Liger Movie Review : ವರ್ಕೌಟ್ ಆಯ್ತಾ ವಿಜಯ್-ಪುರಿ ಜಗನ್ನಾಥ್ ಮ್ಯಾಜಿಕ್?

ಕತೆ ಏನು?

ಮಾರ್ಷಲ್ ಆರ್ಟ್ಸ್‌ ಅನ್ನುನ ಕತೆಯಲ್ಲಿ ಅಡಕ ಮಾಡಿರುವುದು ಒಂದು ಹಂತದ ವರೆಗೆ ವರ್ಕೌಟ್ ಆಗಿದೆ. ಆದರೆ ಅದೇ ಸಿನಿಮಾದ ಹೈಲೆಟ್ ಖಂಡಿತ ಅಲ್ಲ. ಆಕ್ಷನ್ ಕೊರಿಯಾಗ್ರಫಿ ಉತ್ತಮವಾಗಿದೆ ಆದರೆ ಅದ್ಭುತವಾಗಿಲ್ಲ. ಲೈಗರ್‌ಗೆ ಸರಿಯಾದ ಸ್ಪರ್ಧೆಯನ್ನು ಸೃಷ್ಟಿಸುವಲ್ಲಿ ನಿರ್ದೇಶಕ ವಿಫಲರಾಗಿದ್ದಾರೆ. ರಿಂಗ್‌ನಲ್ಲೂ ಸ್ಪರ್ಧೆಯಿಲ್ಲ, ರಿಂಗ್‌ನ ಹೊರಗೂ ಸ್ಪರ್ಧೆ ಇಲ್ಲ. ಲೈಗರ್‌ನ ತಾಯಿಯ ಪಾತ್ರ ಭಿನ್ನವಾಗಿದೆ ಆದರೆ ಆಕೆಯ ಅತಿಯಾದ ಅಗ್ರೆಶನ್‌ನಿಂದಾಗಿ ಪ್ರೇಕ್ಷಕರು ಆಕೆಯ ಮೇಲಿನ ಪ್ರೀತಿ ಕಳೆದುಕೊಳ್ಳುತ್ತಾರೆ. ನಾಯಕಿ ಅನನ್ಯಾ ಪಾಂಡೆ ನಟನೆ, ಪಾತ್ರ ಎರಡೂ ಕಿರಿಕಿರಿ ಉಂಟು ಮಾಡುತ್ತದೆ.

ಶ್ರಮ ಪಟ್ಟಿದ್ದಾರೆ ವಿಜಯ್ ದೇವರಕೊಂಡ

ವಿಜಯ್ ದೇವರಕೊಂಡ ತಮ್ಮ ಪಾತ್ರಕ್ಕಾಗಿ ಸಾಕಷ್ಟು ಶ್ರಮಪಟ್ಟಿದ್ದಾರೆಂಬುದು ತೆರೆಯ ಮೇಲೆ ಕಾಣುತ್ತದೆ. ಅವರ ನಟನೆ ಬಗ್ಗೆ ದೂರುಗಳು ಹೇಳುವಂತಿಲ್ಲ. ಆದರೆ ಇಡೀ ಸಿನಿಮಾವನ್ನು ಒಬ್ಬರೇ ತೆಗೆದುಕೊಂಡು ಹೋಗುವಲ್ಲಿ ಅವರು ವಿಫಲರಾಗಿದ್ದಾರೆ, ಅದಕ್ಕೆ ಕಾರಣ ವಿಜಯ್ ಹೊರತಾಗಿ ಸಿನಿಮಾದಲ್ಲಿ ಇನ್ನೇನೂ ಇಲ್ಲದೇ ಇರುವುದು. ಸಿನಿಮಾ ರಿಚ್ ಆಗಿ ಕಾಣುತ್ತದೆ. ಕಣ್ಣಿಗೆ ಮುದ ನೀಡುವ ದೃಶ್ಯಗಳನ್ನು ಸಂಯೋಜಿಸಲಾಗಿದೆ. ಸಂಗೀತ ಪರ್ವಾಗಿಲ್ಲ ಎನ್ನುವಂತಿದೆ. ಒಂದು ಹಾಡು ಚೆನ್ನಾಗಿದೆ. ಕೆಲವೆಡೆ ಹಿನ್ನೆಲೆ ಸಂಗೀತವೂ ಗಮನ ಸೆಳೆಯುತ್ತದೆ. ಆದರೆ ನೆನಪಿನಲ್ಲಿ ಉಳಿಯುವುದಿಲ್ಲ. ಸಿನಿಮಾ ಎಡಿಟಿಂಗ್ ಚೆನ್ನಾಗಿದೆ. ಕೆಲವೆಡೆ ಎಡಿಟಿಂಗ್‌ನಿಂದಲೇ ಸಿನಿಮಾಕ್ಕೆ ವೇಗ ಒದಗಿಸಲಾಗಿದೆ.

ಚಿತ್ರಕತೆಯನ್ನು ಸಡಿಲಬಿಟ್ಟ ಪುರಿ ಜಗನ್ನಾಥ್

ವಿಜಯ್ ದೇವರಕೊಂಡ ಸ್ಕ್ರೀನ್ ಪ್ರೆಸೆನ್ಸ್ ಉತ್ತಮವಾಗಿದೆ. 'ಲೈಗರ್‌'ನಲ್ಲಿ ಅವರದ್ದು ಒನ್‌ಮ್ಯಾನ್ ಶೋ. ಕೆಲವು ಆಕ್ಷನ್ ದೃಶ್ಯಗಳು ಚೆನ್ನಾಗಿವೆ. ಇವೆರಡನ್ನು ಬಿಟ್ಟರೆ ಸಿನಿಮಾದಲ್ಲಿ ಹೇಳಿಕೊಳ್ಳುವಂಥಹದ್ದು ಏನೂ ಇಲ್ಲ. ಸಿನಿಮಾದಲ್ಲಿ ಪ್ರತ್ಯೇಕ ವಿಲನ್ ಇಲ್ಲದ ಕಾರಣ ಪುರಿ ಜಗನ್ನಾಥ್ ಅನ್ನೇ ವಿಲನ್ ಎನ್ನಬಹುದು. ಸಿನಿಮಾಕ್ಕೆ ಇನ್ನಷ್ಟು ಟೈಟ್ ಆದ ಚಿತ್ರಕತೆ ಬೇಕಿತ್ತು. ಕ್ಲೀಷೆ ಮಾದರಿಯ ದೃಶ್ಯಗಳಿಂದ ಸಿನಿಮಾವನ್ನು ತುಂಬಿಬಿಟ್ಟಿದ್ದಾರೆ ಪುರಿ. ಕತೆ ಸಹ ತೀರ ಸಾಧಾರಣವಾಗಿದೆ. ಲೈಗರ್ ಪಾತ್ರ ಹೊರತುಪಡಿಸಿ ಎಲ್ಲ ಪಾತ್ರಗಳು ಕಾರ್ಟೂನ್ ಪಾತ್ರಗಳಂತಿವೆ. ವಿಜಯ್ ದೇವರಕೊಂಡ ಅಭಿಮಾನಿಗಳು ಮಾತ್ರ ಸಹಿಸಿಕೊಂಡು ನೋಡಬಹುದಾದ ಸಿನಿಮಾ 'ಲೈಗರ್'

ಮೈಕ್ ಟೈಸನ್ ಅನ್ನು ಎಳೆದು ತರಲಾಗಿದೆ

'ಲೈಗರ್' ಸಿನಿಮಾವನ್ನು ಪ್ಯಾನ್ ಇಂಡಿಯಾ ಲೆವೆಲ್‌ನಲ್ಲಿ ಬಿಡುಗಡೆ ಮಾಡಲಾಗಿದೆ. ಸಿನಿಮಾದಲ್ಲಿ ಮೈಕ್ ಟೈಸನ್ ಸಹ ಇದ್ದಾರಾದರೂ, ಬಲವಂತಕ್ಕೆ ಅವರನ್ನು ಎಳೆತಂದಂತಿದೆ. ಸಿನಿಮಾ ಹಿಟ್ ಆಗಲು ಟೈಸನ್ ಅಲ್ಲ ಒಳ್ಳೆಯ ಚಿತ್ರಕತೆ ಬೇಕಿತ್ತು ಎಂಬುದು ಪುರಿ ಜಗನ್ನಾಥ್‌ಗೆ ಹೊಳೆಯದೇ ಹೋಗಿದೆ. ದೊಡ್ಡ ತಾರಾಗಣ, ಹೈ ಬಜೆಟ್ ಇದ್ದರೆ ಸಾಕಾಗುವುದಿಲ್ಲ ಸಿನಿಮಾ ಗೆಲ್ಲಲು ಚಿತ್ರಕತೆ ಮುಖ್ಯ ಎಂಬುದಕ್ಕೆ ಈ ಸಿನಿಮಾ ಉದಾಹರಣೆ.