ಪೂಜಾ ಜೊತೆ 'ಬುಟ್ಟಬೊಮ್ಮ' ಡ್ಯಾನ್ಸ್ ಮಾಡೋಕೆ ನಾಚಿದ ದಳಪತಿ ವಿಜಯ್: ವೀಡಿಯೋ ಫುಲ್ ವೈರಲ್

ಇತ್ತೀಚೆಗೆ ತಮಿಳು ನಟ ದಳಪತಿ ವಿಜಯ್ 49ನೇ ವಸಂತಕ್ಕೆ ಕಾಲಿಟ್ಟಿದ್ದರು. ಸದ್ಯ ಲೋಕೇಶ್ ಕನಕರಾಜ್ ನಿರ್ದೇಶನದ 'ಲಿಯೋ' ಚಿತ್ರದಲ್ಲಿ ದಳಪತಿ ನಟಿಸ್ತಿದ್ದಾರೆ. ಬಹುಕೋಟಿ ವೆಚ್ಚದಲ್ಲಿ ಈ ಆಕ್ಷನ್ ಎಂಟರ್‌ಟೈನರ್ ಮೂಡಿ ಬರ್ತಿದೆ. ಸಂಜಯ್ ದತ್ ಸೇರಿದಂತೆ ಘಟಾನುಘಟಿ ಕಲಾವಿದರು ಈ ಚಿತ್ರದಲ್ಲಿ ಬಣ್ಣ ಹಚ್ಚಿದ್ದಾರೆ. ಸದ್ಯ ವಿಜಯ್ ಡ್ಯಾನ್ಸ್ ವಿಡಿಯೋ ವೈರಲ್ ಆಗ್ತಿದೆ.

'ಬೀಸ್ಟ್' ಸಿನಿಮಾದಲ್ಲಿ ದಳಪತಿ ವಿಜಯ್ ಹಾಗೂ ಪೂಜಾ ಹೆಗ್ಡೆ ಒಟ್ಟಿಗೆ ನಟಿಸಿದ್ದರು. ಈ ಸಿನಿಮಾ ಶೂಟಿಂಗ್ ಬಿಡುವಿನ ವೇಳೆ ವಿಜಯ್ ಜೊತೆ ತಮ್ಮದೇ ಸೂಪರ್ ಹಿಟ್ 'ಬುಟ್ಟಬೊಮ್ಮ' ಸಾಂಗ್‌ಗೆ ವಿಜಯ್ ಜೊತೆ ಪೂಜಾ ಹೆಜ್ಜೆ ಹಾಕಿದ್ದಾರೆ. ಸಾಮಾನ್ಯವಾಗಿ ಸ್ಟಾರ್ ನಟರು ಇನ್‌ಸ್ಟಾ ರೀಲ್ಸ್ ಮಾಡಲ್ಲ. ಅದರಲ್ಲೂ ಮತ್ತೊಮ್ಮೆ ನಟನ ಸಾಂಗ್‌ಗೆ ಈ ರೀತಿ ಹೆಜ್ಜೆ ಹಾಕೋದು ಕಮ್ಮಿ. ಆದರೆ ನಮ್ಮ ಹೀರೊ ಸಖತ್ ಹಂಬಲ್. ಅದಕ್ಕೆ ಹೆಜ್ಜೆ ಹಾಕಿದ್ದಾರೆ ಎಂದು ಫ್ಯಾನ್ಸ್ ಹೇಳ್ತಿದ್ದಾರೆ.

ವಿಜಯ್ ಅದ್ಭುತ ಡ್ಯಾನ್ಸರ್ ಅನ್ನೋದ್ರಲ್ಲಿ ದೂಸ್ರಾ ಮಾತಿಲ್ಲ. ಅಲ್ಲು ಅರ್ಜುನ್ - ಪೂಜಾ ರೀತಿಯಲ್ಲಿ 'ಬುಟ್ಟಬೊಮ್ಮ' ಹಾಡಿನ ಹುಕ್‌ ಸ್ಟೆಪ್ ಹಾಕೋಕೆ ಟ್ರೈ ಮಾಡಿದ್ದಾರೆ. ಅದರೆ ಕೊಂಚ ನಾಚಿಕೊಂಡು ಮಕ್ಕಳ ಜೊತೆ ತಲೆ ತಗ್ಗಿಸಿ ಡ್ಯಾನ್ಸ್ ಮಾಡೋಕೆ ಟ್ರೈ ಮಾಡಿರೋದು ವಿಡಿಯೋದಲ್ಲಿ ನೋಡಬಹುದು. ತಮ್ಮ ಫೋನ್‌ನಲ್ಲಿದ್ದ ಈ ವಿಡಿಯೋವನ್ನು ಬಹಳ ದಿನಗಳ ನಂತರ ಪೂಜಾ ಹಂಚಿಕೊಂಡಿದ್ದಾರೆ.

ರಾಕಿ ಎದುರು ಮುಗ್ಗಿರಿಸಿದ್ದ 'ಬೀಸ್ಟ್'

ನೆಲ್ಸನ್ ದಿಲೀಪ್ ಕುಮಾರ್ ನಿರ್ದೇಶನದ 'ಬೀಸ್ಟ್' ಸಿನಿಮಾ ಭಾರೀ ನಿರೀಕ್ಷೆ ಹುಟ್ಟಾಕ್ಕಿತ್ತು. ಕಳೆದ ವರ್ಷ ಏಪ್ರಿಲ್ 13ಕ್ಕೆ ರಿಲೀಸ್ ಆಗಿದ್ದ ಸಿನಿಮಾ ಬಾಕ್ಸಾಫೀಸ್‌ನಲ್ಲಿ ಹೀನಾಯವಾಗಿ ಸೋಲುಂಡಿತ್ತು. ಆದರೆ ಟಿವಿಯಲ್ಲಿ ಪ್ರಸಾರವಾದಾಗ ಒಳ್ಳೆ ಟಿಆರ್‌ಪಿ ಗಿಟ್ಟಿಸಿತ್ತು. ಇನ್ನು 'ಬೀಸ್ಟ್' ಸಿನಿಮಾ ತೆರಕಂಡ ಮರುದಿನ 'KGF- 2' ಸಿನಿಮಾ ರಿಲೀಸ್ ಆಗಿತ್ತು. ತಮಿಳುನಾಡಿನಲ್ಲಿ 'ಬೀಸ್ಟ್' ಥಿಯೇಟರ್‌ಗಳನ್ನು ಕಿತ್ತುಕೊಂಡಿತ್ತು. ವಿಜಯ್ ಸಿನಿಮಾ ಮುಗ್ಗರಿಸಿದ್ದು ಸುಳ್ಳಲ್ಲ.

'ಲಿಯೋ' ಚಿತ್ರದಲ್ಲಿ ದಳಪತಿ

'ಮಾಸ್ಟರ್' ಸಿನಿಮಾ ನಂತರ ಮತ್ತೆ ಲೋಕೇಶ್ ಕನಕರಾಜ್ ಹಾಗೂ ದಳಪತಿ ವಿಜಯ್ 'ಲಿಯೋ' ಚಿತ್ರದಲ್ಲಿ ಒಟ್ಟಿಗೆ ಕೆಲಸ ಮಾಡ್ತಿದ್ದಾರೆ. ತ್ರಿಷಾ ನಾಯಕಿಯಾಗಿ ಬಣ್ಣ ಹಚ್ಚಿದ್ದಾರೆ. ಅರ್ಜುನ್ ಸರ್ಜಾ, ಪ್ರಿಯಾ ಆನಂದ್, ಮನೋಬಲ ಸೇರಿದಂತೆ ದೊಡ್ಡ ತಾರಾಗಣ ಚಿತ್ತದಲ್ಲಿದೆ. ಇತ್ತೀಚೆಗೆ ಚಿತ್ರದ ಫಸ್ಟ್ ಸಾಂಗ್ ರಿಲೀಸ್ ಆಗಿತ್ತು. ಆದರೆ ಅಷ್ಟಾಗಿ ಸೌಂಡ್ ಮಾಡಲಿಲ್ಲ. ಇನ್ನು ಅಕ್ಟೋಬರ್ 19ಕ್ಕೆ ಸಿನಿಮಾ ರಿಲೀಸ್ ಪ್ಲ್ಯಾನ್ ನಡೀತಿದೆ.

ಸೂಪರ್ ಹಿಟ್ ಆಗಿದ್ದ 'ಬುಟ್ಟಬೊಮ್ಮ'

'ಅಲಾ ವೈಕುಂಠಪುರಂಲೊ' ಚಿತ್ರದ 'ಬುಟ್ಟಬೊಮ್ಮ' ಸಿನಿಮಾ ಸೂಪರ್ ಹಿಟ್ ಆಗಿತ್ತು. ಜಾನಿ ಮಾಸ್ಟರ್ ಕೊರಿಯೋಗ್ರಫಿಯಲ್ಲಿ ಅಲ್ಲು ಅರ್ಜುನ್, ಪೂಜಾ ಬಿಂದಾಸ್ ಹೆಜ್ಜೆ ಹಾಕಿದ್ದರು. ಅದರಲ್ಲೂ ಹುಕ್ ಸ್ಟೆಪ್ ಇನ್‌ಸ್ಟಾ ರೀಲ್ಸ್‌ನಲ್ಲಿ ಸಿಕ್ಕಾಪಟ್ಟೆ ವೈರಲ್ ಆಗಿತ್ತು. ಈ ಸಾಂಗ್ ಯೂಟ್ಯೂಬ್‌ನಲ್ಲಿ ಕೋಟಿ ಕೋಟಿ ವೀವ್ಸ್ ಸಾಧಿಸಿ ಗಮನ ಸೆಳೆದಿತ್ತು. ಇದೇ ಸಾಂಗ್‌ಗೆ ವಿಜಯ್- ಪೂಜಾ ರೀಲ್ಟ್ ಮಾಡಿದ್ದಾರೆ.

'ಗುಂಟೂರು ಖಾರ' ಅರಿಯಲ್ವಾ ಪೂಜಾ?

ನಟಿ ಪೂಜಾ ಹೆಗ್ಡೆ ಇತ್ತ ಕಾಲಿವುಡ್, ಟಾಲಿವುಡ್ ಮಾತ್ರವಲ್ಲದೇ ಬಾಲಿವುಡ್‌ನಲ್ಲೂ ಬ್ಯುಸಿಯಾಗಿದ್ದಾರೆ. ತ್ರಿವಿಕ್ರಮ್ ಶ್ರೀನಿವಾಸ್ ನಿರ್ದೇಶನದ 'ಗುಂಟೂರು ಖಾರಂ' ನಟಿಸುತ್ತಿದ್ದಾರೆ. ಆದರೆ ಇತ್ತೀಚೆಗೆ ಡೇಟ್ಸ್ ಪ್ರಾಬ್ಲಂನಿಂದ ಆಕೆ ಚಿತ್ರದಿಂದ ಹೊರ ನಡೆದಿದ್ದಾರೆ ಎನ್ನಲಾಗ್ತಿದೆ. ಈ ಬಗ್ಗೆ ಸ್ಪಷ್ಟನೆ ಇನ್ನು ಸಿಕ್ಕಿಲ್ಲ. ಇನ್ನು ಪೂಜಾ ಮಾಡಬೇಕಿದ್ದ ಪಾತ್ರವನ್ನು ಕನ್ನಡ ನಟಿ ಶ್ರೀಲೀಲಾ ನಿಭಾಯಿಸುವ ಬಗ್ಗೆ ಗುಸುಗುಸು ಶುರುವಾಗಿದೆ.