ಶ್ರೀಲೀಲಾ ಅನ್ನು ಕೈಬಿಟ್ಟ ತೆಲುಗು ಸಿನಿಮಾದಿಂದ ಅನುಪಮಾ ಪರಮೇಶ್ವರನ್ ಸಹ ಹೊರಗೆ!

ಕನ್ನಡತಿ ಶ್ರೀಲೀಲಾ ಅನ್ನು ಆರಿಸಲಾಗಿತ್ತು

ಸಿದ್ದು ಜೊನ್ನಲಗೊಂಡ ನಟಿಸಿದ್ದ 'ಡಿಜೆ ಟಿಲ್ಲು' ತೆಲುಗು ಸಿನಿಮಾ ಈ ವರ್ಷ ಸದ್ದು ಮಾಡಿದ ತೆಲುಗು ಸಿನಿಮಾಗಳಲ್ಲಿ ಒಂದು. ಸಿನಿಮಾದ ಹಾಸ್ಯ, ನಾಯಕ ನಟನ ಸ್ಟೈಲ್, ಹಾಡುಗಳು ಬಹಳ ಹಿಟ್ ಆಗಿದ್ದವು. ಇದೀಗ ಸಿನಿಮಾದ ಮುಂದುವರೆದ ಭಾಗ ನಿರ್ಮಾಣಕ್ಕೆ ಸಜ್ಜಾಗಿದ್ದು. ಸಿನಿಮಾದ ನಾಯಕಿ ಪಾತ್ರಕ್ಕೆ ಮೊದಲಿಗೆ ಕನ್ನಡತಿ ಶ್ರೀಲೀಲಾ ಅವರನ್ನು ಆರಿಸಲಾಗಿತ್ತು. ಬಳಿಕ ಅವರನ್ನು ತೆಗೆದು ಆ ಜಾಗಕ್ಕೆ ಅನುಪಮಾ ಅವರನ್ನು ಆಯ್ಕೆ ಮಾಡಲಾಯ್ತು.

ಅನುಪಮಾ ಚಿತ್ರೀಕರಣ ತೊರೆಯಲು ಕಾರಣ?

ಅನುಪಮಾ ಪರಮೇಶ್ವರನ್ ಅವರು ಸಿನಿಮಾದ ಶೂಟಿಂಗ್ ಆರಂಭಿಸಿ ಕೆಲ ದಿನಗಳ ಕಾಲ ಚಿತ್ರೀಕರಣದಲ್ಲಿಯೂ ಪಾಲ್ಗೊಂಡಿದ್ದರು. ಆದರೆ ಈಗ ಹಠಾತ್ತನೆ ಚಿತ್ರೀಕರಣ ತ್ಯಜಿಸಿ ಹೋಗಿದ್ದಾರೆ ಎನ್ನಲಾಗುತ್ತಿದೆ. ಇದಕ್ಕೆ ಸೂಕ್ತ ಕಾರಣಗಳನ್ನು ಚಿತ್ರತಂಡ ನೀಡಿಲ್ಲವಾದರೂ, ಚಿತ್ರೀಕರಣ ಮಾಡುತ್ತಿರುವ ರೀತಿಗೂ ಹೇಳಿದ್ದ ಕತೆಗೂ ಸಂಬಂಧವಿಲ್ಲವೆಂದು ಅನುಪಮಾ ಆರೋಪಿಸಿ ಹೊರನಡೆದಿದ್ದಾರೆ ಎನ್ನಲಾಗುತ್ತಿದೆ.

ಮಡೋನಾ ಸೆಬಾಸ್ಟಿಯನ್‌ಗೆ ಗಾಳ

ಅನುಪಮಾ ಪರಮೇಶ್ವರನ್ ಅವರ ನಿರ್ಗಮನದಿಂದ ತೆರವಾಗಿರುವ ನಾಯಕಿ ಸ್ಥಾನವನ್ನು ತುಂಬಲು ಮತ್ತೊಬ್ಬ ಮಲಯಾಳಿ ಸುಂದರಿ ಮಡೊನಾ ಸೆಬಾಸ್ಟಿಯನ್ ಅನ್ನು ಕರೆತರುವುದಾಗಿ 'ಡಿಜೆ ಟಿಲ್ಲು 2' ಚಿತ್ರತಂಡ ಘೋಷಿಸಿದೆ. ಆದರೆ ಅಭಿಮಾನಿಗಳು ಇದರ ಬಗ್ಗೆ ಅಸಮಾಧಾನ ವ್ಯಕ್ತಪಡಿಸಿದ್ದಾರೆ. ಸೆಬಾಸ್ಟಿಯನ್, 'ಡಿಜೆ ಟಿಲ್ಲು' ನಾಯಕಿ ಪಾತ್ರಕ್ಕೆ ಸೂಟ್ ಆಗುವುದಿಲ್ಲ. ಮೊದಲ ಭಾಗದಲ್ಲಿದ್ದ ನೇಹಾ ಶೆಟ್ಟಿಯನ್ನೇ ಕರೆತನ್ನಿ ಎಂದು ಒತ್ತಾಯಿಸಿದ್ದಾರೆ.

ನೇಹಾ ಶೆಟ್ಟಿಯನ್ನು ಕರೆತರುವಂತೆ ಬೇಡಿಕೆ

'ಡಿಜೆ ಟಿಲ್ಲು' ಸಿನಿಮಾದ ಮೊದಲ ಭಾಗದಲ್ಲಿ ಮಂಗಳೂರು ಮೂಲದ ನೇಹಾ ಶೆಟ್ಟಿ ನಾಯಕಿಯಾಗಿ ನಟಿಸಿದ್ದರು. ಆಕೆಯ ಪಾತ್ರದ ಬಗ್ಗೆ ಬಹಳ ಪ್ರಶಂಸೆ ವ್ಯಕ್ತವಾಗಿತ್ತು. ಆದರೆ ಈಗ ನಿರ್ದೇಶಕರು ಬೇರೆ ನಾಯಕಿಯನ್ನು ಇಟ್ಟುಕೊಂಡು ಬೇರೊಂದು ರೀತಿಯ ಕತೆ ಹೇಳಲು ತಯಾರಾಗಿದ್ದಾರೆ. 2022 ರ ಫೆಬ್ರವರಿಯಲ್ಲಿ ಬಿಡುಗಡೆ ಆಗಿದ್ದ 'ಡಿಜೆ ಟಿಲ್ಲು' ಸಿನಿಮಾವನ್ನು ವಿಮಲ್ ಕೃಷ್ಣ ನಿರ್ದೇಶನ ಮಾಡಿದ್ದರು. ಸೂರ್ಯದೇವರ ನಾಗ ವಂಶಿ ನಿರ್ಮಾಣ ಮಾಡಿದ್ದರು. ಸಂಗೀತ ನೀಡಿದ್ದು ಎಸ್ ತಮನ್. ನಾಯಕಿ ಹೊರತಾಗಿ ಇದೇ ತಂಡ 'ಡಿಜೆ ಟಿಲ್ಲು 2' ಸಿನಿಮಾಕ್ಕೆ ಒಂದಾಗಿದೆ.