ಮದುವೆಯಾಗಿ ಮಗುವಿದ್ದ ಮಹಿಳೆಯ ಪ್ರೀತಿಸಿ ಮದುವೆಯಾದ ರಾಜಮೌಳಿ: ಏನಿದು ಪ್ರೇಮಕತೆ?

ರಾಜಮೌಳಿಗಿಂತ ನಾಲ್ಕು ವರ್ಷ ದೊಡ್ಡವರು ರಮಾ

ರಾಜಮೌಳಿ ಅವರು ರಮಾ ಅವರನ್ನು ಪ್ರೀತಿಸಿ ಮದುವೆಯಾದರು. ರಾಜಮೌಳಿಗಿಂತಲೂ ನಾಲ್ಕು ವರ್ಷ ದೊಡ್ಡವರು ರಮಾ. ಈ ಇಬ್ಬರು ಮದುವೆ ಆಗುವ ವೇಳೆಗಾಗಲೆ ರಮಾ ಅವರಿಗೆ ಮದುವೆಯಾಗಿ ಒಂದು ಮಗು ಸಹ ಇತ್ತು. ಆದರೂ ಸಹ ರಾಜಮೌಳಿಗೆ ರಮಾ ಮೇಲೆ ಮನಸ್ಸಾಗಿತ್ತು. ಇವರಿಬ್ಬರ ಪ್ರೇಮಕತೆ ಬಹಳ ಅದ್ಭುತವಾಗಿದೆ.

ಎಳವೆಯಲ್ಲೇ ಸಾಕಷ್ಟು ಕಷ್ಟ ಅನುಭವಿಸಿದ್ದ ರಮಾ

ಚಿಕ್ಕಂದಿನಲ್ಲಿಯೇ ತಂದೆಯನ್ನು ಕಳೆದುಕೊಂಡ ರಮಾ ತಾಯಿಯ ಆರೈಕೆಯಲ್ಲಿ ಕಷ್ಟದಲ್ಲಿಯೇ ಬೆಳೆದರು. ರಮಾ ಅವರಿಗೆ ಸಹೋದರಿ ಶ್ರೀವಲ್ಲಿ. ಇಬ್ಬರೂ ಸಹ ಅಮ್ಮನ ನೆರಳಲ್ಲಿ ಸಂಸ್ಕಾರ, ಸಹನೆ, ದುಡಿಮೆ, ಕ್ರಿಯಾಶೀಲತೆ ಕಲಿತುಕೊಂಡರು. 1990ರಲ್ಲಿ ರಮಾ ಅವರು ಪದವಿ ಶಿಕ್ಷಣ ಪಡೆಯುವ ಸಂದರ್ಭದಲ್ಲಿ ಅವರ ತಾಯಿ ರಮಾರ ಮದುವೆ ಮಾಡಿಬಿಟ್ಟರು. ರಮಾಗೆ ಒಂದು ಗಂಡು ಮಗು ಸಹ ಆಯಿತು. ಆದರೆ ರಮಾರ ಪತಿ ಕಡಿದು ಪ್ರತಿದಿನ ರಂಪ ಮಾಡುತ್ತಿದ್ದ. ರಮಾರಿಗೆ ಪ್ರತಿದಿನವೂ ನರಕ ನೋಡುವಂತಾಗಿತ್ತು. ಕೊನೆಗೊಂದು ದಿನ ಮಗನನ್ನು ಕರೆದುಕೊಂಡು ಪತಿಯನ್ನು ಬಿಟ್ಟು ಅಕ್ಕ ಶ್ರೀವಲ್ಲಿಯ ಮನೆಗೆ ಹೋಗಿಬಿಟ್ಟರು ರಮಾ.

ರಾಜಮೌಳಿ ಸಹ ಕೀರವಾಣಿ ಮನೆಯಲ್ಲಿಯೇ ಇದ್ದರು

ರಮಾರ ಅಕ್ಕ ಶ್ರೀವಲ್ಲಿ ಖ್ಯಾತ ಸಂಗೀತ ನಿರ್ದೇಶಕ ಎಂಎಂ ಕೀರವಾಣಿಯ ಪತ್ನಿ. ಕೀರವಾಣಿ-ಶ್ರೀವಲ್ಲಿ ಮನೆಯಲ್ಲಿದ್ದುಕೊಂಡು ರಮಾ ಜಸ್ಟ್ ವೆಲ್ಲೋ ಮೀಡಿಯಾ ಹೆಸರಿನ ಸಂಸ್ಥೆಯಲ್ಲಿ ಕೆಲಸ ಮಾಡಲು ಆರಂಭಿಸಿದರು. ಯೆಲ್ಲೋ ಮೀಡಿಯಾ ಸಂಸ್ಥೆ ತೆಲುಗಿನ 'ಅಮೃತಂ' ಧಾರಾವಾಹಿ ನಿರ್ಮಾಣ ಮಾಡಿತ್ತು. ರಮಾ ಅವರು ಕೀರವಾಣಿ ಮನೆಗೆ ಬಂದಾಗ ಅಲ್ಲಿಯೇ ರಾಜಮೌಳಿ ಸಹ ಇದ್ದರು. ಕೀರವಾಣಿಗೆ ಸಹೋದರ ಸಂಬಂಧಿ ಆಗಿದ್ದ ರಾಜಮೌಳಿ ಆ ಸಮಯದಲ್ಲಿ ನಿರ್ದೇಶಕ ರಾಘವೇಂದ್ರ ಅವರಿಗೆ ಸಹಾಯಕರಾಗಿದ್ದರು.

ಶಾಂತಿ ನಿವಾಸ ಧಾರಾವಾಹಿ ನಿರ್ದೇಶಿಸುತ್ತಿದ್ದ ರಾಜಮೌಳಿ

ರಾಘವೇಂದ್ರ ರಾವ್ 'ಶಾಂತಿ ನಿವಾಸ' ಧಾರವಾಹಿ ಚಿತ್ರೀಕರಣ ಆರಂಭಿಸಿದ್ದರು. ರಾಜಮೌಳಿ ಆ ಧಾರಾವಾಹಿಗೆ ನಿರ್ದೇಶಕರಾಗಿದ್ದರು. ಆ ಸಮಯದಲ್ಲಿ ರಮಾ, ರಾಜಮೌಳಿ ಅವರೊಟ್ಟಿಗೆ ಧಾರಾವಾಹಿ ಕುರಿತು ಸಲಹೆಗಳನ್ನು ನೀಡುತ್ತಿದ್ದರು. ಇಬ್ಬರೂ ಸಿನಿಮಾ, ಧಾರಾವಾಹಿ ಇತರೆ ವಿಷಯಗಳ ಬಗ್ಗೆ ಚರ್ಚೆ ಮಾಡುತ್ತಿದ್ದರು. ಅದೇ ಸಮಯದಲ್ಲಿ ರಮಾ ತಮ್ಮ ಪತಿಯಿಂದ ವಿಚ್ಛೇಧನ ಸಹ ಪಡೆದುಕೊಂಡರು.

ಮೊದಲ ಸಿನಿಮಾ ಸಂದರ್ಭದಲ್ಲಿಯೇ ಮದುವೆ

2001 ರಲ್ಲಿ ರಾಜಮೌಳಿ ತಮ್ಮ ಮೊದಲ ಸಿನಿಮಾ 'ಸ್ಟುಡೆಂಟ್ ನಂ 1' ಆರಂಭಿಸಿದರು. ರಾಘವೇಂದ್ರ ರಾವ್ ಅವರೇ ಸಿನಿಮಾಕ್ಕೆ ಬಂಡವಾಳ ಹೂಡಿದರು. ರಮಾ, ರಾಜಮೌಳಿಗೆ ಸಹಾಯಕರಾಗಿ ಕೆಲಸ ಮಾಡಿದ್ದರು. ಆ ಸಿನಿಮಾದಲ್ಲಿ ಕಾಸ್ಟೂಮ್ ಡಿಸೈನ್ ಸಹ ಮಾಡಿದ್ದರು. ಅದೇ ಸಿನಿಮಾದ ಚಿತ್ರೀಕರಣದ ವೇಳೆಯಲ್ಲಿ ಕೆಲವೇ ಮಂದಿ ಗೆಳೆಯರ ಮುಂದೆ ರಾಜಮೌಳಿ, ರಮಾ ಅವರನ್ನು ವಿವಾಹವಾದರು.

Recommended Video

ರೈತರಿಂದ ನೇರವಾಗಿ ತರಕಾರಿ ಖರೀದಿಸಿ ರೈತರ ಕಷ್ಟಕ್ಕೆ ನೆರವಾದ ಉಪೇಂದ್ರ | Filmibeat Kannada

ಎಲ್ಲ ಗುಣಗಳೂ ರಮಾ ಅವರಲ್ಲಿತ್ತು: ರಾಜಮೌಳಿ

ರಾಜಮೌಳಿ ಒಂದು ಸಂದರ್ಶನದಲ್ಲಿ ಹೇಳಿಕೊಂಡಿದ್ದಂತೆ ನಾನು ಎಂಥಹಾ ಹುಡುಗಿಯನ್ನು ವಿವಾಹವಾಗಬೇಕು ಎಂದುಕೊಂಡಿದ್ದೆನೊ ಆ ಎಲ್ಲ ಗುಣಗಳು ನನಗೆ ರಮಾರಲ್ಲಿ ಕಂಡವು ಹಾಗಾಗಿ ವಿವಾಹವಾದೆ. ಅಂದಿನಿಂದ ಇಂದಿನವರೆಗೂ ನಮ್ಮಿಬ್ಬರ ನಡುವೆ ಸಣ್ಣ ಮನಸ್ಥಾಪ ಸಹ ಬಂದಿಲ್ಲ ಎಂದಿದ್ದಾರೆ ರಾಜಮೌಳಿ. ರಮಾ ಸಹ ಬೇರೊಂದು ಸಂದರ್ಶನದಲ್ಲಿ ಇದೇ ಮಾತು ಹೇಳಿದ್ದಾರೆ. ರಮಾರ ಮಗನನ್ನು ತಮ್ಮ ಮಗನಂತೆ ಸಾಕಿದ ರಾಜಮೌಳಿ ಇತ್ತೀಚೆಗಷ್ಟೆ ಮಗನಿಗೆ ಮದುವೆ ಮಾಡಿದರು. ಮಗನ ಜೊತೆಗೆ ಹೆಣ್ಣು ಮಗುವೊಂದನ್ನು ದತ್ತು ಪಡೆದು ಸಾಕುತಿದ್ದಾರೆ ಈ ದಂಪತಿ.