ತಮ್ಮ ಹೆಸರು, ಚಿತ್ರ, ಧ್ವನಿ ಬಳಸುವವರಿಗೆ ರಜನೀಕಾಂತ್ ಎಚ್ಚರಿಕೆ!

ವಾಣಿಜ್ಯ ಬಳಕೆಗೆ ಅವಕಾಶವಿಲ್ಲ

ರಜನೀಕಾಂತ್ ಅವರು ಹೊರಡಿಸಿರುವ ಬಹಿರಂಗ ನೊಟೀಸ್ ಪ್ರಕಾರ, ರಜನೀಕಾಂತ್‌ ಅವರ ಚಿತ್ರ, ವಿಡಿಯೋ, ಧ್ವನಿ, ಸ್ಟೈಲ್, ಮ್ಯಾನರಿಸಂ ಎಲ್ಲರದ ವಾಣಿಜ್ಯ ಬಳಕೆಯ ಅಧಿಕಾರ ಕೇವಲ ರಜನೀಕಾಂತ್ ಅವರಿಗಷ್ಟೆ ಇದ್ದು, ಅವರ ಹೊರತಾಗಿ ಇನ್ಯಾರೂ ಸಹ ರಜನೀಕಾಂತ್‌ರ ಚಿತ್ರ, ಸ್ಟೈಲ್, ಧ್ವನಿ, ಮ್ಯಾನರಿಸಂಗಳನ್ನು ಬಳಸಿಕೊಳ್ಳುವಂತಿಲ್ಲ ಎಂದು ಸಾರ್ವಜನಿಕ ನೊಟೀಸ್‌ನಲ್ಲಿ ಹೇಳಲಾಗಿದೆ.

ಗೌರವಕ್ಕೆ ಧಕ್ಕೆ ಆಗುವುದನ್ನು ಸಹಿಸಲ್ಲ: ರಜನೀಕಾಂತ್

''ರಜನೀಕಾಂತ್‌ರ ನಟನೆ, ಸ್ಟೈಲ್ ಮತ್ತು ವ್ಯಕ್ತಿತ್ವ ಅವರನ್ನು ಸೂಪರ್ ಸ್ಟಾರ್‌ ಅನ್ನಾಗಿಸಿದೆ. ಕೋಟ್ಯಂತರ ಮಂದಿ ಅಭಿಮಾನಿಗಳು ಅವರನ್ನು ಸೂಪರ್ ಸ್ಟಾರ್ ಎಂದು ಕರೆಯುತ್ತಾರೆ. ಚಿತ್ರರಂಗದಲ್ಲಿ ಮತ್ತು ಹೊರಗಿನ ಸಮಾಜದಲ್ಲಿಯೂ ಸಹ ರಜನೀಕಾಂತ್‌ಗೆ ಬಹಳ ದೊಡ್ಡ ಗೌರವ, ಪ್ರೀತಿ ಇದೆ. ಈ ಗೌರವಕ್ಕೆ ಧಕ್ಕೆ ಆಗುವ ಯಾವುದೇ ಕಾರ್ಯವನ್ನು ರಜನೀಕಾಂತ್‌ ಅವರು ಸಹಿಸಿಕೊಳ್ಳುವುದಿಲ್ಲ'' ಎಂದು ನೊಟೀಸ್‌ನಲ್ಲಿ ಹೇಳಲಾಗಿದೆ.

ಅಮಿತಾಬ್ ಬಚ್ಚನ್‌ ಸಹ ನೊಟೀಸ್ ಹೊರಿಡಿಸಿದ್ದರು

ರಜನೀಕಾಂತ್ ಹೊರಡಿಸಿರುವ ಬಹಿರಂಗ ನೊಟೀಸ್ ಇದೀಗ ಸಾಮಾಜಿಕ ಜಾಲತಾಣದಲ್ಲಿ ಹರಿದಾಡುತ್ತಿದೆ. ರಜನೀಕಾಂತ್‌ ಮಾತ್ರವೇ ಅಲ್ಲದೆ ನಟ ಅಮಿತಾಬ್ ಬಚ್ಚನ್ ಸೇರಿದಂತೆ ಇನ್ನೂ ಹಲವು ಸೂಪರ್ ಸ್ಟಾರ್‌ಗಳು ತಮ್ಮ ಚಿತ್ರ, ಮ್ಯಾನರಿಸಂ, ಧ್ವನಿ ಎಲ್ಲದರ ವಾಣಿಜ್ಯ ಬಳಕೆಯ ಹಕ್ಕನ್ನು ತಮ್ಮ ಬಳಿ ಇಟ್ಟುಕೊಂಡಿದ್ದಾರೆ. ನೀರಿನ ಪೈಪ್‌ನ ಕಂಪೆನಿಯೊಂದು ತನ್ನ ಪೈಪ್‌ಗಳ ಜಾಹೀರಾತಿಗೆ ರಜನೀಕಾಂತ್‌ರ ಮ್ಯಾನರಿಸಂ ಅನ್ನು ಬಳಸಿಕೊಂಡಿದೆ. ಅವೆಷ್ಟೊ ಬೀಡಿ ಸಂಸ್ಥೆಗಳು ತಮ್ಮ ಉತ್ಪನ್ನಗಳ ಮೇಲೆ ರಜನೀಕಾಂತ್ ಚಿತ್ರ ಪ್ರಿಂಟ್ ಹಾಕಿವೆ.

'ಜೈಲರ್' ಸಿನಿಮಾನಲ್ಲಿ ರಜನೀಕಾಂತ್

ರಜನೀಕಾಂತ್ ಸಿನಿಮಾಗಳ ವಿಷಯಕ್ಕೆ ಬರುವುದಾದರೆ, ರಜನೀ ನಟಿಸಿದ್ದ 'ಅಣ್ಣಾತೆ' ಸಿನಿಮಾ 2021 ರಲ್ಲಿ ಬಿಡುಗಡೆ ಆಗಿ ಸಾಧಾರಣ ಹಿಟ್ ಎನಿಸಿಕೊಂಡಿತ್ತು. ಇದೀಗ ಜೈಲರ್ ಹೆಸರಿನ ಸಿನಿಮಾದಲ್ಲಿ ನಟಿಸುತ್ತಿದ್ದು, 'ಜೈಲರ್‌' ನಲ್ಲಿ ಕನ್ನಡದ ಶಿವರಾಜ್ ಕುಮಾರ್, ಮಲಯಾಳಂನ ಮೋಹನ್‌ಲಾಲ್, ಬಾಲಿವುಡ್‌ನ ಜಾಕಿ ಶ್ರಾಫ್ ಇನ್ನೂ ಹಲವರು ನಟಿಸುತ್ತಿದ್ದಾರೆ. ಕೆಲವೇ ದಿನಗಳಲ್ಲಿ 'ಜೈಲರ್' ಸಿನಿಮಾ ಬಿಡುಗಡೆ ಆಗಲಿದೆ.