೆ ಫೆಬ್ರವರಿ 27ರಂದು ತೆರೆಗೆ ಬಂದ '' ದಿ ಕೇರಳ ಸ್ಟೋರಿ 2- ಗೋಸ್ ಬಿಯಾಂಡ್'' ಚಿತ್ರದ ಮೇಲೆಯೂ ಕೂಡ ವಿವಾದದ ನೆರಳು ಬಿದ್ದಿತ್ತು. ಪ್ರೊಪಗಂಡಾ ಸಿನಿಮಾ ಎಂದು ಒಂದು ವರ್ಗ ಕರೆಯಿತು. ಆದರೆ, ಬಾಕ್ಸಾಫೀಸ್‌ನಲ್ಲಿ ಇದರ ಪರಿಣಾಮವೇನು ಆಗಲಿಲ್ಲ.

ಬದಲಿಗೆ ಚಿತ್ರಕ್ಕೆ ಇನ್ನೂ ಹೆಚ್ಚಿನ ಪ್ರಚಾರ ಸಿಕ್ಕಿತ್ತು. ಇದರ ಪರಿಣಾಮ ₹25-30 ಕೋಟಿ ವೆಚ್ಚದಲ್ಲಿ ನಿರ್ಮಾಣವಾದ '' ದಿ ಕೇರಳ ಸ್ಟೋರಿ 2- ಗೋಸ್ ಬಿಯಾಂಡ್'' 60 ಕೋಟಿಯನ್ನು ಗಳಿಸಿತು. ಸದ್ಯ ಈ ಚಿತ್ರ ಬಿಡುಗಡೆಯಾಗಿ 57 ದಿನಗಳಾಗಿವೆ. ಓಟಿಟಿಯಲ್ಲಿ ಈ ಚಿತ್ರದ ಪ್ರಸಾರಕ್ಕೆ ಮುಹೂರ್ತ ನಿಗದಿ ಮಾಡಲಾಗಿದೆ.

ಹೌದು, ಸಾಮಾನ್ಯವಾಗಿ ಬದಲಾದ ಈ ಕಾಲದಲ್ಲಿ ಚಿತ್ರವೊಂದು ಚಿತ್ರಮಂದಿರಕ್ಕೆ ಬಂದು ನಾಲ್ಕು ವಾರ ಕಳೆದಿರುವುದಿಲ್ಲ. ಆದರೆ ಅಷ್ಟರಲ್ಲಿಯೇ ಚಿತ್ರ ಓಟಿಟಿಯ ಅಂಗಳಕ್ಕೆ ಬಂದು ಬಿಡುತ್ತೆ. '' ದಿ ಕೇರಳ ಸ್ಟೋರಿ 2 -ಗೋಸ್ ಬಿಯಾಂಡ್'' ಕೂಡ ಬಂದಿದೆ. ಆದರೆ ನಾಲ್ಕು ವಾರಕ್ಕೆ ಅಲ್ಲ ಬದಲಿಗೆ 62 ದಿನಗಳ ನಂತರ ಅನ್ನೋದು ವಿಶೇಷ. ಚಿತ್ರ ಇದೇ ಮೇ 1ರಿಂದ ಓಟಿಟಿಯಲ್ಲಿ ಪ್ರಸಾರವಾಗಲಿದೆ.

ತಾರಾಬಳಗ

ಉಲ್ಕಾ ಗುಪ್ತಾ, ಅದಿತಿ ಭಾಟಿಯಾ, ಐಶ್ವರ್ಯ ಓಜಾ, ಸುಮಿತ್ ಗಹ್ಲಾವತ್, ಅರ್ಜುನ್ ಸಿಂಗ್ ಔಜ್ಲಾ, ಯುಕ್ತಮ್ ಖೋಸ್ಲಾ, ಅಲ್ಕಾ ಅಮೀನ್, ಮುಂತಾದವರು

ನಿರ್ದೇಶನ - ಕಾಮಾಖ್ಯ ನಾರಾಯಣ್ ಸಿಂಗ್

ಕಥೆ : ವಿಪುಲ್ ಅಮೃತಲಾಲ್ ಶಾ ಮತ್ತು ಅಮರನಾಥ್ ಝಾ

ನಿರ್ಮಾಣ: ವಿಪುಲ್ ಅಮೃತಲಾಲ್ ಶಾ

ಛಾಯಾಗ್ರಹಣ :ಅಭಿಜೀತ್ ಚೌಧರಿ

ಸಂಕಲನ : ಸಂಜಯ್ ಶರ್ಮಾ

ಹಿನ್ನೆಲೆ ಸಂಗೀತ : ಮನ್ನನ್ ಶಾ

ಸಂಗೀತ : ಮನ್ನನ್ ಶಾ ಮತ್ತು ರಾಹುಲ್ ಸುಹಾಸ್

ಎಲ್ಲಿ ನೋಡಬಹುದು ?

ಬಾಕ್ಸಾಫೀಸ್‌ನಲ್ಲಿ ಭರ್ಜರಿ ಪ್ರದರ್ಶನ ಕಂಡಿರುವ ''ದಿ ಕೇರಳ ಸ್ಟೋರಿ 2-ಗೋಸ್ ಬಿಯಾಂಡ್'' ಇದೇ ಮೇ 1ರಿಂದ ಜೀ5ನಲ್ಲಿ ಪ್ರಸಾರವಾಗಲಿದೆ. ಚಿತ್ರದ ಅವಧಿ 2 ಗಂಟೆ 11 ನಿಮಿಷಗಳಿದ್ದು ಹಿಂದಿ ಭಾಷೆಯಲ್ಲಿ ನೋಡುವ ಅವಕಾಶ ಇದೆ. ಬೇರೆ ಭಾಷೆಗಳಿಗೆ ಡಬ್ ಮಾಡಲಾಗಿದೆಯಾ..? ಎನ್ನುವುದಕ್ಕೆ ಉತ್ತರ ಸದ್ಯಕ್ಕಿಲ್ಲ.

ಒಟ್ನಲ್ಲಿ ಸದ್ಯ ''ದಿ ಕೇರಳ ಸ್ಟೋರಿ 2-ಗೋಸ್ ಬಿಯಾಂಡ್'' ಓಟಿಟಿ ಅಂಗಳಕ್ಕೆ ಬರುತ್ತಿದ್ದು, ಚಿತ್ರಮಂದಿರದಲ್ಲಿ ವಿವಾದದ ಕಿಡಿ ಹೊತ್ತಿಸಿದ್ದ ಈ ಚಿತ್ರ ಸೋಶಿಯಲ್ ಮೀಡಿಯಾದಲ್ಲಿ ಈಗ ಮತ್ತೊಮ್ಮೆ ಚರ್ಚೆಗೆ ನಾಂದಿ ಹಾಡಲಿದೆ. ಓಟಿಟಿಯಲ್ಲಿ ಈ ಚಿತ್ರವನ್ನು ನೋಡಿದವರ ಪ್ರತಿಕ್ರಿಯೆ ಹೇಗಿರುತ್ತೆ ಎನ್ನುವುದನ್ನು ಕಾದು ನೋಡಬೇಕಿದೆ.