200 ಜನ ಡ್ಯಾನ್ಸರ್ಸ್.. ಅದ್ಧೂರಿ ಸೆಟ್: 'ಭೋಳಾ ಶಂಕರ್' ಅಣ್ಣ ತಂಗಿ ಸಾಂಗ್

'ವಾಲ್ತೇರು ವೀರಯ್ಯ' ಸಿನಿಮಾ ಸಕ್ಸಸ್ ಬೆನ್ನಲ್ಲೇ ಚಿರು 'ಭೋಳಾ ಶಂಕರ್' ಸಾಂಗ್ ಶೂಟಿಂಗ್‌ನಲ್ಲಿ ಭಾಗಿ ಆಗಿದ್ದಾರೆ. ಮೆಹರ್ ರಮೇಶ್ ಈ ಚಿತ್ರಕ್ಕೆ ಆಕ್ಷನ್ ಕಟ್ ಹೇಳ್ತಿದ್ದು, ಇದೀಗ ಸಾಂಗ್ ಚಿತ್ರೀಕರಣ ಭರದಿಂದ ಸಾಗುತ್ತಿದೆ. ಚಿತ್ರದಲ್ಲಿ ಚಿರು ಸಹೋದರಿ ಪಾತ್ರದಲ್ಲಿ ಮಹಾನಟಿ ಕೀರ್ತಿ ಸುರೇಶ್ ಕಾಣಿಸಿಕೊಂಡಿದ್ದಾರೆ.

ಹೈದರಾಬಾದ್‌ನ ಸ್ಟುಡಿಯೋದಲ್ಲಿ ಅದ್ಧೂರಿ ಸೆಟ್‌ ಹಾಕಿ ಹಾಡನ್ನು ಚಿತ್ರೀಕರಣ ನಡೆಸಲಾಗ್ತಿದೆ. ಕೊಲ್ಕತ್ತಾ ಬ್ಯಾಕ್‌ಡ್ರಾಪ್‌ನಲ್ಲಿ ಈ ಸನ್ನಿವೇಶ, ಹಾಡು ಚಿತ್ರದಲ್ಲಿ ಮೂಡಿ ಬರ್ತಿದೆ. ಅದನ್ನು ಸೆಟ್‌ ಹಾಕಿ ಶೂಟ್ ಮಾಡಲಾಗ್ತಿದೆ. ಅಣ್ಣ ತಂಗಿ ಬಾಂಧವ್ಯದ ಹಾಡು ಇದಾಗಿದ್ದು 200 ಜನ ಡ್ಯಾನ್ಸರ್ಸ್ ಬಳಸಿಕೊಂಡು ಶೇಖರ್ ಮಾಸ್ಟರ್ ಈ ಸಾಂಗ್‌ಗೆ ಡ್ಯಾನ್ಸ್ ಕಂಪೋಸ್ ಮಾಡ್ತಿದ್ದಾರೆ. ಸಾಂಗ್‌ಗೆ ಮಣಿಶರ್ಮಾ ಟ್ಯೂನ್ ಹಾಕಿದ್ದಾರೆ. ಇನ್ನು ಸಿನಿಮಾ ಶೂಟಿಂಗ್ ಸೆಟ್‌ಗೆ ಖ್ಯಾತ ನಿರ್ದೇಶಕ ಕೆ. ರಾಘವೇಂದ್ರ ರಾವ್ ಭೇಟಿ ನೀಡಿದ್ದರು.

'ಭೋಳಾ ಶಂಕರ್' ಚಿತ್ರದಲ್ಲಿ ಚಿರು ಜೋಡಿಯಾಗಿ ತಮನ್ನಾ ಮಿಂಚಿದ್ದಾರೆ. ಎ. ಕೆ ಎಂಟರ್‌ಟೈನ್‌ಮೆಂಟ್ಸ್ ಬ್ಯಾನರ್‌ನಲ್ಲಿ ಈ ಸಿನಿಮಾ ನಿರ್ಮಾಣವಾಗುತ್ತಿದೆ. ವೆನ್ನೆಲ ಕಿಶೋರ್, ಅರ್ಜುನ್ ದಾಸ್, ರಶ್ಮಿ ಗೌತಮ್, ತುಳಸಿ ಸೇರಿದಂತೆ ದೊಡ್ಡ ತಾರಾಗಣ ಚಿತ್ರದಲ್ಲಿದೆ. ತಮಿಳಿನ 'ವೇದಾಳಂ' ಸಿನಿಮಾ ರೀಮೆಕ್ 'ಭೋಳಾ ಶಂಕರ್'. ಶೀಘ್ರದಲ್ಲೇ ಸಿನಿಮಾ ತೆರೆಗೆ ಬರಲಿದೆ.