ಬಾಲಿವುಡ್‌ಗೆ ನನ್ನನ್ನು ನಿಭಾಯಿಸುವ ಅರ್ಹತೆ ಇಲ್ಲ: ಮತ್ತೆ ಟಾಂಗ್ ಕೊಟ್ಟ ಮಹೇಶ್ ಬಾಬು

ನನಗೆ ಸ್ಟಾರ್‌ಗಿರಿ, ಪ್ರೀತಿ ಕೊಟ್ಟಿರುವುದು ತೆಲುಗು ಜನ: ಮಹೇಶ್

''ನನಗೆ ಸ್ಟಾರ್‌ಗಿರಿ, ಪ್ರೀತಿ ಕೊಟ್ಟಿರುವುದು ತೆಲುಗು ಜನ ಹಾಗಾಗಿ ನನಗೆ ತೆಲುಗು ಸಿನಿಮಾಗಳಲ್ಲಿಯೇ ನಟಿಸುವುದು ಇಷ್ಟ. ಬೇರೆ ಚಿತ್ರರಂಗಕ್ಕೆ ಹೋಗಬೇಕು ಎಂದು ನನಗೆ ಎಂದೂ ಅನ್ನಿಸಿಲ್ಲ. ತೆಲುಗು ಚಿತ್ರರಂಗದಲ್ಲಿ ಮಾಡಿದ ಸಿನಿಮಾಗಳು ವಿಶ್ವಮಟ್ಟದಲ್ಲಿ ಮಿನುಗಬೇಕು ಎಂದು ಸದಾ ಅಂದುಕೊಳ್ಳುತ್ತಿದ್ದೆ. ಈಗ ಅದು ಸಾಧ್ಯವಾಗುತ್ತಿದೆ. ನನಗೆ ಬಹಳ ಖುಷಿಯಾಗಿದೆ'' ಎಂದಿದ್ದಾರೆ ಮಹೇಶ್ ಬಾಬು.

ಬಾಲಿವುಡ್, ತೆಲುಗು ಚಿತ್ರರಂಗಕ್ಕಿಂತ ದೊಡ್ಡದಲ್ಲ ಎಂದಿದ್ದ ಮಹೇಶ್

''ನನ್ನ ಸೇವೆ, ಪರಿಶ್ರಮ ಏನೇ ಇದ್ದರು ಅದು ಕೇವಲ ತೆಲುಗು ಸಿನಿಮಾಗಳಿಗೆ ಮಾತ್ರವೇ ಆಗಿರುತ್ತದೆ'' ಎಂದು ಕೆಲ ವರ್ಷಗಳ ಹಿಂದೆ ಮಹೇಶ್ ಬಾಬು ಹೇಳಿದ್ದರು. ಬಾಲಿವುಡ್ ಎಂಬುದು ತೆಲುಗು ಚಿತ್ರರಂಗಕ್ಕಿಂತಲೂ ದೊಡ್ಡದೇನಲ್ಲ, ಬಾಲಿವುಡ್‌ಗೆ ಹೋಗಿ ಸಿನಿಮಾ ಮಾಡುವುದು ಸಾಧನೆಯೂ ಅಲ್ಲ ಎಂಬ ಉದ್ದೇಶದಿಂದ ಮಹೇಶ್ ಬಾಬು, ತಾವು ಹಿಂದಿ ಸಿನಿಮಾ ಮಾಡುವುದಿಲ್ಲ, ಬದಲಿಗೆ ತೆಲುಗು ಸಿನಿಮಾಗಳನ್ನಷ್ಟೆ ಮಾಡಲಿದ್ದೇವೆ ಎಂದು ಹೇಳಿದ್ದಾರೆ. ಮಹೇಶ್ ಬಾಬು ತಮ್ಮ ಇನ್‌ಸ್ಟಾಗ್ರಾಂನಲ್ಲಿ ಸಹ ತಮ್ಮ ಪರಿಚಯವನ್ನು 'ಭಾರತೀಯ ತೆಲುಗು ಸಿನಿಮಾ ನಟ' ಎಂದು ಬರೆದುಕೊಂಡಿದ್ದಾರೆ.

ಮಹೇಶ್ ಬಗ್ಗೆ ಋಣಾತ್ಮಕವಾಗಿ ವರದಿ ಮಾಡಿದ್ದ ಹಿಂದಿ ಮಾಧ್ಯಮ

ಕೆಲ ವರ್ಷಗಳ ಹಿಂದೆ ಮುಂಬೈನಲ್ಲಿ ಜಾಹೀರಾತು ಚಿತ್ರೀಕರಣದಲ್ಲಿ ಭಾಗವಹಿಸಿದ್ದ ಮಹೇಶ್‌ ಬಾಬುವನ್ನು ಮುತ್ತಿಕೊಂಡಿದ್ದ ಮಾಧ್ಯಮಗಳು, ಸಲ್ಮಾನ್ ಖಾನ್‌ರು ತೆಲುಗಿನ ಯಾವ ಸಿನಿಮಾ ರೀಮೇಕ್ ಮಾಡಬೇಕು ಎಂಬುದು ನಿಮ್ಮ ಆಸೆ ಎಂದು ಪ್ರಶ್ನಿಸಿದ್ದರು, ಅದಕ್ಕೆ ನಗುತ್ತಾ ಉತ್ತರಿಸಿದ್ದ ಮಹೇಶ್, ಅವರು ಈಗಾಗಲೇ ಹಲವು ತೆಲುಗು ಸಿನಿಮಾಗಳ ರೀಮೇಕ್‌ನಲ್ಲಿ ನಟಿಸಿದ್ದಾರೆ. ನನ್ನ 'ಪೋಕಿರಿ' ಸಿನಿಮಾವನ್ನೂ ರೀಮೇಕ್ ಮಾಡಿದ್ದಾರೆ ಎಂದಿದ್ದರು. ಹಾಗಿದ್ದರೆ ನೀವು ಸಲ್ಮಾನ್‌ರ ಯಾವ ಸಿನಿಮಾ ರೀಮೇಕ್ ಮಾಡುತ್ತೀರಿ? ಎಂಬ ಪ್ರಶ್ನೆಗೆ, ನಾನು ರೀಮೇಕ್ ಸಿನಿಮಾದಲ್ಲಿ ಇಲ್ಲಿಯವರೆಗೆ ನಟಿಸಿಲ್ಲ, ಮುಂದೆ ನಟಿಸುವುದೂ ಇಲ್ಲ'' ಎಂದು ಖಡಕ್ ಆಗಿ ಉತ್ತರಿಸಿದ್ದರು. ಆಗ ಹಲವು ಬಾಲಿವುಡ್ ಮಾಧ್ಯಮಗಳು ಮಹೇಶ್‌ಗೆ ಅಹಂಕಾರ ಎಂಬರ್ಥ ಬರುವ ರೀತಿಯ ಸುದ್ದಿಗಳನ್ನು ಪ್ರಕಟಿಸಿದ್ದವು.

'ಸರ್ಕಾರು ವಾರಿ ಪಾಟ' ಸಿನಿಮಾ ಬಿಡುಗಡೆ

ಮಹೇಶ್ ಬಾಬು ನಟನೆಯ 'ಸರ್ಕಾರು ವಾರಿ ಪಾಟ' ಸಿನಿಮಾ ಇದೇ ಶುಕ್ರವಾರ ಚಿತ್ರಮಂದಿರಗಳಲ್ಲಿ ಬಿಡುಗಡೆ ಆಗಲಿದೆ. ಕೀರ್ತಿ ಸುರೇಶ್ ನಾಯಕಿಯಾಗಿ ನಟಿಸಿರುವ ಈ ಸಿನಿಮಾದ ಬಗ್ಗೆ ದೊಡ್ಡ ಮಟ್ಟದ ನಿರೀಕ್ಷೆ ಇದೆ. ಸಿನಿಮಾದ ಟ್ರೇಲರ್ ಈಗಾಗಲೇ ವೈರಲ್ ಆಗಿದೆ. 'ಸರ್ಕಾರು ವಾರಿ ಪಾಟ' ಸಿನಿಮಾದ ಬಳಿಕ ತ್ರಿವಿಕ್ರಮ್ ಜೊತೆಗೆ ಹೊಸ ಸಿನಿಮಾದಲ್ಲಿ ಮಹೇಶ್ ಬಾಬು ನಟಿಸಲಿದ್ದಾರೆ. ಅದರ ಬಳಿಕ ನಿರ್ದೇಶಕ ರಾಜಮೌಳಿ ಜೊತೆ ಹೊಸ ಸಿನಿಮಾ ಮಾಡಲಿದ್ದಾರೆ.