Man Of The Match Review: ಹೇಗಿದೆ 'ಮ್ಯಾನ್ ಆಫ್ ದಿ ಮ್ಯಾಚ್' ಇಲ್ಲಿದೆ ವಿಮರ್ಶೆ!

ಕಾಲ್ಪನಿಕ ಕಥೆಯಲ್ಲೊಂದು ನೈಜತೆ ಕಥೆ

ಸಿನಿಮಾ ತೆಗೆಯುವ ಬದಲಿಗೆ ಆಡಿಷನ್‌ಗೆ ಬಂದ ಕಲಾವಿದರ ನಡುವೆ ನಡೆಯುವ ನೈಜ ಘಟನೆಗಳನ್ನು ಕ್ಯಾಮೆರಾದಲ್ಲಿ ಸೆರೆಹಿಡಿದು, ಅದನ್ನೇ ಸಿನಿಮಾ ಮಾಡಿ‌ ಬಿಡುತ್ತಾರೆ. ಇದು ವಿಭಿನ್ನ ಪ್ರಯೋಗಗಳ ಸಾಲಿಗೆ ಸೇರುತ್ತದೆ. ಅಂದರೆ ಈ ಹಿಂದೆ ಬಂದ ಕನ್ನಡದ‌ 'ತಿಥಿ', 'ಸಿನಿಮಾ ಬಂಡಿ' ಚಿತ್ರಗಳನ್ನು ಇದು ನೆನಪಿಸುತ್ತದೆ. ಆದರೆ ಆ ಚಿತ್ರಗಳಷ್ಟು ನೈಜತೆ ಇಲ್ಲಿಲ್ಲ.

ಸಿನಿಮಾದೊಳಗೊಂದು ಸಿನಿಮಾ

ಆಡಿಷನ್‌ಗಾಗಿ ಬರುವ ಕಲಾವಿದರು‌ ಸಿನಿಮಾದಲ್ಲಿ ನಟಿಸುವ ಮಹತ್ತರವಾದ ಕನಸು ಹೊತ್ತು ಬರುತ್ತಾರೆ. ಅವರು ಅಂದುಕೊಳ್ಳುವುದೇ ಬೇರೆ, ಅಲ್ಲಿ ನಡೆಯುವುದೇ ಬೇರೆ. ಆಡಿಷನ್ ಸಮಯದಲ್ಲಿ ನಿಜವಾಗಿ ಅಲ್ಲಿ ನಡೆಯುವ ಘಟನೆಗಳು, ಕಲಾವಿದರ ನಡುವೆ ನಡೆಯುವ ಸನ್ನಿವೇಶಗಳನ್ನು ನಿರ್ದೇಶಕ ಸೆರೆಹಿಡಿಯುತ್ತಾನೆ.

ಆಡಿಷನ್‌ಗೆ ಬರುವ ಯುವಕರದ್ದು, ಒಬ್ಬೊಬ್ಬರದ್ದು ಒಂದೊಂದು ಕಥೆ.‌ ಅವರ ಹಿಂದೆ ಏನೇ ಕಥೆ ಇದ್ದರೂ, ಮುಂದೆ ಇರುವ ಗುರಿ ಮಾತ್ರ ಸಿನಿಮಾದಲ್ಲಿ ಅಭಿನಯಿಸ ಬೇಕು ಎನ್ನುವುದು. ಹಾಗಾಗಿ ಅದನ್ನೇ ಅಸ್ತ್ರವಾಗಿ ಇಟ್ಟು ಕೊಂಡು ನಿರ್ದೇಶಕ ಒಂದು ಸಿನಿಮಾವನ್ನೇ ಮಾಡುತ್ತಾರೆ.

ಕನ್ನಡದ ಮತ್ತೊಂದು ಪ್ರಯೋಗಾತ್ಮಕ ಚಿತ್ರ!

ಇಲ್ಲಿ ಚಿತ್ರದ ನಿರ್ದೇಶಕ ಸತ್ಯ ಪ್ರಕಾಶ್ ವಿಭಿನ್ನ ರೀತಿಯ ಅಪ್ರೋಚ್ ಮಾಡಿದ್ದಾರೆ. ಈ ಮೂಲಕ ಸಿನಿಮಾ ಮಾಡಲು ದೊಡ್ಡ ಬಜೆಟ್, ನಾಯಕ, ನಾಯಕಿ, ಅದ್ಧೂರಿ ಮೇಕಿಂಗ್, ನಾನಾ ಲೊಕೇಷನ್‌ಗಳು ಬೇಕಾಗುತ್ತವೆ ಎನ್ನುವ ವಿಚಾರಗಳಿಗೆ ಬ್ರೇಕ್ ಹಾಕಿದ್ದಾರೆ. ಇದ್ದಿದ್ದನ್ನು ಇದ್ದಹಾಗೆ ತೋರಿಸಲು ಒಂದು ಸಿನಿಮಾ ಮಾಡಿದ್ದಾರೆ.

ಧರ್ಮಣ್ಣ 'ಮ್ಯಾನ್ ಆರ್ಫ ದಿ ಮ್ಯಾಚ್'!

ಇನ್ನು ಚಿತ್ರದಲ್ಲಿನ ಪಾತ್ರಗಳ ವಿಚಾರಕ್ಕೆ ಬರುವುದಾದರೆ, ಇಡೀ ಸಿನಿಮಾದಲ್ಲಿ ಹಾಸ್ಯ ನಟ ಧರ್ಮಣ್ಣ ಕಡೂರ್ ಅಬ್ಬರಿಸಿದ್ದಾರೆ. ಧರ್ಮಣ್ಣನ ಕಾಮಿಡಿ ಮತ್ತು ಪಾತ್ರ ಪ್ರೇಕ್ಷಕರನ್ನು ಹಿಡಿದಿಡುತ್ತದೆ. ನಿರ್ದೇಶಕನ ಪಾತ್ರದಲ್ಲಿ ಕಾಣಿಸಿಕೊಂಡ ನಟರಾಜ್ ತಮ್ಮ ಪಾತ್ರವನ್ನು ಅಚ್ಚುಕಟ್ಟಾಗಿ ನಿರ್ವಹಿಸಿದ್ದಾರೆ. ಒಬ್ಬ ಸ್ವಾರ್ಥ ತುಂಬಿದ ನಿರ್ದೇಶಕನ ಪಾತ್ರದಲ್ಲಿ ನಟಿಸಿದ್ದಾರೆ.

ಇನ್ನು ಈ ಚಿತ್ರದ ಮೂಲಕ ಹಲವು ಹೊಸ ಪ್ರತಿಭೆಗಳನ್ನು ಪರಿಚಯಿಸಲಾಗಿದೆ. ಚಿತ್ರಕ್ಕೆ ವಾಸುಕಿ ವೈಭವ್ ಸಂಗೀತ ಇದೆ. ಒಂದೇ ಹಾಡಿಗೆ ನಟ ಪುನೀತ್ ರಾಜ್‍ಕುಮಾರ್ ಧ್ವನಿಯಾಗಿದ್ದಾರೆ. 'ಮ್ಯಾನ್ ಆಫ್ ದಿ ಮ್ಯಾಚ್' ಮೇ 5 ರಿಂದ ಒಟಿಟಿಯಲ್ಲಿ ರಿಲೀಸ್ ಆಗುತ್ತಿದೆ. ಅಮೆಜಾನ್ ಪ್ರೈಮ್‌ನಲ್ಲಿ ಈ ಚಿತ್ರ ಲಭ್ಯವಿದೆ.