ಸಮಂತಾ- ನಾಗಚೈತನ್ಯ ವಿಚ್ಛೇದನದ ಕಾರಣ ಬಯಲು: ಟಾಲಿವುಡ್‌ನಲ್ಲಿ ಹೊಸ ಗುಸು, ಗುಸು!

ಸಮಂತಾ ಅಭಿನಯಕ್ಕೆ ಅಡ್ಡಿ ಆಗಿತ್ತಾ ನಾಗಚೈತನ್ಯ ಕುಟುಂಬ?

ನಟಿ ಸಮಂತಾ ಸೌತ್‌ ಚಿತ್ರರಂಗದ ಸ್ಟಾರ್‌ ನಟಿಯರಲ್ಲಿ ಒಬ್ಬರು. ದೊಡ್ಡ ಚಿತ್ರಗಳಲ್ಲಿ ಸಮಂತಾಗೆ ಸದಾ ಬೇಡಿಕೆ ಇರುತ್ತಿತ್ತು. ಅಂತೆಯೇ ಸಮಂತಾಗೆ ದೊಡ್ಡ ಅಭಿಮಾನಿ ಬಳಗ ಇದೆ. ಆದರೆ ನಟಿ ಸಮಂತಾ ಮದುವೆ ಬಳಿಕ ಸಿನಿಮಾಗಳಲ್ಲಿ ಅಭಿನಯಿಸುವುದು ನಾಗಚೈತನ್ಯ ಕುಟುಂಬಕ್ಕೆ ಇಷ್ಟ ಇರಲಿಲ್ಲ ಎನ್ನುವ ಸುದ್ದಿ ಹುಟ್ಟಿ ಕೊಂಡಿದೆ. ಸಿನಿಮಾದಲ್ಲೇ ಬದುಕು ಕಟ್ಟಿ ಕೊಂಡ ನಟಿ ಸಮಂತಾಗೆ ಹೆಚ್ಚಿನ ಬೇಡಿಕೆ ಇದೆ. ಜೊತೆಗೆ ಸಮಂತಾಗೆ ಸಿನಿಮಾಗಳಿಂದ ದೂರ ಉಳಿಯಲು ಸಾಧ್ಯ ಆಗಲಿಲ್ಲವಂತೆ.

ಮದುವೆ ಆದ ಬಳಿಕ ನಟಿಯರು ಸಿನಿಮಾಗಳಿಂದ ದೂರ ಉಳಿದು ಬಿಡುತ್ತಾರೆ. ಚಿತ್ರರಂಗದಲ್ಲಿ ದೊಡ್ಡ ಹೆಸರು ಮಾಡಿದ್ದರು ಕೂಡ ಮದುವೆ ಆದ ಮೇಲೆ ಬಣ್ಣ ಹಚ್ಚುವುದನ್ನು ನಿಲ್ಲಿಸಿ ಬಿಡುತ್ತಾರೆ. ಆದರೆ ಇದು ಸಮಂತಾ ಅವರಿಗೆ ಸಾಧ್ಯ ಆಗಿಲ್ಲ. ಹಾಗಾಗಿ ಇದೇ ವಿಚಾರಕ್ಕೆ ಸಮಂತಾ ಪತಿಯಿಂದ ದೂರಾಗಿದ್ದಾರೆ ಎನ್ನಲಾಗುತ್ತಿದೆ.

ಮದುವೆ ಬಳಿಕ ಪಾತ್ರ ಆಯ್ಕೆಯಲ್ಲಿ ಸೀಮಿತವಾಗಿದ್ದ ನಟಿ!

ಮದುವೆ ಬಳಿಕ ಸಮಂತಾ ಆಯ್ಕೆ ಮಾಡುತ್ತಿದ್ದ ಪಾತ್ರಗಳು ಕುಟುಂಬದವರಿಗೆ ಕಿರಿಕಿರಿ ಉಂಟು ಮಾಡುತ್ತಿತ್ತಂತೆ. ಜೊತೆಗೆ ನಾಗಚೈತನ್ಯ ಮತ್ತು ಸಮಂತಾಗೆ ಇದೇ ವಿಚಾರದಲ್ಲಿ ಭಿನ್ನಾಭಿಪ್ರಾಯ ಮೂಡಿದೆ ಎನ್ನಲಾಗಿದೆ. ಮದುವೆ ಬಳಿಕ 2019- 2020ರಲ್ಲಿ ಸಮಂತಾ ಸಿನಿಮಾ ಆಯ್ಕೆ ಸೀಮಿತ ಆದಂತೆ ಕಾಣುತ್ತಿತ್ತು. ಸಮಂತಾ ಕೂಡ ಕ್ರಮೇಣ ಸಿನಿಮಾರಂಗದಿಂದ ದೂರ ಸರಿಯುತ್ತಾರೆ ಎನ್ನುವ ಚರ್ಚೆಗಳು ಕೂಡ ಹುಟ್ಟಿದ್ದವು. ಆದರೆ ಸೂಪರ್‌ ಡೀಲಕ್ಸ್ ಮತ್ತು ಫ್ಯಾಮಿಲಿ ಮ್ಯಾನ್‌ ವೆಬ್‌ ಸರಣಿಯಲ್ಲಿ ಸಮಂತಾ ಬೋಲ್ಡ್‌ ಆಗಿ ಕಾಣಿಸಿಕೊಂಡಿದ್ದರು.

ವಿಚ್ಛೇದನದ ಬಳಿಕ ಸಾಲು ಸಾಲು ಚಿತ್ರಗಳಲ್ಲಿ ಸಮಂತಾ ಬ್ಯುಸಿ!

ಇನ್ನು ಸಮಂತಾ ವಿಚ್ಛೇದನದ ಬಳಿಕ ಸಾಲು ಸಾಲು ಸಿನಿಮಾಗಳನ್ನು ಒಪ್ಪಿಕೊಳ್ಳುತ್ತಾ ಇದ್ದಾರೆ. ಇದು ಕೂಡ ಅಚ್ಚರಿಗೆ ಕಾರಣ ಆಗಿದೆ. ಮದುವೆ ಆದ ಮೇಲೆ ಬೆರಳೆಣಿಕೆಯ ಸಿನಿಮಾಗಳಲ್ಲಿ ನಟಿಸಿದ ಸಮಂತಾ ವಿಚ್ಛೇದನದ ಬಳಿಕ ಹೆಚ್ಚು ಚಿತ್ರಗಳನ್ನು ಒಪ್ಪಿಕೊಳ್ಳುತ್ತಿದ್ದಾರೆ. ಈ ವಿಚಾರ ಈಗ ಸದ್ದು ಮಾಡಲು ಕಾರಣ 'ಪುಷ್ಪ' ಚಿತ್ರ. ಪುಷ್ಪ ಚಿತ್ರದಲ್ಲಿ ನಟಿ ಸಮಂತಾ ವಿಶೇಷ ಹಾಡಿಗೆ ಸೊಂಟ ಬಳುಕಿಸಿದ್ದಾರೆ. ಈ ರೀತಿಯಾಗಿ ಸಮಂತಾ ತೆರೆಯ ಮೇಲೆ ಕಾಣಿಸಿಕೊಳ್ಳುವುದು ನಾಗಚೈತನ್ಯ ಕುಟುಂಬಕ್ಕೆ ಇಷ್ಟ ಇರಲಿಲ್ಲವಂತೆ.

ಸಮಂತಾಗೆ ಬಾಲಿವುಡ್‌ ಬಾಗಿಲು ಓಪನ್!

ಇನ್ನು ಸಮಂತಾ ವಿಚ್ಛೇದನದ ಬಳಿಕ ತಮಿಳಿನ 'ಕಾತು ವಾಕುಲ ರೆಂಡು ಕಾದಲ್', 'ಶಾಕುಂತಲಂ', ತೆಲುಗಿನ 'ಯಶೋಧ' ಚಿತ್ರದ ಜೊತೆಗೆ ನಟಿ ತಾಪ್ಸಿ ಪನ್ನು ಜೊತೆಗೆ ಮಹಿಳಾ ಪ್ರಧಾನ ಸಿನಿಮಾ ಮಾಡಲು ಸಹಿ ಹಾಕಿದ್ದಾರೆ ಸಮಂತಾ. ಈ ಚಿತ್ರ ಪ್ಯಾನ್‌ ಇಂಡಿಯಾ ಸಿನಿಮಾ ಆಗಲಿದೆ. ಹಾಗೇ ನೋಡಿದರೆ ಸಮಂತಾ ಮದುವೆಗೂ ಮುನ್ನ ಮತ್ತು ವಿಚ್ಛೇದನದ ಬಳಿಕ ಹೆಚ್ಚು ಸಿನಿಮಾಗಳಲ್ಲಿ ಅಭಿನಯಿಸುತ್ತಿದ್ದಾರೆ. ಇತ್ತೀಚೆಗೆ ದೊಡ್ಡ ದೊಡ್ಡ ಚಿತ್ರಗಳು ಆಕೆಯನ್ನು ಅರಸಿ ಬರುತ್ತಿವೆ.