Missing Boy Review : ಸಿನಿಮಾ ಶುದ್ಧ.. ತಾಯಿ ಪ್ರೀತಿ ಪರಿಶುದ್ಧ..

ಮಿಸ್ ಆಗುವ 5 ವರ್ಷದ ಬಾಯ್

5 ವರ್ಷದ ಒಬ್ಬ ಹುಡುಗ ರೈಲ್ವೆ ನಿಲ್ದಾಣದಿಂದ ಕಾಣೆಯಾಗುತ್ತಾನೆ. ಬೆಂಗಳೂರಿನ ಆಶ್ರಮ ಸೇರುವ ಅವನನ್ನು ಒಬ್ಬ ದಂಪತಿ ದತ್ತು ಪಡೆಯುತ್ತಾರೆ. ಮುಂದೆ ವಿದೇಶದಲ್ಲಿ ತನ್ನ ಸಾಕು ತಂದೆ ತಾಯಿಯ ಜೊತೆಗೆ ಬೆಳೆಯುವ ಹುಡುಗನಿಗೆ ತನ್ನ ನಿಜವಾದ ತಂದೆ ತಾಯಿ ಯಾರೆಂದು ತಿಳಿದುಕೊಳ್ಳುವ ಆಸೆ ಮತ್ತು ಅನಿವಾರ್ಯತೆ ಬರುತ್ತದೆ. ಇಲ್ಲಿಂದ ಸಿನಿಮಾ ತನ್ನ ಪಯಣವನ್ನು ಶುರು ಮಾಡುತ್ತದೆ.

ಅವ್ವನ ಹುಡುಕುವ ಮಗ

ವಿದೇಶದಲ್ಲಿ ದೊಡ್ಡ ಬಿಜಿನೆಸ್ ಮ್ಯಾನ್ ಆಗಿರುವ ಹುಡುಗ ಭಾರತಕ್ಕೆ ಬಂದು ಬೀದಿ ಬೀದಿಗಳಲ್ಲಿ ತನ್ನ ತಾಯಿಯನ್ನು ಹುಡುಕುತ್ತಾನೆ. ಹಸುವಿನಿಂದ ದೂರವಾದ ಕರುವಿನಂತೆ ಆಗಿರುತ್ತದೆ ಆತನ ಪರಿಸ್ಥಿತಿ. ಕೊನೆಗೆ ಆ ಹುಡುಗ ತನ್ನ ತಾಯಿಯ ಮಡಿಲು ಸೇರುತ್ತಾನಾ..? ಇಲ್ವಾ..? ಎನ್ನುವುದು ಈ ಸಿನಿಮಾದ ಕಥೆ.

ಗೋಲ್ ಹೊಡೆದ ರಘುರಾಮ್

ಸಿನಿಮಾದ ಮೊದಲ ದೃಶ್ಯದಲ್ಲಿ ನಾಯಕ ನಟ ಪುಟ್ ಬಾಲ್ ಆಟ ಆಡುತ್ತಾ ಗೋಲ್ ಹೊಡೆಯುತ್ತಾನೆ. ಅದೇ ರೀತಿ ಸಿನಿಮಾದ ನಿರ್ದೇಶಕ ರಘುರಾಮ್ ಗೋಲ್ ಹೊಡೆದಿದ್ದಾರೆ. ತನ್ನ ಕನಸಿನ ಸಿನಿಮಾವನ್ನು ತುಂಬ ಚೆನ್ನಾಗಿ ಸೆರೆ ಹಿಡಿದು ಚಿತ್ರಮಂದಿರದವರೆಗೆ ತಲುಪಿಸಿದ್ದಾರೆ. ಸಣ್ಣ ಪುಟ್ಟ 'ಮಿಸ್'ಟೆಕ್ ಗಳ ನಡುವೆ ರಘು ಒಂದೊಳ್ಳೆ ಸಿನಿಮಾ ಮಾಡಿದ್ದಾರೆ.

ನಾಯಕ - ನಾಯಕಿಯ ನಟನೆ

ತಮ್ಮ ಹಿಂದಿನ ಸಿನಿಮಾಗಳ ನಟನೆಗಿಂತ ಗುರುನಂದನ್ ನಟನೆ ಕೊಂಚ ಬದಲಾಗಿದೆ. ಆದರೂ ಭಾವನಾತ್ಮಕ ದೃಶ್ಯಗಳಲ್ಲಿ ಅವರು ಇನ್ನಷ್ಟು ಚೆನ್ನಾಗಿ ನಟಿಸಬಹುದಿತ್ತು. ನಾಯಕಿಯ ಪಾತ್ರದಲ್ಲಿ ಯಾವುದೇ ತೊಂದರೆ ಇಲ್ಲ. ಉಳಿದಂತೆ, ರಂಗಾಯಣ ರಘು ಹಾಗೂ ರವಿಶಂಕರ್ ಅವರ ಅನುಭವದ ನಟನೆ ಚಿತ್ರಕ್ಕೆ ಪ್ಲಾಸ್ ಆಗಿದೆ.

ತಾಯಿ ಪಾತ್ರಕ್ಕಿದೆ ಶಕ್ತಿ

ಸಿನಿಮಾದ ನಾಯಕ ತನ್ನ ತಾಯಿಯನ್ನು ಹುಡುಕುವ ಹಾಗೆಯೇ, ಸಿನಿಮಾ ನೋಡುವ ಪ್ರೇಕ್ಷಕನೂ ತಾಯಿ ಪಾತ್ರವನ್ನು ನೋಡುವ ತವಕದಲ್ಲಿ ಇರುತ್ತಾನೆ. ಕೊನೆಯಲ್ಲಿ ಬರುವ ತಾಯಿ ಪಾತ್ರ ಸಿನಿಮಾಗೆ ದೊಡ್ಡ ಶಕ್ತಿ ತುಂಬಿದೆ. ಭಾಗೀರಥಿ ಬಾಯಿ ನಟನೆ ನೋಡುವುದೆ ಚೆಂದ. ಮಗನನ್ನು ಕಂಡ ಖುಷಿಯನ್ನು ಅವರು ವ್ಯಕ್ತ ಪಡಿಸುವ ರೀತಿ ಅದ್ಭುತ. ಉಳಿದಂತೆ, ಶೋಭರಾಜ್ ಹಾಗೂ ಬಾಲ ನಟನ ಅಭಿನಯ ಸಹಜ ಸುಂದರವಾಗಿದೆ.

ಕಥೆ ಬಿಟ್ಟು ಹೋಗಿಲ್ಲ

ಸಿನಿಮಾ ಇಷ್ಟ ಆಗುವುದಕ್ಕೆ ಇರುವ ಕಾರಣಗಳಲ್ಲಿ ಕಥೆಯ ನಿರೂಪಣೆ ಕೂಡ ಒಂದು. ಒಂದು ರಿಯಲ್ ಸ್ಟೋರಿಯನ್ನು ಅಷ್ಟೇ ನೈಜವಾಗಿ ಹೇಳಿದ್ದಾರೆ. ನಾಯಕಿ ಇದ್ದಾಳೆ ಅಂತ ಲವ್, ಹಾಡು, ಹೀರೋಗಾಗಿ ಸಾಹಸ ಯಾವುದೂ ಇಲ್ಲದೆ ಕಥೆಗೆ ಬೇಕಾದ ರೂಪ ನೀಡಿದ್ದಾರೆ ರಘುರಾಮ್.

ಮಿಸ್ಸಿಂಗ್ ಬಾಯ್ ನಲ್ಲಿ ಇವು 'ಮಿಸ್'

ನೈಜ ಘಟನೆ ಆಗಿದ್ದರೂ, ಸಿಕ್ಕ ಜಾಗಗಳಲ್ಲಿ ಒಂದಷ್ಟು ಹಾಸ್ಯವನ್ನು ಬೆರೆಸಿದ್ದರೆ ಸಿನಿಮಾ ಜನರಿಗೆ ಇನ್ನಷ್ಟು ಆಪ್ತ ಆಗುತ್ತಿತ್ತು. ಕ್ಯಾಮರಾ ಹಾಗೂ ಎಡಿಟಿಂಗ್ ಕೆಲಸಗಳು ಇನ್ನೊಂದಷ್ಟು ಚೆನ್ನಾಗಿ ಮಾಡಬಹುದಿತ್ತು. ಸಿನಿಮಾದಲ್ಲಿ ಹೆಚ್ಚು ಹಾಡು ಇಲ್ಲ. ಅದ್ದರಿಂದ ಮೊದಲ ಹಾಡು ಇನ್ನಷ್ಟು ಚೆನ್ನಾಗಿ ಇರಬೇಕಿತ್ತು.

ಒಂದು ಶುದ್ಧ ಸಿನಿಮಾ

ತಾಯಿ ಸೆಂಟಿಮೆಂಟ್ ಸಿನಿಮಾಗಳನ್ನು ಇಷ್ಟ ಪಡುವವರು ಮಿಸ್ ಮಾಡದೆ 'ಮಿಸ್ಸಿಂಗ್ ಬಾಯ್' ನೋಡಿ. ಇಡೀ ಕುಟುಂಬ ಕುಳಿತು ಯಾವುದೇ ಕಿರಿಕಿರಿ ಇಲ್ಲದೆ, ಕಿಲ ಕಿಲ ಅಂತ ನೋಡಬಹುದಾದ ಚಿತ್ರವಿದು. ಒಂದೇ ಮಾತಿನಲ್ಲಿ ಹೇಳಬೇಕು ಅಂದರೆ ತಾಯಿ ಮಗನ ಬಾಂಧವ್ಯದ ಶುದ್ಧ ಸಿನಿಮಾವೇ 'ಮಿಸ್ಸಿಂಗ್ ಬಾಯ್'.