'ವಾರಿಸು' Vs 'ತುನಿವು': ವಿಜಯ್ ಹಾಗೂ ಅಜಿತ್ ಫ್ಯಾನ್ಸ್ ಮಧ್ಯೆ ಮಧುರೆಯಲ್ಲಿ ಪೋಸ್ಟರ್ ವಾರ್!

ವಿಕೋಪಕ್ಕೆ ತಿರುಗಿದ ಫ್ಯಾನ್ಸ್ ವಾರ್

ಇತ್ತೀಚೆಗೆ ಅಜಿತ್ ಅಭಿನಯದ 'ತುನಿವು' ಸಿನಿಮಾ ಫಸ್ಟ್ ಲುಕ್ ಪೋಸ್ಟರ್ ರಿಲೀಸ್ ಆಗಿತ್ತು. ಇದನ್ನು ದೊಡ್ಡದಾಗಿ ಪ್ರಿಂಟ್ ಹಾಕಿಸಿ ತಮಿಳುನಾಡಿನ ಮಧುರೈ ಬೀದಿಯ ಗೋಡೆಗಳಲ್ಲಿ ಫ್ಯಾನ್ಸ್ ಅಂಟಿಸಿದ್ದಾರೆ. ಇದಕ್ಕೆ ಪ್ರತಿಯಾಗಿ ವಿಜಯ್ ಫ್ಯಾನ್ಸ್ 'ತುನಿವು ಆದರೂ ಸರಿ ಯಾರಾದರೂ ಸರಿ ಮೊದಲು ನಮ್ಮ ದಳಪತಿ ಎಂಟ್ರಿ' ಎಂದು ಪೋಸ್ಟರ್‌ಗಳಲ್ಲಿ ಪ್ರಿಂಟ್ ಹಾಕಿಸಿ ಅಂಟಿಸಿದ್ದಾರೆ. ಇದು ಅಜಿತ್ ಫ್ಯಾನ್ಸ್ ಕೆರಳುವಂತೆ ಮಾಡಿತ್ತು.

ವಿಜಯ್ ಫ್ಯಾನ್ಸ್‌ಗೆ ಅಜಿತ್ ಫ್ಯಾನ್ಸ್ ಕೌಂಟರ್

ದಳಪತಿ ವಿಜಯ್ ಫ್ಯಾನ್ಸ್ ಅಂಟಿಸಿದ ಪೋಸ್ಟರ್‌ಗೆ ಪ್ರತಿಯಾಗಿ ಅಜಿತ್ ಫ್ಯಾನ್ಸ್ "ನಮಗೆ ಎದುರು ನಿಲ್ಲಬೇಕು ಎಂದು ಯೋಚಿಸಬೇಡ. ಯಾಕೆಂದರೆ ನಮಗೆ 'ತುನಿವು' ಜಾಸ್ತಿ. ಒಂದು ವೇಳೆ ಯೋಚಿಸಿದರೆ 'ವಾರಿಸು'ನ ಮುಗಿಸಿಬಿಡ್ತೀವಿ" ಎಂದು ಕೌಂಟರ್‌ ಕೊಟ್ಟು ಪೋಸ್ಟರ್ ಅಂಟಿಸಿದ್ದಾರೆ. ಈ ಪೋಸ್ಟರ್ ಈಗ ಸೋಶಿಯಲ್ ಮೀಡಿಯಾದಲ್ಲಿ ಸಿಕ್ಕಾಪಟ್ಟೆ ವೈರಲ್ ಆಗಿದೆ.

ಅಜಿತ್- ವಿಜಯ್ ಆತ್ಮೀಯ ಸ್ನೇಹಿತರು

ದಳಪತಿ ವಿಜಯ್ ಹಾಗೂ ಥಲಾ ಅಜಿತ್ ಇಬ್ಬರೂ ಕಾಲಿವುಡ್ ಸೂಪರ್ ಸ್ಟಾರ್‌ಗಳು. ಇಬ್ಬರಿಗೂ ದೇಶ ವಿದೇಶಗಳಲ್ಲಿ ಅಭಿಮಾನಿಗಳ ಬಳಗವಿದೆ. ಹೆಚ್ಚು ಕಡಿಮೆ ಒಂದೇ ಸಮಯದಲ್ಲಿ ಚಿತ್ರರಂಗಕ್ಕೆ ಎಂಟ್ರಿ ಕೊಟ್ಟ ಇವರಿಬ್ಬರೂ ಆರಂಭದಲ್ಲಿ ಒಂದೇ ಸಿನಿಮಾದಲ್ಲಿ ಕೂಡ ನಟಿಸಿದ್ದರು. ಇಬ್ಬರ ಮಧ್ಯೆ ವೃತ್ತಿಪರ ಪೈಪೋಟಿ ಇದೆ. ಅದು ಬಿಟ್ಟರೆ ಇಬ್ಬರ ನಡುವೆ ಆತ್ಮೀಯ ಒಡನಾಟವಿದೆ. ಸಾಕಷ್ಟು ವೇದಿಕೆಗಳಲ್ಲಿ ಇದನ್ನು ಹೇಳಿಕೊಂಡಿದ್ದಾರೆ. ಆದರೆ ಅಭಿಮಾನಿಗಳು ಮಾತ್ರ ಕಚ್ಚಾಡುತ್ತಲೇ ಇದ್ದಾರೆ.

ಸಂಕ್ರಾಂತಿಗೆ 'ವಾರಿಸು' Vs 'ತುನಿವು'

ಅಜಿತ್ ಹಾಗೂ ವಿಜಯ್ ಫ್ಯಾನ್ಸ್ ನಡುವೆ ಗಲಾಟೆ ನಡೀತಾನೇ ಇರುತ್ತೆ. ಇದೇ ಕಾರಣಕ್ಕೆ ಇಬ್ಬರ ಸಿನಿಮಾಗಳು ಒಟ್ಟಿಗೆ ಬರದಂತೆ ನೋಡಿಕೊಳ್ಳಲಾಗುತ್ತಿತ್ತು. ಆದರೆ ಈ ಬಾರಿ ಸಂಕ್ರಾಂತಿ ಹಬ್ಬಕ್ಕೆ 'ವಾರಿಸು' ಮತ್ತು 'ತುನಿವು' ಸಿನಿಮಾಗಳನ್ನು ರಿಲೀಸ್ ಮಾಡುವ ಪ್ರಯತ್ನ ನಡೀತಿದೆ. ಇದರಿಂದ ಮತ್ತೆ ಫ್ಯಾನ್ಸ್ ಮಧ್ತೆ ತಿಕ್ಕಾಟ, ಗಲಾಟೆ ಹೆಚ್ಚಾಗುವ ಸಾಧ್ಯತೆ ಇದೆ. ಕೊನೆ ಕ್ಷಣದಲ್ಲಿ ಯಾವುದಾದರೂ ಸಿನಿಮಾ ರಿಲೀಸ್ ಡೇಟ್ ಬದಲಾಗುತ್ತಾ ಕಾದು ನೋಡಬೇಕು.