For Quick Alerts
    ALLOW NOTIFICATIONS  
    For Daily Alerts

    ಏ ಮಚ್ಚಾ ಶಿವಮಣಿ ಜೋಶ್ ಸೂಪರ್ ಮಗಾ!

    By * ಪ್ರಸಾದ ನಾಯಿಕ
    |

    A still from Josh
    ಕೊನೆ ದೃಶ್ಯ : ವಿವಿಧ ಕ್ಷೇತ್ರಗಳಲ್ಲಿ ಅಪ್ರತಿಮ ಸಾಧನೆಗೈದ ಏಳು ಜನ ಹಳೆಯ ವಿದ್ಯಾರ್ಥಿಗಳನ್ನು ಕರೆಸಿ ಅವರು ಕಲಿತ ಕಾಲೇಜಿನಲ್ಲಿ ಸನ್ಮಾನ ಮಾಡುವ ಸಮಾರಂಭ. ಉಳಿದ ವಿದ್ಯಾರ್ಥಿಗಳೆಲ್ಲ ಅವರಿಂದ ಪ್ರೇರಿತರಾಗಿ ಸರಿಯಾದ ಮಾರ್ಗದಲ್ಲಿ ಜೀವನ ರೂಪಿಸಿಕೊಳ್ಳಬೇಕೆಂಬುದು ಸನ್ಮಾನದ ಆಶಯ. ಅವರೆಲ್ಲ ತಮ್ಮ ಅನುಭವ ಹಂಚಿಕೊಂಡ ಮೇಲೆ ಕೊನೆಗೆ ಆಹ್ವಾನಿತನಾಗಿರದ ಹಳೆಯ ವಿದ್ಯಾರ್ಥಿಯೊಬ್ಬ ವೇದಿಕೆಯನ್ನೇರುತ್ತಾನೆ. 'ವಿದ್ಯಾರ್ಥಿಗಳು ಓದುವಾಗ ಓದಬೇಕು, ತಂದೆ-ತಾಯಿ ಹೇಳಿದ ಮಾತು ಕೇಳಿ ಸರಿಮಾರ್ಗದಲ್ಲಿ ನಡೆಯಬೇಕು. ಓದುವಾಗ ಪ್ರೀತಿಯ ಹುಚ್ಚಿಗೆ ಬಿದ್ದರೆ ನನ್ನಂತಾಗುತ್ತೀರಾ, ಯಾರೂ ನನ್ನಂತಾಗಬೇಡಿ' ಅನ್ನುತ್ತ ಗದ್ಗದಿತನಾಗುತ್ತಾನೆ. ಈ ದೃಶ್ಯ ನೋಡುತ್ತಿದ್ದಂತೆ ಪ್ರೇಕ್ಷಕರ ಕೊರಳುಗಳ ನರಗಳುಬ್ಬಿ ಕಣ್ಣಂಚಿನಲ್ಲಿ ಫಳ್ ಅಂತ ನೀರು ಜಿನುಗದಿದ್ದರೆ ಕೇಳಿ.

    ಹುಚ್ಚು ಹರೆಯದ ಹದಿನಾರರ ವಯಸು ಹುಡುಗಾಟವಾಡುತ್ತ ಪ್ರೀತಿ, ಪ್ರೇಮ, ಕಾಮಗಳಲ್ಲಿ ಕಳೆದುಹೋಗದೆ ಯುವಕರ ಮುಂದಿನ ಜೀವನದ ದಾರಿದೀಪವಾಗಲಿ ಎಂಬ ಸಂದೇಶವನ್ನು 'ಗುರು' ಸ್ಥಾನದಲ್ಲಿ ನಿಂತು ನಿರ್ದೇಶಕ ಶಿವಮಣಿ 'ಜೋಶ್' ಚಿತ್ರದ ಮುಖಾಂತರ ಹೇಳಿದ್ದಾರೆ. ವಿದ್ಯಾರ್ಥಿಗಳಿಗೆ ಮಾತ್ರವಲ್ಲ ತಂದೆ ತಾಯಿಯರು ಮಕ್ಕಳನ್ನು ಹೇಗೆ ಬೆಳಸಬೇಕು, ಯಾವ ರೀತಿ ಇರಬಾರದು ಎಂದು ಹೇಳುತ್ತ ಹಿರಿಯರಿಗೂ ಪಾಠ ಕಲಿಸಿದ್ದಾರೆ. ಸಿನೆಮಾದಂಥ ಪ್ರಭಾವಿ ಮಾಧ್ಯಮದ ಮುಖಾಂತರ ಅತ್ಯಂತ ಪರಿಣಾಮಕಾರಿಯಾಗಿ ಹದಿಹರೆಯದವರ ತುಮುಲ, ಹಸಿ ಪ್ರೇಮ ಮತ್ತು ಅದರ ಪರಿಣಾಮಗಳನ್ನು ಬಿಚ್ಚಿಟ್ಟಿದ್ದಾರೆ. ಶಿವಮಣಿ ಗೆದ್ದಿದ್ದಾರೆ!

    ಇನ್ನೂ ಚಿಗುರು ಮೀಸೆ ಮೂಡದ, ತುಂಡುಲಂಗದಿಂದ ಇನ್ನೂ ಆಚೆಗೆ ಬಾರದಿರದ ತಾಜಾ ತಾಜಾ ಯುವಕ, ಯುವತಿಯನ್ನು ಹುಡುಕಾಡಿ ಗುಡ್ಡೆ ಹಾಕಿಕೊಂಡು ಪ್ರೀತಿ, ಪ್ರೇಮದ ಹುಡುಕಾಟದ ಚಿತ್ರವನ್ನು ತೆಗೆಯುವುದು ಹುಡುಗಾಟದ ಮಾತಲ್ಲ. ಲೈವ್ ವೈರ್ ನಂತಿರುವ ಅಪ್ಪಟ ಕನ್ನಡದ ಪ್ರತಿಭೆಗಳನ್ನು ಸೇರಿಸಿಕೊಂಡು, ತಿದ್ದಿ ತೀಡಿದ ಚಂದನದ ಗೊಂಬೆಯಂತೆ ಅವರಲ್ಲಿ ಅಭಿನಯದ ಗಂಧವನ್ನು, ಕಂಪನ್ನು ಶಿವಮಣಿ ಹೊರತೆಗೆದಿದ್ದಾರೆ. ಹದಿಹರೆಯದ ಪ್ರೀತಿಯನ್ನು ಯಾವುದೇ ಅಶ್ಲೀಲತೆಯ ಸೋಂಕಿಲ್ಲದೆ ನಿರೂಪಿಸಿದ್ದಾರೆ.

    ರಾಕೇಶ್, ವಿಷ್ಣು ಪ್ರಸನ್ನ, ಅಕ್ಷಯ್, ಅಲೋಕ್, ಅಮಿತ್, ಜಗನ್ನಾಥ್, ಪೂರ್ಣಾ, ಸ್ನೇಹಾ ಮತ್ತು ಚೇತನಾ ಎಂಬ ನವಗ್ರಹಗಳು ಕನ್ನಡ ನೆಲದಲ್ಲಿ ಪ್ರತಿಭೆಗಳ ಕೊರೆತೆಯಿಲ್ಲ ಎಂಬುದನ್ನು ಸಾಬೀತುಪಡಿಸಿದ್ದಾರೆ. ಹುಚ್ಚು ಪ್ರೀತಿಯ ಹಿಂದೆ ಬಿದ್ದು, ತಂದೆ-ತಾಯಿಯರನ್ನು ಧಿಕ್ಕರಿಸಿ ಬದುಕನ್ನು ಮೂರಾಬಟ್ಟೆ ಮಾಡಿಕೊಂಡ ಯುವಕನ ಪಾತ್ರಧಾರಿಯಾಗಿ ರಾಕೇಶ್ ಸುಪರ್ಬ್. ಪ್ರೇಮಿಯಾಗಿ ಕಂಗಳಲ್ಲಿ ಪ್ರೀತಿಯ ಹೊಳಪು ತೋರಿಸುವಾಗ, ಹುಚ್ಚುಕುದುರೆಯಂಥ ಪ್ರೀತಿಗಾಗಿ ರೋಶ ಉಕ್ಕಿಸಿಕೊಂಡಾಗ, ಅದೇ ಪ್ರೀತಿ ಕಳೆದುಕೊಂಡು ತಿರಸ್ಕೃತನಾಗಿ ಉಕ್ಕಿಬಂದ ದುಃಖ ತೋರ್ಪಡಿಸುವಾಗ ಯಾವ ಅನುಭವಿಗೂ ಕಡಿಮೆಯಿಲ್ಲದಂತೆ ರಾಕೇಶ್ ಅಭಿನಯಿಸಿದ್ದಾರೆ. ಉಳಿದ ಹುಡುಗ, ಹುಡುಗಿಯರು ಒಬ್ಬರಿಗೊಬ್ಬರು ಪೈಪೋಟಿಗೆ ಬಿದ್ದಂತೆ ನಟಿಸಿದ್ದಾರೆ. ಅದರಲ್ಲೂ ಜಿಮ್ ಕ್ಯಾರಿಯಂತೆ ಅನುಕರಿಸುತ್ತ, ಜುರಾಸಿಕ್ ಪಾರ್ಕ್ ಡೈನೋಸಾರ್ ನಂತೆ ಹೂಂಕರಿಸುತ್ತ ಕಣ್ಣಲ್ಲೇ ಕ್ರೌರ್ಯ ಉಕ್ಕಿಸುವ ರೋಬೋ ಪಾತ್ರಧಾರಿ ಕನ್ನಡಕ್ಕೆ ಸಿಕ್ಕ ಮತ್ತೊಂದು ಕೊಡುಗೆ.

    ಮತ್ತೊಂದು ವಿಶೇಷವೆಂದರೆ ಪೋಷಕ ಪಾತ್ರಧಾರಿಗಳನ್ನು ದುಡಿಸಿಕೊಂಡ ರೀತಿ. ಬೆಳೆದುನಿಂತ ಹುಡುಗ ದಾರಿತಪ್ಪಿದಾಗ ಚಪ್ಪಲಿಯಿಂದಲೂ ಹೊಡೆದು ಅವಮಾನಿಸುವ ಅಪ್ಪನಾಗಿ ಅಚ್ಯುತರಾವ್ ಪರಕಾಯ ಪ್ರವೇಶ ಮಾಡಿದ್ದಾರೆ. ಹುಡುಗರ ಹುಡುಗಾಟದಲ್ಲೇ ತಮಾಷೆ, ಹಾಸ್ಯ, ಒಲವು ಎಲ್ಲ ಸಮ್ಮಿಳಿತವಾಗಿದೆ. ಪಿಟಿ ಮಾಸ್ತರಾಗಿ ಶರಣ್ ಕಾಮಿಡಿ ಬೋನಸ್ ಅಷ್ಟೆ. ಮತ್ತೊಬ್ಬ ನಾಯಕಿಯಾಗಿ ಮಲೆಯಾಳದಲ್ಲಿ ಬಿಜಿಯಾಗಿರುವ ಕನ್ನಡದ ಚೆಲುವೆ ನಿತ್ಯಾ ಒಂದು ಹಾಡಿಗಷ್ಟೇ ಸೀಮಿತವಾಗಿದ್ದಾರೆ. ಆದರೆ, ಆಕೆಯ ನಗು... ಆಹಾ!

    ವಿಪರೀತ ವೇಗವಾಗಿ ಹೋಗುವ ಚಿತ್ರಕಥೆಗೆ ಲಗಾಮು ಹಾಕಿ, ಯುವಕರ ಫಂಕಿ ಸ್ಟೈಲಿಗೇ ಹೆಚ್ಚಿನ ಒತ್ತು ನೀಡಿದೆ, ಒಂದೆರಡು ಅನಗತ್ಯ ಹಾಡುಗಳನ್ನು ಕಡಿಮೆ ಮಾಡಿದ್ದರೆ ಜೋಶ್ ಚಿತ್ರದ ಅಂದ ಇನ್ನೂ ಹೆಚ್ಚುತ್ತಿತ್ತು. ಹಾಗಂತ ಯಾವುದೇ ಅಂಕವನ್ನು ತೆಗೆದುಹಾಕುವಹಾಗಿಲ್ಲ. ಕಥೆ, ಚಿತ್ರಕಥೆ ಬರೆದು ಸೂತ್ರವನ್ನು ಬಿಗಿಯಾಗಿ ಹಿಡಿದಿರುವ ಶಿವಮಣಿ ಫಸ್ಟ್ ಕ್ಲಾಸಿನಲ್ಲಿ ಪಾಸಾಗಿದ್ದಾರೆ. ಅವರಿಗೆ ಹೆಗಲುಕೊಟ್ಟು ನಿಂತಿರುವುದು ಸಂತೋಷ್ ರೈ ಪತಾಜೆ ಕ್ಯಾಮೆರಾ ಚಳಕ. ಪ್ರಪ್ರಥಮ ಬಾರಿಗೆ ಸಂಗೀತ ನಿರ್ದೇಶಿಸಿರುವ ವರ್ಧನ್ ಕೂಡ ತಮ್ಮ ಛಾಪನ್ನು ಮೂಡಿಸಿದ್ದಾರೆ. ಹೊಸಹುಡುಗರು ಮತ್ತು ಶಿವಮಣಿ ಮೇಲೆ ನಂಬಿಕೆಯಿಟ್ಟು ದುಡ್ಡು ಸುರಿದ ಎಸ್ ವಿ ಬಾಬು ಕೂಡ ಅಭಿನಂದನಾರ್ಹರು.

    Kannada Photos

    Go to : More Photos
    ತಾಜಾ ಸುದ್ದಿ ತಕ್ಷಣ ಪಡೆಯಿರಿ
    Enable
    x
    Notification Settings X
    Time Settings
    Done
    Clear Notification X
    Do you want to clear all the notifications from your inbox?
    Settings X
    X