ಮದ್ವೆ ಸಂಭ್ರಮದ ನಂತರ ಭಾರಿ ನಷ್ಟದ ಭೀತಿಯಲ್ಲಿ ದಿಲ್ ರಾಜು

ಕೋಟ್ಯಂತರ ರುಪಾಯಿ ನಷ್ಟದ ಸುಳಿವು

ದಿಲ್ ರಾಜು ತೆಲುಗಿನ ಖ್ಯಾತ ನಿರ್ಮಾಪಕರಲ್ಲಿ ಒಬ್ಬರಾಗಿದ್ದಾರೆ. ಬಿಗ್ ಬಜೆಟ್ ಸಿನಿಮಾಗಳನ್ನು ನೀಡಿರುವ ದಿಲ್ ರಾಜು ಬಳಿ ಸಾಕಷ್ಟು ಸಿನಿಮಾಗಳಿವೆ. ಸದ್ಯ ಪವನ್ ಕಲ್ಯಾಣ್ ಅಭಿನಯದ ವಕೀಲ್ ಸಾಬ್ ಸಿನಿಮಾಗೆ ದಿಲ್ ರಾಜು ನಿರ್ಮಾಣದಲ್ಲಿ ಮೂಡಿ ಬರುತ್ತಿದೆ. ಇದು ಬಾಲಿವುಡ್ ನ ಪಿಂಕ್ ಸಿನಿಮಾದ ರಿಮೇಕ್ ಆಗಿದೆ ಎಂಬುದರ ಬಗ್ಗೆ ಈಗಾಗಲೆ ಫಿಲ್ಮಿಬೀಟ್ ನಲ್ಲಿ ಓದಿರುತ್ತೀರಿ. ಆದರೆ, ದಿಲ್ ರಾಜುಗೆ ಈಗ ಶೂಟಿಂಗ್ ಶುರುವಾಗದೆ ಕೋಟ್ಯಂತರ ರುಪಾಯಿ ನಷ್ಟ ಅನುಭವಿಸುವ ಭೀತಿಯಲ್ಲಿದ್ದಾರೆ.

ಚಿತ್ರೀಕರಣ ಹಂತದ ಪ್ರಾಜೆಕ್ಟಿಗೆ 150 ಕೋಟಿ ರು

ಜನಪ್ರಿಯ ನಿರ್ಮಾಪಕ, ವಿತರಕರಾಗಿರುವ ದಿಲ್ ರಾಜು ಅವರು ಹಲವು ಚಿತ್ರಗಳಿಗೆ ಹೂಡಿಕೆ ಮಾಡಿದ್ದಾರೆ. ಅದರಲ್ಲಿ ಬಹುತೇಕ ಎಲ್ಲವೂ ಚಿತ್ರೀಕರಣ ಹಂತದಲ್ಲಿವೆ. ಸದ್ಯಕ್ಕೆ ಅನ್ ಲಾಕ್ 1.0 ಶುರುವಾದರೂ ಹೊರಾಂಗಣ ಚಿತ್ರೀಕರಣಕ್ಕೆ ಅನುಮತಿ ಇಲ್ಲ, ಹಲವು ನಿರ್ಬಂಧಗಳ ನಡುವೆ ಸ್ಟಾರ್ ನಟ, ನಟಿಯರು ಶೂಟಿಂಗಿಗೆ ಇಳಿಯುತ್ತಿಲ್ಲ. ಇಂಡಸ್ಟ್ರೀ ಮೂಲಗಳ ಪ್ರಕಾರ ಪೂರ್ಣ ಪ್ರಮಾಣದ ಶೂಟಿಂಗ್ ನಡೆಯಬೇಕಾದರೆ ಇನ್ನು ಒಂದು ವರ್ಷವಾದರೂ ಬೇಕು ಎಂಬ ಸುದ್ದಿಯಿದೆ. ಸರಿ ಸುಮಾರು 150 ಕೋಟಿ ರು ಇದರಿಂದ ದಿಲ್ ರಾಜುಗೆ ನಷ್ಟವಾಗಲಿದೆ.

ಪ್ರಮುಖವಾಗಿ ಮೂರು ಚಿತ್ರಗಳಿವೆ

ಪವರ್ ಸ್ಟಾರ್ ಪವನ್ ಕಲ್ಯಾಣ್ ಅಭಿನಯದ ''ವಕೀಲ್ ಸಾಬ್", ನಾನಿ ಹಾಗೂ ಸುಧೀರ್ ಬಾಬು ಅಭಿನಯದ ''ವಿ'' ಹಾಗೂ ಜರ್ಸಿ ಚಿತ್ರದ ಬಾಲಿವುಡ್ ರಿಮೇಕ್ ಸದ್ಯ ಶೂಟಿಂಗ್ ಹಂತದಲ್ಲಿತ್ತು. ಮುಂದಿನ ವರ್ಷಕ್ಕೆ ರಿಲೀಸ್ ಮಾಡುವ ಯೋಜನೆ ಹಾಕಿಕೊಳ್ಳಲಾಗಿತ್ತು. ಸದ್ಯಕ್ಕೆ ಈ ಮೂರು ಚಿತ್ರಗಳ ಪೈಕಿ ''ವಿ'' ಚಿತ್ರವನ್ನು ಇದೇ ವರ್ಷ ಬಿಡುಗಡೆ ಮಾಡಿ ಸ್ವಲ್ಪ ಮಟ್ಟಿನ ದುಡ್ಡು ಗಳಿಕೆ ಮಾಡಬಹುದು ಅಷ್ಟೇ ಎಂದು ಮಾರುಕಟ್ಟೆ ವಿಶ್ಲೇಷಕರು ಅಭಿಪ್ರಾಯಪಟ್ಟಿದ್ದಾರೆ.

ಸೂಪರ್ ಹಿಟ್ ಚಿತ್ರಗಳ ನಿರ್ಮಾಪಕ

ದಿಲ್, ಆರ್ಯ, ಬೊಮ್ಮರಿಲೋ, ಬೃಂದಾವನಂ, ಸೀತಮ್ಮ ವಾಕಿಟ್ಲು ಸಿರಿಮಲ್ಲೆ ಚಿಟ್ಟು, ಫಿದಾ ಹೀಗೆ ಸಾಕಷ್ಟು ಸೂಪರ್ ಹಿಟ್ ಸಿನಿಮಾಗಳನ್ನು ನಿರ್ಮಾಣ ಮಾಡಿ, ವಿತರಣೆ ಮಾಡಿರುವ ದಿಲ್ ರಾಜು ಅವರು ಸದ್ಯ ಯಾವುದೇ ಹೊಸ ಚಿತ್ರಗಳ ನಿರ್ಮಾಣಕ್ಕೆ ಕೈಹಾಕುತ್ತಿಲ್ಲ. ಚಿತ್ರ ವಿತರಣೆಗೂ ಮುಂದಾಗುತ್ತಿಲ್ಲ. ದೊಡ್ಡ ದೊಡ್ಡ ಬ್ಯಾನರ್ ಚಿತ್ರಗಳ ವಿತರಣೆ ಪಡೆದುಕೊಳ್ಳುತ್ತಿಲ್ಲ ದಿಲ್ ರಾಜು ಸದ್ಯ ಆರ್ಥಿಕ ಹೊಡೆತದಿಂದ ತಪ್ಪಿಸಿಕೊಳ್ಳಲು ಮಾರ್ಗ ಹುಡುಕುತ್ತಿದ್ದಾರೆ.