ನಿರ್ಮಾಪಕರ ಖರ್ಚು ಹೆಚ್ಚಿಸುತ್ತಿರುವ ಪೂಜಾ ಹೆಗ್ಡೆ: ಸಿಟ್ಟಾದ ನಿರ್ದೇಶಕ

ಸ್ಟಾರ್ ಆದ ಕೂಡಲೇ ಸಂಭಾವನೆ ಏರಿಸಿಕೊಂಡಿದ್ದಾರೆ: ಸೆಲ್ವಮಣಿ

ಪೂಜಾ ಹೆಗ್ಡೆ ಸಂಭಾವನೆ ಹೆಚ್ಚಿಸಿಕೊಂಡಿರುವ ಬಗ್ಗೆಯೂ ತಕರಾರು ಎತ್ತಿದ್ದಾರೆ ಆರ್‌.ಕೆ.ಸೆಲ್ವಮಣಿ, ''ಸ್ಟಾರ್ ಆದ ಕೂಡಲೇ ಸಂಭಾವನೆ ಏರಿಸಿಕೊಂಡು ಸಿನಿಮಾ ನಿರ್ಮಾಪಕರಿಗೆ ಕಷ್ಟವಾಗುವಂತೆ ಪೂಜಾ ಹೆಗ್ಡೆ ಮಾಡಿದ್ದಾರೆ'' ಎಂದು ನಿರ್ದೇಶಕ ಆರ್‌.ಕೆ.ಸೆಲ್ವಮಣಿ ಆರೋಪ ಮಾಡಿದ್ದಾರೆ. ವಿಶೇಷವೆಂದರೆ ಪೂಜಾ ಹೆಗ್ಡೆ ನಟಿಸಿರುವ ಯಾವುದೇ ಸಿನಿಮಾವನ್ನು ಸೆಲ್ವಮಣಿ ನಿರ್ದೇಶಿಸಿಲ್ಲ, ನಿರ್ಮಿಸಿಲ್ಲ ಆದರೂ ಆರೋಪಗಳನ್ನು ಸೆಲ್ವಮಣಿ ಮಾಡಿದ್ದಾರೆ.

ನಟಿಯರ ಸಂಭಾವನೆ ವಿಚಾರ ಬಹಳ ಚರ್ಚೆ

ನಟಿಯರ ಸಂಭಾವನೆ ಏರಿಕೆ ವಿಚಾರ ಬಹಳವೇ ಸದ್ದಾಗುತ್ತಿದೆ. ನಟಿ ಕರೀನಾ ಕಪೂರ್, ರಾಜಮೌಳಿ ತಂದೆ ವಿಜಯೇಂದ್ರ ಪ್ರಸಾದ್ ನಿರ್ದೇಶನದ ಸಿನಿಮಾದಲ್ಲಿ ನಟಿಸಲು 12 ಕೋಟಿ ಸಂಭಾವನೆ ಕೇಳಿದರು ಎಂಬುದು ದೊಡ್ಡ ಸುದ್ದಿಯಾಗಿತ್ತು. ಈ ಸಂದರ್ಭದಲ್ಲಿ ಹಲವರು ಕರೀನಾ ಬೆಂಬಲಕ್ಕೆ ಬಂದು, ನಟ ಸಂಭಾವನೆ ಹೆಚ್ಚಿಸಿಕೊಂಡರೆ ಆತನ ಮಾರುಕಟ್ಟೆ ಹೆಚ್ಚಿದೆ ಎನ್ನುತ್ತಾರೆ, ನಟಿ ಸಂಭಾವನೆ ಹೆಚ್ಚಿಸಿಕೊಂಡರೆ ಆಕೆ ಬಹಳ 'ಡಿಮ್ಯಾಂಡಿಂಗ್' ಎನ್ನುತ್ತಾರೆ ಎಂದು ನಟಿ ತಾಪ್ಸಿ ಪನ್ನು ಹೇಳಿದ್ದರು. ನಟಿ ಪೂಜಾ ಹೆಗ್ಡೆ ಸಹ ಕರೀನಾ ಕಪೂರ್‌ಗೆ ಬೆಂಬಲ ವ್ಯಕ್ತಪಡಿಸಿದ್ದರು. ಇದೀಗ ಪೂಜಾ ಹೆಗ್ಡೆ ವಿರುದ್ಧವೇ ಟೀಕೆಗಳು ಕೇಳಿಬರುತ್ತಿವೆ.

ಸಂಭಾವನೆ ಏರಿಸಿಕೊಂಡಿರುವ ನಟಿ

'ಅಲಾ ವೈಕುಂಟಪುರಂಲೊ' ಸಿನಿಮಾದ ಬಳಿಕ ನಟಿ ಪೂಜಾ ಹೆಗ್ಡೆ ತಮ್ಮ ಸಂಭಾವನೆ ಏರಿಸಿಕೊಂಡಿದ್ದಾರೆ. ಪ್ರಭಾಸ್ ಜೊತೆ ನಟಿಸುತ್ತಿರುವ 'ರಾಧೆ' ಸಿನಿಮಾಕ್ಕೆ ಬರೋಬ್ಬರಿ 3 ಕೋಟಿ ಸಂಭಾವನೆಯನ್ನು ಪೂಜಾ ಹೆಗ್ಡೆ ಪಡೆದಿದ್ದಾರೆ ಎನ್ನಲಾಗುತ್ತಿದೆ. ಈ ಹಿಂದೆ ಪೂಜಾ ಹೆಗ್ಡೆಯ ಸಂಭಾವನೆ 1 ಕೋಟಿ ಪಡೆಯುತ್ತಿದ್ದರು. ನಟಿ ಅನುಷ್ಕಾ ಶೆಟ್ಟಿ ನಂತರ ತೆಲುಗು ಚಿತ್ರರಂಗದಲ್ಲಿ ಅತಿ ಹೆಚ್ಚು ಸಂಭಾವನೆ ಪಡೆದ ನಾಯಕಿ ಪೂಜಾ ಎನ್ನಲಾಗುತ್ತಿದೆ. ಸಂಭಾವನೆ ಹೆಚ್ಚಿಸಿಕೊಂಡರು ಹಲವು ಹೊಸ ಸಿನಿಮಾಗಳಿಗೆ ಪೂಜಾ ಹೆಗ್ಡೆ ಸಹಿ ಹಾಕಿದ್ದಾರೆ.

ಹಲವು ಸಿನಿಮಾಗಳಿವೆ ಪೂಜಾ ಹೆಗ್ಡೆ ಕೈಯಲ್ಲಿ

ಪೂಜಾ ಹೆಗ್ಡೆ, ಪ್ರಭಾಸ್ ಜೊತೆ ನಟಿಸಿರುವ 'ರಾಧೆಶ್ಯಾಮ್' ಸಿನಿಮಾ ಬಿಡುಗಡೆಗೆ ತಯಾರಾಗಿದೆ. ನಿಖಿಲ್ ಜೊತೆ ನಟಿಸಿರುವ 'ಮೋಸ್ಟ್ ಎಲಿಜಿಬಲ್ ಬ್ಯಾಚ್ಯುಲರ್' ಸಿನಿಮಾ ಸಹ ಬಿಡುಗಡೆ ಆಗಲಿದೆ. ಚಿರಂಜೀವಿ ಮುಖ್ಯ ಪಾತ್ರದಲ್ಲಿರುವ 'ಆಚಾರ್ಯ' ಸಿನಿಮಾದಲ್ಲಿ ರಾಮ್ ಚರಣ್ ತೇಜಗೆ ನಾಯಕಿಯಾಗಿ ಪೂಜಾ ಕಾಣಿಸಿಕೊಂಡಿದ್ದಾರೆ. ಈ ನಡುವೆ ತಮಿಳಿನ ವಿಜಯ್ ನಟನೆಯ 'ಬೀಸ್ಟ್' ಸಿನಿಮಾದಲ್ಲಿ ಪೂಜಾ ನಟಿಸುತ್ತಿದ್ದಾರೆ. ಹಿಂದಿಯಲ್ಲಿ ನಟ ಸಲ್ಮಾನ್ ಖಾನ್ ಜೊತೆಗೆ 'ಭಾಯಿಜಾನ್' ನಟ ರಣ್ವೀರ್ ಸಿಂಗ್ ಜೊತೆಗೆ 'ಸರ್ಕಸ್' ಸಿನಿಮಾಗಳಲ್ಲಿ ಪೂಜಾ ಹೆಗ್ಡೆ ನಟಿಸುತ್ತಿದ್ದಾರೆ.