ಬಂಧಿತ ಯೂಟ್ಯೂಬರ್‌ ಭಾರ್ಗವ್‌ನ ನಿಜ ರೂಪ ಬಹಿರಂಗಪಡಿಸಿ ಪೊಲೀಸರು

ತೆಲುಗಿನ ಜನಪ್ರಿಯ ಯೂಟ್ಯೂಬರ್‌ ಹಾಗೂ ನಟ ಚಿಪ್ಪಡ ಭಾರ್ಗವ್ ಅನ್ನು ಅಪ್ರಾಪ್ತೆ ಮೇಲೆ ಅತ್ಯಾಚಾರ ಎಸಗಿದ ಆರೋಪದಲ್ಲಿ ಪೊಲೀಸರು ಎರಡು ದಿನದ ಹಿಂದೆ ಬಂಧಿಸಿದ್ದಾರೆ.

ಟಿಕ್‌ ಟಾಕ್, ಇನ್‌ಸ್ಟಾಗ್ರಾಂ, ಯೂಟ್ಯೂಬ್‌ನಲ್ಲಿ ತಮಾಷೆಯ ಕಿರುವಿಡಿಯೋಗಳನ್ನು ಪ್ರಕಟಿಸಿ ಜನಪ್ರಿಯನಾಗಿದ್ದ ಭಾರ್ಗವ್ ಅಲಿಯಾಸ್ ಫನ್ ಬಕೆಟ್ ಭಾರ್ಗವ್‌ ಬಂಧನದ ಬಗ್ಗೆ ಇಂದು ವಿಶಾಖಪಟ್ಟಣ ಪೊಲೀಸರು ಸುದ್ದಿಗೋಷ್ಠಿ ನಡೆಸಿ ಮಾಹಿತಿ ನೀಡಿದ್ದಾರೆ.

ಕಿರು ವಿಡಿಯೋಗಳನ್ನು ಸಾಮಾಜಿಕ ಜಾಲತಾಣದಲ್ಲಿ ಹಂಚಿಕೊಳ್ಳುತ್ತಿದ್ದ 14 ವರ್ಷ ವಯಸ್ಸಿನ ಯುವತಿಗೆ ಮೆಸೆಜ್‌ ಮಾಡಿದ್ದ ಆರೋಪಿ ಭಾರ್ಗವ್‌ ಆಕೆಯೊಂದಿಗೆ ಪರಿಚಯ ಬೆಳೆಸಿಕೊಂಡು, ತಾನು ಮಾಡುವ ವಿಡಿಯೋಗಳಲ್ಲಿ ನಟಿಸುವಂತೆ ಕೇಳಿದ್ದಾನೆ.

ಸಂತ್ರಸ್ತೆಯೂ ವಿಡಿಯೋಗಳನ್ನು ಮಾಡುತ್ತಿದ್ದ ಕಾರಣ ಈಗಾಗಲೇ ಸೆಲೆಬ್ರಿಟಿ ಯೂಟ್ಯೂರ್‌ ಆಗಿದ್ದ ಭಾರ್ಗವ್‌ ಜೊತೆ ವಿಡಿಯೋದಲ್ಲಿ ನಟಿಸುವ ಅವಕಾಶ ಸಿಕ್ಕ ಕಾರಣ ಯುವತಿ ಒಪ್ಪಿಕೊಂಡಿದ್ದಾಳೆ. ಆಕೆಯನ್ನು ಹೈದರಾಬಾದ್‌ನ ತನ್ನ ಕೋಂಪಲ್ಲಿಯ ಮನೆಗೆ ಕರೆಸಿಕೊಂಡು ಆಕೆಯ ಇಷ್ಟಕ್ಕೆ ವಿರುದ್ಧವಾಗಿ ಅತ್ಯಾಚಾರ ಮಾಡಿದ್ದಾನೆ. ಜೊತೆಗೆ ಆಕೆಯ ನಗ್ನ ವಿಡಿಯೋವನ್ನು ಸಹ ಚಿತ್ರಿಸಿಕೊಂಡು ಅತ್ಯಾಚಾರದ ಬಗ್ಗೆ ಹೊರಗೆ ಬಾಯಿಬಿಟ್ಟರೆ ವಿಡಿಯೋವನ್ನು ಸಾಮಾಜಿಕ ಜಾಲತಾಣದಲ್ಲಿ ಅಪ್‌ಲೋಡ್ ಮಾಡುವುದಾಗಿ ಬೆದರಿಕೆ ಹಾಕಿದ್ದಾನೆ.

ಸಂತ್ರಸ್ತ ಯುವತಿಗೆ ಪದೇ-ಪದೇ ಬೆದರಿಕೆ ಹಾಕಿ ಹಲವಾರು ಬಾರಿ ಮನೆಗೆ ಕರೆಸಿಕೊಂಡು ಅತ್ಯಾಚಾರ ಮಾಡಿದ್ದಾನೆ. ಕೊನೆಗೆ ಆ ಹದಿನಾಲ್ಕರ ಯುವತಿ ಗರ್ಭಿಣಿ ಆಗಿದ್ದಾಳೆ. ವಿಷಯ ಮನೆಯವರಿಗೆ ತಿಳಿದು ಯುವತಿಯ ತಾಯಿ ವಿಶಾಖಪಟ್ಟಣಂನ ಪೆಂಡುರ್ತಿ ಪೊಲೀಸ್ ಠಾಣೆಯಲ್ಲಿ ದೂರು ನೀಡಿದ್ದಾರೆ. ದೂರು ದಾಖಲಿಸಿಕೊಂಡ ಪೊಲೀಸರು ಹೈದರಾಬಾದ್‌ಗೆ ಆಗಮಿಸಿ ಭಾರ್ಗವ್‌ ಅನ್ನು ಬಂಧಿಸಿ ಕರೆದೊಯ್ದಿದ್ದಾರೆ.

ಆರೋಪಿ ಚಿಪ್ಪಡ ಭಾರ್ಗವ್‌ ಮೇಲೆ ಪೋಕ್ಸೊ ಕಾಯ್ದೆಯ ಸೆಕ್ಷನ್‌ 376, 354 ರ ಅಡಿ ಪ್ರಕರಣ ದಾಖಲಿಸಲಾಗಿದೆ ಎಂದು ದಿಶಾ ಮಹಿಳಾ ಪೊಲೀಸ್ ಠಾಣೆಯ ಎಸಿಪಿ ಪ್ರೇಮ ಕಜಲ್ ಸುದ್ದಿಗೋಷ್ಠಿಯಲ್ಲಿ ಮಾಹಿತಿ ನೀಡಿದ್ದಾರೆ.

ಭಾರ್ಗವ್‌ ಜೊತೆಗೆ ತಮಾಷೆಯ ವಿಡಿಯೋಗಳಲ್ಲಿ ಕಾಣಿಸಿಕೊಳ್ಳುತ್ತಿದ್ದ ನಟಿ ನಿತ್ಯಾ ಮೇಲೆಯೇ ಭಾರ್ಗವ್ ಅತ್ಯಾಚಾರ ಮಾಡಿದ್ದಾನೆ ಎಂಬ ಸುದ್ದಿಯೂ ಹರಿದಾಡಿತ್ತು. ಈ ಬಗ್ಗೆ ಇಂದು ಸಾಮಾಜಿಕ ಜಾಲತಾಣದಲ್ಲಿ ಸ್ಪಷ್ಟನೆ ನೀಡಿರುವ ನಿತ್ಯಾ, 'ನಾನು ಸಂತ್ರಸ್ತೆ ಅಲ್ಲ. ನನ್ನ ಹೆಸರು, ಚಿತ್ರಗಳನ್ನು ಬಳಸಬೇಡಿ' ಎಂದು ಮನವಿ ಮಾಡಿದ್ದಾರೆ.