ಅಮೂಲ್ಯಾ ಮನಸಾಲಜಿ ಸಿನಿಮಾ ಹೇಗಿದೆ ?

ಇದೊಂದು ಮೊಬೈಲ್ (ತ್ರಿಕೋನ?) ಪ್ರೇಮಕಥೆ. ಮೊಬೈಲಿನಲ್ಲಿ ಬರುವ ಕವನಕ್ಕೆ ಮನಸೋತು (ಕವಿ!), ಕಾಣದ ಅವನನ್ನು ಪ್ರೀತಿಸುವ ನಾಯಕಿ. ಅಪ್ಪನನ್ನು ಫ್ರೆಂಡ್ ನಂತೆ ಕಾಣುವ ನಾಯಕಿ ಅವಳ ಪ್ರೀತಿಯ ವಿಷಯ ಹೇಳಿಕೊಳ್ಳುವುದು ನಾಟಕೀಯ ಎನಿಸದೇ ಅಪ್ಪ-ಮಗಳ ನವಿರಾದ ಬಾಂದವ್ಯಕ್ಕೆ ಕನ್ನಡಿಯಂತಿದೆ. ಮಗಳ ಪ್ರೀತಿಯನ್ನೊಪ್ಪಿ ಸಹಕರಿಸುವ ಅಪ್ಪ, ಅಪರಿಚಿತ, ಗೊತ್ತು-ಗುರಿ ಇಲ್ಲದ ಹುಡುಗನನ್ನು ಪ್ರೀತಿಸುವ ಮಗಳ ಬಾಳು ಏನಾಗುತ್ತೋ ಎಂಬ ತಳಮಳದಲ್ಲಿ ದಿನ ದೂಡುವುದು ಹೃದಯ ತಟ್ಟುವುದು ಖಂಡಿತ.

ಆದರೆ... ಮನಸಾಲಜಿಯಲ್ಲಿ ಏನೋ ಮಿಸ್ ಆಗಿದೆ ಎಂದು ಅನ್ನಿಸಿದರೆ ಅದು ನಿಮ್ಮ ತಪ್ಪಲ್ಲ, ನಿರ್ದೇಶಕರದು. ತೆರೆಯ ತುಂಬೆಲ್ಲಾ ತುಂಬಿಕೊಳ್ಳುವ ಅಮೂಲ್ಯಾ, ಸಿಹಿಸಿಹಿ ಅನಿಸುವುದು ಸುಳ್ಳಲ್ಲ. ಲವ್ ಓಕೆ, ಸೆಂಟಿಮೆಂಟ್ ಯಾಕೆ ಅನ್ನುವಂತಿದೆ ಅಮೂಲ್ಯಾ ನಟನೆ. ಆದರೂ ನಾಯಕಿ ಪ್ರಧಾನ ಚಿತ್ರವನ್ನು ಹೆಗಲಮೇಲೆ ಹೊತ್ತು ಓಡಿದ್ದನ್ನು ಮೆಚ್ಚಿಕೊಳ್ಳಲೇಬೇಕು. ಇನ್ನು ಕಾಕೇಶ್ ಪಕ್ಕಾ ಲವರ್ ಬಾಯ್. ನೋಡುವುದಕ್ಕೆ ಮದ್ದು ಮುದ್ದು, ನಟನೆಯೂ ಚೆಂದ. ಇಬ್ಬರೂ ಸ್ವಲ್ಪ ಸ್ಲಿಮ್ ಆದರೆ ಒಳ್ಳೆಯದು...

ಅಪ್ಪನ ಪಾತ್ರದ ಅಚ್ಯುತ್ ಇಷ್ಟವಾಗುತ್ತಾರೆ. ಸಾಧುಕೋಕಿಲ ಹಾಸ್ಯ ಎಂದಿನಂತೇ ಇದೆ. ಮಿತ್ರ, ಶತ್ರು ಆಗಿಲ್ಲ ಎನ್ನುವುದು ಚಿಕ್ಕ ಸಂಗತಿ ಅಲ್ಲ.

ಅನೂಪ್ ಸೀಳಿನ್ ಸಂಗೀತದಲ್ಲಿ ಎರಡು ಹಾಡುಗಳು ಮಧುರವಾಗಿದ್ದು ಥಿಯೇಟರಿನಿಂದ ಆಚೆ ಬಂದ ಮೇಲೂ ಗುನುಗುವಂತಿದೆ. ಅಶೋಕ್ ಮದ್ದೂರ್ ಸಂಭಾಷಣೆ ಹಾಗೇ ಸುಮ್ಮನೆ. ಕುಟುಂಬ ಸಮೇತ ಹೋಗಿ ನೋಡುಬಹುದಾದ ಸಿನಮಾ, ನೋಡಿ ಬನ್ನಿ ಎನ್ನಬಹುದು...

ಚಿತ್ರ: ಮನಸಾಲಜಿ
ನಿರ್ದೇಶನ, ನಿರ್ಮಾಣ: ದೀಪಕ್ ಅರಸ್
ತಾರಾಗಣ: ರಾಕೇಶ್. ಅಮೂಲ್ಯ, ಅಚ್ಯುತ, ಸಾಧುಕೋಕಿಲ, ಮಿತ್ರ
ಅನೂಪ್ ಸೀಳಿನ್ ಸಂಗೀತ, ಅಶೋಕ ಮದ್ದೂರ್ ಸಂಭಾಷಣೆ