2022ರಲ್ಲಿ ಸಾಲು ಸಾಲು ಸೋಲು; ಅಪ್ಪ - ಮಕ್ಕಳಿಗೆ ಇದು ಕೆಟ್ಟ ವರ್ಷ!

ನಾಗಾರ್ಜುನ ಚಿತ್ರ ದೊಡ್ಡ ಫ್ಲಾಪ್

ಈ ವರ್ಷದ ಸಂಕ್ರಾಂತಿ ಹಬ್ಬದ ಪ್ರಯುಕ್ತ ನಾಗಾರ್ಜುನ ಹಾಗೂ ಪುತ್ರ ನಾಗ ಚೈತನ್ಯ ನಟನೆಯ 'ಬಂಗಾರ್ರಾಜು' ಚಿತ್ರ ಬಿಡುಗಡೆಗೊಂಡಿತ್ತು. ಈ ಚಿತ್ರ ಸಾಧಾರಣ ಎಂಬ ಫಲಿತಾಂಶ ಪಡೆದುಕೊಂಡಿತು. ಇದೊಂದೇ ಸಿನಿಮಾ ವಿಚಾರವಾಗಿ ಅಕ್ಕಿನೇನಿ ಕುಟುಂಬ ಕಂಡ ತುಸು ಸಂತಸದ ಸುದ್ದಿ ಎನ್ನಬಹುದು. ಇನ್ನುಳಿದಂತೆ ನಾಗಾರ್ಜುನ ನಟನೆಯ ಬಹುನಿರೀಕ್ಷಿತ ಘೋಸ್ಟ್ ಚಿತ್ರ ಬಾಕ್ಸ್ ಆಫೀಸ್‌ನಲ್ಲಿ ಮಕಾಡೆ ಮಲಗಿತು ಹಾಗೂ ನಾಗಾರ್ಜುನ ನಿರೂಪಣೆಯಲ್ಲಿ ಮೂಡಿಬಂದ ಬಿಗ್ ಬಾಸ್ ತೆಲುಗು ಸಹ ನೀರಸ ಪ್ರತಿಕ್ರಿಯೆ ಪಡೆದುಕೊಂಡಿತು. ಅಷ್ಟೇ ಅಲ್ಲದೇ ಮುಂದಿನ ಬಿಗ್ ಬಾಸ್ ಆವೃತ್ತಿಯನ್ನು ಬಾಲಕೃಷ್ಣ ನಡೆಸಲಿದ್ದಾರೆ ಎಂಬ ಸುದ್ದಿಯೂ ಇದ್ದು, ಇದು ನಾಗಾರ್ಜುನಗೆ ಮತ್ತೊಂದು ಹಿನ್ನಡೆ ಎಂದೇ ಹೇಳಬಹುದು.

ನಾಗಚೈತನ್ಯ ಚಿತ್ರಗಳ ಫೇಲ್ಯೂರ್

ಇನ್ನು ನಾಗಚೈತನ್ಯ ತಂದೆ ಜತೆ ನಟಿಸಿದ್ದ 'ಬಂಗಾರ್ರಾಜು' ಸಾಧಾರಣ ಗೆಲುವು ಕಂಡ ಬಳಿಕ 'ಥ್ಯಾಂಕ್ ಯೂ' ಎಂಬ ಚಿತ್ರದಲ್ಲಿ ನಾಯಕನಾಗಿ ಅಭಿನಯಿಸಿದ್ದರು. ತೆಲುಗು ಚಿತ್ರರಂಗದಲ್ಲಿ ಈ ವರ್ಷ ಅತಿದೊಡ್ಡ ಸೋಲು ಕಂಡ ಚಿತ್ರಗಳ ಪೈಕಿ ಈ ಥ್ಯಾಂಕ್ ಯೂ ಕೂಡ ಒಂದು. ಅಷ್ಟೇ ಅಲ್ಲದೇ ನಾಗ ಚೈತನ್ಯ ಆಮೀರ್ ಖಾನ್ ನಟನೆಯ 'ಲಾಲ್ ಸಿಂಗ್ ಛಡ್ಡಾ' ಮೂಲಕ ಬಾಲಿವುಡ್‌ಗೂ ಕೂಡ ಕಾಲಿಟ್ಟಿದ್ದರು. ಆದರೆ ಈ ಚಿತ್ರ ಕೂಡ ಕೆಟ್ಟ ಸೋಲನ್ನು ಕಂಡಿತ್ತು.

ಬಿಡುಗಡೆಯಾಗಲೇ ಇಲ್ಲ ಅಖಿಲ್ ಚಿತ್ರ

ಇನ್ನು ನಾಗಾರ್ಜುನ ಅವರ ದ್ವಿತೀಯ ಪುತ್ರ ಅಖಿಲ್ ಅಕ್ಕಿನೇನಿ ನಟನೆಯ 'ಏಜೆಂಟ್' ಚಿತ್ರ ಈ ವರ್ಷ ಬಿಡುಗಡೆಗೊಳ್ಳಬೇಕಿತ್ತು. ಆದರೆ ಚಿತ್ರ ಆಗ ಬಿಡುಗಡೆಯಾಗಲಿದೆ, ಈಗ ಬಿಡುಗಡೆಯಾಗಲಿದೆ ಎಂಬ ಸುದ್ದಿ ಹೊರಬಿತ್ತೇ ಹೊರತು ಚಿತ್ರ ಮಾತ್ರ ತೆರೆಗೆ ಬಾರದೇ ಮುಂದಿನ ವರ್ಷಕ್ಕೆ ಮುಂದೂಡಲ್ಪಟ್ಟಿದೆ. ಹೀಗೆ ಅಖಿಲ್ ಅಕ್ಕಿನೇನಿ ಕೂಡ ಈ ವರ್ಷ ಮನರಂಜಿಸುವಲ್ಲಿ ಸಫಲರಾಗಿಲ್ಲ. ಒಟ್ಟಿನಲ್ಲಿ ಸಿನಿಮಾ ಕ್ಷೇತ್ರಕ್ಕೆ ಗೋಲ್ಡನ್ ಇಯರ್ ಆಗಿರುವ ಈ ವರ್ಷ ಅಕ್ಕನೇನಿ ಕುಟುಂಬದ ಕೊಡುಗೆ ಮಾತ್ರ ಶೂನ್ಯ.