ಗೆಳೆಯನಿಗೆ ಧನ್ಯವಾದ ಹೇಳುತ್ತಾ ಕಣ್ಣೀರು ಹಾಕಿದ ಅಲ್ಲು ಅರ್ಜುನ್

ನನ್ನ ಜೀವನದಲ್ಲಿ ಕೆಲವರಿಗೆ ಮಾತ್ರ ನಾನು ಋಣಿ: ಅಲ್ಲು ಅರ್ಜುನ್

''ನನ್ನ ಜೀವನದಲ್ಲಿ ಕೆಲವರಿಗೆ ಮಾತ್ರವೇ ನಾನು ಋಣಿ. ನನ್ನ ತಾತ ಅಲ್ಲು ರಾಮಲಿಂಗಯ್ಯ. ನನಗೆ ಜೀವ ಕೊಟ್ಟ ನನ್ನ ತಂದೆ-ತಾಯಿ ಹಾಗೂ ಮೊದಲ ಸಿನಿಮಾದಿಂದಲೂ ನನ್ನ ಬೆನ್ನು ತಟ್ಟುತ್ತಾ ಬರುತ್ತಿರುವ ಮಾವ ಚಿರಂಜೀವಿ ಹಾಗೂ ನನ್ನ ವೃತ್ತಿ ಜೀವನಕ್ಕೆ ತಿರುವು ನೀಡಿದ ನಿರ್ದೇಶಕ ಸುಕುಮಾರ್ ಇವರಿಗಷ್ಟೆ ನಾನು ಋಣಿಯಾಗಿರುವುದು. ಇನ್ನಾರಿಗೂ ಇಲ್ಲ'' ಎನ್ನುತ್ತಾ ಅತ್ತು ಬಿಟ್ಟರು ಅಲ್ಲು ಅರ್ಜುನ್.

ಮೊದಲು ನೆನಪಿಗೆ ಬಂದಿದ್ದು ಸುಕುಮಾರ್: ಅಲ್ಲು ಅರ್ಜುನ್

ಮತ್ತೆ ಮಾತು ಮುಂದುವರೆಸಿದ ಅಲ್ಲು ಅರ್ಜುನ್, 'ಆರ್ಯ' ಸಿನಿಮಾ ಸೂಪರ್ ಹಿಟ್ ಆಗಿತ್ತು. ನನ್ನ ವೃತ್ತಿಯಲ್ಲಿ ಬಹಳ ದೊಡ್ಡ ತಿರುವು ಬಂದಿತ್ತು. ಹಲವು ಅವಕಾಶಗಳು ನನ್ನನ್ನು ಅರಸಿ ಬರುತ್ತಿದ್ದವು. ಆ ಸಮಯದಲ್ಲಿ 80 ಲಕ್ಷ ಕೊಟ್ಟು ಬಹಳ ದುಬಾರಿಯಾದ ಸ್ಪೋರ್ಟ್ಸ್ ಕಾರೊಂದನ್ನು ಖರೀದಿ ಮಾಡಿದ್ದೆ. ಅದ್ಭುತವಾದ ಕಾರ್ ಅದು. ಆ ಕಾರಿನ ಸ್ಟೀರಿಂಗ್ ವ್ಹೀಲ್‌ ಮೇಲೆ ಕೈ ಇಟ್ಟು, ಇದು ಯಾರಿಂದ ಸಾಧ್ಯವಾಯಿತು ಎಂದು ನೆನಪಿಸಿಕೊಂಡಾಗ ನನಗೆ ಮೊದಲ ನೆನಪು ಬಂದ ವ್ಯಕ್ತಿ ಸುಕುಮಾರ್'' ಎಂದರು ಅಲ್ಲು ಅರ್ಜುನ್. ನಟನ ಮಾತು ಕೇಳಿ ಮುಂದೆ ಕೂತಿದ್ದ ಸುಕುಮಾರ್ ಕಣ್ಣೀರು ಹಾಕಿದರು.

ಸುಕುಮಾರ್ ನನ್ನ ಜೀವನದಲ್ಲಿ ಬಹಳ ಪ್ರಮುಖ ವ್ಯಕ್ತಿ: ಅಲ್ಲು ಅರ್ಜುನ್

''ಸುಕುಮಾರ್ ನನ್ನ ಜೀವನದಲ್ಲಿ ಅದೆಷ್ಟು ಮುಖ್ಯ ವ್ಯಕ್ತಿ ಎಂದರೆ ಅದನ್ನು ಹೇಳಿಕೊಳ್ಳಲು ಆಗುವುದಿಲ್ಲ. ನನ್ನ ತಂದೆ-ತಾಯಿ, ಪತ್ನಿ ಇವರ ಬಗ್ಗೆ ನನಗೆ ಇರುವ ಪ್ರೀತಿ ಗೌರವವನ್ನು ಹೇಗೆ ಬಹಿರಂಗವಾಗಿ ಮಾತುಗಳಲ್ಲಿ ಹೇಳಲು ಆಗುವುದಿಲ್ಲವೋ ಹಾಗೆಯೇ ಸುಕುಮಾರ್ ಬಗ್ಗೆ ನನಗೆ ಇರುವ ಪ್ರೀತಿಯನ್ನು ಮಾತುಗಳಲ್ಲಿ ವ್ಯಕ್ತಪಡಿಸಲು ಆಗುವುದಿಲ್ಲ. ಸುಕುಮಾರ್ ಇಲ್ಲದಿದ್ದರೆ ಅಲ್ಲು ಅರ್ಜುನ್ ಅದೇನಾಗಿಬಿಡುತ್ತಿದ್ದನೋ ಗೊತ್ತಿಲ್ಲ'' ಎಂದರು ಅಲ್ಲು ಅರ್ಜುನ್.

'ಆರ್ಯ'ದಿಂದ ಬೆಳಕಿಗೆ ಬಂದ ಇಬ್ಬರು ಸ್ಟಾರ್‌ಗಳು

2004ನೇ ಇಸವಿಯ ಮೇ 7 ರಂದು ತೆಲುಗಿನ 'ಆರ್ಯ' ಸಿನಿಮಾ ಬಿಡುಗಡೆ ಆಯಿತು. ಅದು ನಿರ್ದೇಶಕರಾಗಿ ಸುಕುಮಾರ್‌ಗೆ ಮೊದಲ ಸಿನಿಮಾ. ಆಗ ತಾನೇ ಹೀರೋ ಆಗಿದ್ದ ಅಲ್ಲು ಅರ್ಜುನ್‌ಗೆ ನಾಯಕ ನಟನಾಗಿ ಎರಡನೇ ಸಿನಿಮಾ. 'ಆರ್ಯ' ಸಿನಿಮಾ ತೆಲುಗು ಚಿತ್ರರಂಗದಲ್ಲಿ ಇತಿಹಾಸ ಸೃಷ್ಟಿಸಿಬಿಟ್ಟಿತು. ಹಲವು ದಾಖಲೆಗಳನ್ನು ಬರೆಯಿತು. ಆ ಸಿನಿಮಾ ಮೂಲಕ ಅಲ್ಲು ಅರ್ಜುನ್ ಸ್ಟೈಲಿಷ್ ಸ್ಟಾರ್ ಆದರು. ಸುಕುಮಾರ್ ಎಂಬ ಅದ್ಭುತ ನಿರ್ದೇಶಕ ತೆಲುಗು ಚಿತ್ರರಂಗಕ್ಕೆ ದೊರೆತರು. 'ಆರ್ಯ'ದಿಂದ ಸ್ಟಾರ್‌ಗಳಾದ ಅಲ್ಲು ಅರ್ಜುನ್ ಹಾಗೂ ಸುಕುಮಾರ್ ಇಂದಿಗೂ ಸ್ಟಾರ್‌ಗಳಾಗಿ ಮಿಂಚುತ್ತಿದ್ದಾರೆ. ಹಲವು ಅದ್ಭುತ ಸಿನಿಮಾಗಳನ್ನು ನೀಡುತ್ತಲೇ ಬರುತ್ತಿದ್ದಾರೆ. ಇವರಿಬ್ಬರ ಕಾಂಬಿನೇಶನ್‌ನ ಹೊಸ ಸಿನಿಮಾ 'ಪುಷ್ಪ' ಸಿನಿಮಾ ಸೂಪರ್-ಡೂಪರ್ ಹಿಟ್ ಆಗಿದೆ.