Beast Movie : 'ಕೆಜಿಎಫ್ 2' ಎದುರಾಳಿ 'ಬೀಸ್ಟ್'ಗೆ ಹಿನ್ನಡೆ, ವಿದೇಶದಲ್ಲಿ ಸಿನಿಮಾಕ್ಕೆ ನಿಷೇಧ

ಕುವೈತ್‌ನಲ್ಲಿ ಸಿನಿಮಾಕ್ಕೆ ನಿಷೇಧ

ಭಾರತೀಯ ಸಿನಿಮಾಗಳಿಗೆ ದೊಡ್ಡ ಮಾರುಕಟ್ಟೆಯಾದ ಅರಬ್ ದೇಶಗಳ ಕುವೈತ್‌ ರಾಷ್ಟ್ರದಲ್ಲಿ 'ಬೀಸ್ಟ್' ಸಿನಿಮಾ ಸೆನ್ಸಾರ್ ಪಾಸ್ ಮಾಡಲು ವಿಫಲವಾಗಿದ್ದು, ಅಲ್ಲಿ ಸಿನಿಮಾದ ಪ್ರದರ್ಶನವನ್ನು ತಡೆ ಹಿಡಿಯಲಾಗಿದೆ. ಈ ಬಗ್ಗೆ ಸಿನಿಮಾ ಬಾಕ್ಸ್ ಆಫೀಸ್ ವಿಶ್ಲೇಷಕ ರಮೇಶ್ ಬಾಲಾ ಟ್ವೀಟ್ ಮಾಡಿದ್ದು, ಸಿನಿಮಾವು ಇಸ್ಲಾಮಿಕ್ ಭಯೋತ್ಪಾದನೆಯ ಬಗ್ಗೆ ಇರುವ ಕಾರಣ ಸಿನಿಮಾವನ್ನು ಪ್ರದರ್ಶಿಸಲಾಧ್ಯ ಎಂದು ಕುವೈತ್‌ನ ಮಾಹಿತಿ ಮತ್ತು ಪ್ರಸಾರ ಇಲಾಖೆ ಹೇಳಿದೆ.

ಭಯೋತ್ಪಾಧಕರು, ಪಾಕ್ ವಿರುದ್ಧ ಯುದ್ಧ

ಭಯೋತ್ಪಾದಕರು ಚೆನ್ನೈನ ಮಾಲ್‌ ಒಂದರಲ್ಲಿ ಜನರನ್ನು ಒತ್ತೆಯಾಳಾಗಿರಿಸಿಕೊಂಡಿರುತ್ತಾರೆ. ಅದೇ ಮಾಲ್‌ನಲ್ಲಿ ಸಿಲುಕಿರುವ ವಿಜಯ್ ಭಯೋತ್ಪಾದಕರೊಟ್ಟಿಗೆ ಹೋರಾಡಿ ಅವರನ್ನು ರಕ್ಷಿಸುವ ಕತೆಯನ್ನು ಸಿನಿಮಾ ಹೊಂದಿದೆ. 'ಬೀಸ್ಟ್' ಸಿನಿಮಾದಲ್ಲಿ ಇಸ್ಲಾಂ ಭಯೋತ್ಪಾದನೆ ತೋರಿಸಲಾಗಿದೆ. ಹಾಗೂ ಪಾಕಿಸ್ತಾನ ಸೇರಿದಂತೆ ಅರಬ್ ದೇಶಗಳ ಬಗ್ಗೆ ಋಣಾತ್ಮಕ ಸಂಭಾಷಣೆ, ಸಂದೇಶ ಸಾರುವ ದೃಶ್ಯಗಳಿವೆ ಎಂಬ ಕಾರಣಕ್ಕೆ 'ಬೀಸ್ಟ್' ಪ್ರದರ್ಶನಕ್ಕೆ ನಿಷೇಧ ಹೇರಲಾಗಿದೆ. ಅದೇ ಯುಎಇಯಲ್ಲಿ ಸಿನಿಮಾ ಪ್ರದರ್ಶನಕ್ಕೆ ಅನುಮತಿ ನೀಡಲಾಗಿದೆ.

'ಕುರುಪ್', 'ಎಫ್‌ಐಆರ್' ಸಿನಿಮಾಗಳಿಗೂ ನಿಷೇಧ

ಮಲಯಾಳಂನ 'ಕುರುಪ್' ಹಾಗೂ 'ಎಫ್‌ಐಆರ್' ಸಿನಿಮಾಗಳ ಪ್ರದರ್ಶನಕ್ಕೂ ಕುವೈತ್‌ನಲ್ಲಿ ನಿಷೇಧ ಹೇರಲಾಗಿತ್ತು. ಕೊಲೆಗಾರನೊಬ್ಬ ಅರಬ್ ದೇಶಗಳಲ್ಲಿ ಆಶ್ರಮ ಪಡೆದುಕೊಳ್ಳುವ ಕತೆ 'ಕುರುಪ್' ಸಿನಿಮಾದಲ್ಲಿತ್ತು ಹಾಗಾಗಿ ಆ ಸಿನಿಮಾದ ಪ್ರದರ್ಶನ ತಡೆ ಹಿಡಿಯಲಾಗಿತ್ತು. 'ಎಫ್‌ಐಆರ್' ಸಿನಿಮಾದಲ್ಲಿ ಇಸ್ಲಾಂ ಭಯೋತ್ಪಾದನೆ ಕುರಿತ ಅಂಶಗಳಿದ್ದ ಕಾರಣ ಆ ಸಿನಿಮಾವನ್ನು ಕುವೈತ್‌ನಲ್ಲಿ ತಡೆ ಹಿಡಿಯಲಾಗಿತ್ತು. ಇತರ ದೇಶಗಳಿಗೆ ಹೋಲಿಸಿದರೆ ಕುವೈತ್‌ನಲ್ಲಿ ಸೆನ್ಸಾರ್ ನಿಯಮಗಳು ಬಹಳ ಕಠಿಣವಾಗಿವೆ.

'ಬೀಸ್ಟ್' ಸಿನಿಮಾದ ಕತೆ ಏನು?

'ಬೀಸ್ಟ್' ಸಿನಿಮಾದಲ್ಲಿ ವಿಜಯ್ ಮಾಜಿ ಸೈನಿಕನ ಪಾತ್ರದಲ್ಲಿ ನಟಿಸಿದ್ದು, ಮಾಲ್‌ನಲ್ಲಿ ಭಯೋತ್ಪಾದಕರ ವಿರುದ್ಧ ಹೊರಾಡುವ ಕತೆಯ ಜೊತೆಗೆ ಪಾಕ್ ವಿರುದ್ಧ ಯುದ್ಧದ ಕತೆಯೂ ಸಿನಿಮಾದಲ್ಲಿದೆ. ಸಿನಿಮಾದ ಟ್ರೇಲರ್ ಈಗಾಗಲೇ ಬಿಡುಗಡೆ ಆಗಿದ್ದು, ಟ್ರೇಲರ್‌ ಬಗ್ಗೆ ಮಿಶ್ರ ಪ್ರತಿಕ್ರಿಯೆಗಳು ವ್ಯಕ್ತವಾಗಿವೆ. 'ಬೀಸ್ಟ್' ಸಿನಿಮಾದಲ್ಲಿ ವಿಜಯ್ ಜೊತೆ ಪೂಜಾ ಹೆಗ್ಡೆ ನಾಯಕಿಯಾಗಿ ನಟಿಸಿದ್ದಾರೆ. ಹಾಸ್ಯನಟ ಯೋಗಿಬಾಬು ಇದ್ದಾರೆ. ಸಿನಿಮಾವನ್ನು ನೆಲ್ಸನ್ ದಿಲೀಪ್ ನಿರ್ದೇಶನ ಮಾಡಿದ್ದು, ನಿರ್ಮಾಪಕ ಕಲಾನಿಧಿ ಮಾರನ್ ನಿರ್ಮಾಣ ಮಾಡಿದ್ದಾರೆ.