ಪ್ರಭಾಸ್ ಜೊತೆಗಿನ ಫೋಟೊ ಹಂಚಿಕೊಂಡ ಅನುಷ್ಕಾ ಶೆಟ್ಟಿ: ಮತ್ತೆ ಹಬ್ಬಿತು ಹೊಸ ಸುದ್ದಿ!

ಟಾಲಿವುಡ್ ಸೂಪರ್‌ ಹಿಟ್ ಜೋಡಿ ಅನುಷ್ಕಾ-ಪ್ರಭಾಸ್!

ಟಾಲಿವುಡ್‌ನಲ್ಲಿ ಅನೇಕ ಸೂಪರ್‌ಹಿಟ್ ಜೋಡಿಗಳಿವೆ. ಅದರಲ್ಲಿ ಪ್ರಭಾಸ್ ಮತ್ತು ಅನುಷ್ಕಾ ಶೆಟ್ಟಿ ಅವರ ಸುಂದರ ಜೋಡಿ ಕೂಡ ಒಂದು. ಅನುಷ್ಕಾ, ಪ್ರಭಾಸ್ ಒಟ್ಟಿಗೆ ಸಿನಿಮಾ ಮಾಡುತ್ತಿದ್ದಾರೆ ಅಂದರೆ ಅದು ಹಿಟ್ ಎಂದೆ ಅರ್ಥ, ಅಷ್ಟರ ಮಟ್ಟಿಗೆ ಈ ಜೋಡಿ ಜನಪ್ರಿಯ. ಮತ್ತು ಇವರ ಜೋಡಿಗೆ ಅಷ್ಟೇ ದೊಡ್ಡ ಅಭಿಮಾನಿ ಬಳಗ ಕೂಡ ಇದೆ. ಈ ಜೋಡಿ ಅಭಿನಯದ ಮಿರ್ಚಿ ಚಿತ್ರಕ್ಕೆ ತೆರೆಕಂಡು 9 ವರ್ಷ ಅಗಿದೆ.

9 ವರ್ಷದ 'ಮಿರ್ಚಿ' ನೆನಪು ಹಂಚಿಕೊಂಡ ಅನುಷ್ಕಾ!

2013 ರಲ್ಲಿ ನಿರ್ದೇಶಕ ಕೊರಟಾಲ ಶಿವ ಅವರು 'ಮಿರ್ಚಿ' ಚಿತ್ರವನ್ನು ನಿರ್ದೇಶನ ಮಾಡಿದರು. ಈ ಚಿತ್ರ ಸೂಪರ್ ಹಿಟ್ ಆಯ್ತು. ಈ ಚಿತ್ರ ರಿಲೀಸ್ ಆಗಿ 9 ವರ್ಷಗಳನ್ನು ಪೂರೈಸಿದೆ. ಹಾಗಾಗಿ ಚಿತ್ರದ ನಾಯಕ ನಟಿ ಅನುಷ್ಕಾ ಶೆಟ್ಟಿ ಚಿತ್ರವನ್ನು ನೆನಪಿಸಿಕೊಂಡು, ಸಾಮಾಜಿಕ ಜಾಲತಾಣದಲ್ಲಿ ಈ ಬಗ್ಗೆ ಬರೆದುಕೊಂಡಿದ್ದಾರೆ. ''ಎಲ್ಲರಿಗೂ ಧನ್ಯವಾದಗಳು... ಬ್ಲಾಕ್‌ಬಸ್ಟರ್ 'ಮಿರ್ಚಿ'ಗೆ 9 ವರ್ಷಗಳು.'' ಎಂದು ಬರೆದು ಪೋಸ್ಟರ್ ಹಂಚಿಕೊಂಡಿದ್ದಾರೆ.

ಲವ್ ಗಾಸಿಪ್ ಬಗ್ಗೆ ಅನುಷ್ಕಾ-ಪ್ರಭಾಸ್ ಮೌನ!

ಇನ್ನು ಅನುಷ್ಕಾ ಶೆಟ್ಟಿ ಮತ್ತು ಪ್ರಭಾಸ್ ಇಬ್ಬರೂ ಕೂಡ ಮದುವೆ ಆಗಿಲ್ಲ. ಅಲ್ಲದೇ ಈ ಜೋಡಿ ಗುಟ್ಟಾಗಿ ಪ್ರೀತಿ ಮಾಡುತ್ತಿದೆ ಎನ್ನುವ ಗಾಸಿಪ್ ಮೊದಲಿನಿಂದಲೂ ಇದೆ. ಇಬ್ಬರೂ ಮದುವೆ ಆಗುತ್ತಾರೆ ಎಂದು ಹಲವು ಬಾರಿ ಹೇಳಲಾಗಿತ್ತು. ಆದರೆ ತಮ್ಮ ಮದುವೆ ಬಗ್ಗೆ ಎಷ್ಟೇ ಗಾಸಿಪ್‌ಗಳು ಹಬ್ಬಿದರು ಕೂಡ ಈ ಜೋಡಿ ಮಾತ್ರ ಈ ವಿಚಾರದಲ್ಲಿ ಮೌನ ಮುರಿದಿಲ್ಲ. ಪ್ರಭಾಸ್ ಮತ್ತು ಅನುಷ್ಕಾ ಕೊನೆಯದಾಗಿ ಒಟ್ಟಿಗೆ ಕಾಣಿಸಿಕೊಂಡ ಸಿನಿಮಾ ಬಾಹುಬಲಿ. ಆ ನಂತರ ಈ ಜೋಡಿ ಮತ್ತೆ ಒಟ್ಟಿಗೆ ಬಂದಿಲ್ಲ.

ಅಭಿನಯಕ್ಕೆ ವಿದಾಯ ಹೇಳ್ತಾರ ಅನುಷ್ಕಾ ಶೆಟ್ಟಿ?

ಬಾಹುಬಲಿ ಸಿನಿಮಾದ ನಂತರ ನಟಿ ಅನುಷ್ಕಾ ಶೆಟ್ಟಿ ಅಷ್ಟಾಗಿ ಸಿನಿಮಾಗಳನ್ನು ಮಾಡುತ್ತಿಲ್ಲ. ಸಿನಿಮಾ ಆಯ್ಕೆಯಲ್ಲಿ ತುಂಬಾನೇ ಸೀಮಿತ ಆಗಿದ್ದಾರೆ. ಕೊನೆಯದಾಗಿ ಅನುಷ್ಕಾ ಶೆಟ್ಟಿ 'ನಿಶಬ್ಧಂ' ಚಿತ್ರದಲ್ಲಿ ಕಾಣಿಸಿಕೊಂಡಿದ್ದಾರೆ. ಆ ಬಳಿಕ ಇನ್ನು ಯಾವುದೇ ಹೊಸ ಸಿನಿಮಾ ಪ್ರಕಟ ಮಾಡಿಲ್ಲ. ಹಾಗಾಗಿ ಅನುಷ್ಕಾ ಶೆಟ್ಟಿ ಇನ್ನು ಸಿನಿಮಾ ಮಾಡುವುದು ಅನುಮಾನ ಎನ್ನುವ ಸುದ್ದಿ ಕೂಡ ಟಾಲಿವುಡ್‌ನಲ್ಲಿ ಹರಿದಾಡುತ್ತಲಿದೆ.