ಸಂಭಾವನೆ ಇಲ್ಲದೇ ತೆಲುಗು ಚಿತ್ರದಲ್ಲಿ ರಿಷಬ್ ಶೆಟ್ಟಿ ನಟನೆ: ಈಗ ನಡೀತಿದೆ ಬಿಸಿಬಿಸಿ ಚರ್ಚೆ!

ತೆಲುಗು ಚಿತ್ರದಲ್ಲಿ ರಿಷಬ್ ಶೆಟ್ಟಿ

'ಕಾಂತಾರ' ನಂತರ ಬೇರೆ ಭಾಷೆಯ ಸಿನಿಮಾದಲ್ಲಿ ನಟಿಸುವ ಆಲೋಚನೆ ಇಲ್ಲ ಎಂದು ರಿಷಬ್ ಶೆಟ್ಟಿ ಹೇಳಿದ್ದಾರೆ. ಆದರೆ ಸ್ನೇಹಪೂರ್ವಕವಾಗಿ ರಿಷಬ್ ಶೆಟ್ಟಿ ತೆಲುಗಿನ 'ಮಿಷಾನ್ ಇಂಪಾಸಿಬಲ್' ಎನ್ನುವ ಚಿತ್ರದಲ್ಲಿ ನಟಿಸಿದ್ದರು. ಚಿತ್ರದಲ್ಲಿ ಕಳ್ಳನ ಪಾತ್ರದಲ್ಲಿ ಎರಡು ನಿಮಿಷಗಳ ಕಾಲ ಕಾಣಿಸಿಕೊಂಡಿದ್ದರು. ಇದೇ ವರ್ಷ ಏಪ್ರಿಲ್‌ನಲ್ಲಿ ಸಿನಿಮಾ ರಿಲೀಸ್ ಆಗಿತ್ತು. ಆದರೆ ಅಲ್ಲಿವರೆಗೂ ರಿಷಬ್ ಶೆಟ್ಟಿ ಎಂದರೆ ಯಾರು ಎಂದು ಗೊತ್ತಿಲ್ಲದ ಕಾರಣ ತೆಲುಗು ಪ್ರೇಕ್ಷಕರು ತಲೆ ಕೆಡಿಸಿಕೊಂಡಿರಲಿಲ್ಲ. ಆದರೆ 'ಕಾಂತಾರ' ಸಕ್ಸಸ್ ಬೆನ್ನಲ್ಲೇ ಆ ಚಿತ್ರವನ್ನು ನೆನಪಿಸಿಕೊಳ್ಳುತ್ತಿದ್ದಾರೆ.

ಸಂಭಾವನೆ ಇಲ್ಲದೇ ನಟಿಸಿದ್ದ ರಿಷಬ್

'ಏಜೆಂಟ್ ಸಾಯಿ ಶ್ರೀನಿವಾಸ್ ಆತ್ರೇಯ' ಚಿತ್ರದ ನಿರ್ಮಾಪಕ ಸ್ವರೂಪ್ 'ಮಿಷಾನ್ ಇಂಪಾಸಿಬಲ್' ಚಿತ್ರಕ್ಕೂ ಆಕ್ಷನ್ ಕಟ್ ಹೇಳಿದ್ದರು. ಮೂವರು ಮಕ್ಕಳು ಮುಂಬೈಗೆ ಹೋಗುತ್ತಿದ್ದೇವೆ ಎಂದುಕೊಂಡು ಬೆಂಗಳೂರಿಗೆ ಬರುವ ಕಥೆ ಅದು. ಇಲ್ಲಿ ಒಬ್ಬ ಕಳ್ಳನಾಗಿ ರಿಷಬ್ ಶೆಟ್ಟಿ ಅವರಿಗೆ ಎದುರಾಗುವ ದೃಶ್ಯ ಅದು. ಖಲೀಲ್ ಎನ್ನುವುದು ಪಾತ್ರದ ಹೆಸರು. ನಿರ್ದೇಶಕರ ಮೊದಲ ಸಿನಿಮಾ ಇಷ್ಟವಾಗಿ ರಿಷಬ್ ಅಭಿನಂದಿಸಿದ್ದರಂತೆ. ಅದೇ ಸ್ನೇಹದಿಂದ ಈ ಸಣ್ಣ ಅತಿಥಿ ಪಾತ್ರದಲ್ಲಿ ನೀವೇ ನಟಿಸಬೇಕು ಎಂದು ಸ್ವರೂಪ್ ಪಟ್ಟು ಹಿಡಿದ್ದರಂತೆ. ಹಾಗಾಗಿ ಅತಿಥಿ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದರು. ಇದಕ್ಕಾಗಿ ಸಂಭಾವನೆಯನ್ನು ಕೂಡ ಪಡೆದಿರಲಿಲ್ಲ.

'ಬೆಲ್‌ಬಾಟಂ', 'ಹೀರೊ'ಗೆ ಒಳ್ಳೆ ರೆಸ್ಪಾನ್ಸ್

'ಕಾಂತಾರ' ಸಿನಿಮಾ ತೆಲುಗಿಗೆ ಡಬ್ ಆಗಿ ಅಕ್ಟೋಬರ್ 15ರಂದು ರಿಲೀಸ್ ಆಗಿತ್ತು. ಚಿತ್ರಕ್ಕೆ ಅದ್ಭುತ ರೆಸ್ಪಾನ್ಸ್ ಸಿಕ್ಕಿ ಇವತ್ತಿಗೂ ಭರ್ಜರಿ ಪ್ರದರ್ಶನ ಕಾಣುತ್ತಿದೆ. ರಿಷಬ್ ನಟಿಸಿದ್ದ 'ಬೆಲ್‌ಬಾಟಂ' ಹಾಗೂ 'ಹೀರೊ' ಸಿನಿಮಾಗಳು ಕೂಡ ತೆಲುಗಿಗೆ ಡಬ್ ಆಗಿತ್ತು. ಆದರೆ ಥಿಯೇಟರ್‌ನಲ್ಲಿ ರಿಲೀಸ್ ಆಗಿರಲಿಲ್ಲ. ಬದಲಿಗೆ ಅಲ್ಲು ಅರ್ಜುನ್ ತಂದೆ ಅಲ್ಲು ಅರವಿಂದ್ ಒಡೆತನದ ಅಹಾ ಓಟಿಟಿ ಫ್ಲಾಟ್‌ಫಾರ್ಮ್‌ನಲ್ಲಿ ಸ್ಟ್ರೀಮಿಂಗ್ ಆಗಿತ್ತು. ಸಿನಿಮಾ ನೋಡಿದವರು ರಿಷಬ್ ಶೆಟ್ಟಿ ನಟನೆಯನ್ನು ಮೆಚ್ಚಿಕೊಂಡಿದ್ದರು. ಹಾಗಾಗಿ ಕೆಲ ತೆಲುಗು ಪ್ರೇಕ್ಷಕರಿಗೆ 'ಕಾಂತಾರ' ಚಿತ್ರಕ್ಕೂ ಮೊದಲೇ ರಿಷಬ್ ಪರಿಚಯ ಇತ್ತು.

4 ಚಿತ್ರದಲ್ಲಿ ರಿಷಬ್ ಶೆಟ್ಟಿ ನಟನೆ

'ಅಂಟಗೋನಿ ಶೆಟ್ಟಿ', 'ಬೆಲ್‌ಬಾಟಂ - 2', 'ಮಹನಿಯರೇ ಮಹಿಳಿಯರೇ', 'ಬ್ಯಾಚುಲರ್ ಪಾರ್ಟಿ' ಸಿನಿಮಾಗಳಲ್ಲಿ ರಿಷಬ್ ಶೆಟ್ಟಿ ನಟಿಸ್ತಿದ್ಧಾರೆ. ಸದ್ಯ ನಿರ್ದೇಶಕರಾಗಿ ಯಾವುದೇ ಸಿನಿಮಾ ಘೋಷಿಸಿಲ್ಲ. ಕೆಲ ವರ್ಷಗಳ ಹಿಂದೆ 'ರುದ್ರಪ್ರಯಾಗ' ಸಿನಿಮಾ ಕೈಗೆತ್ತಿಕೊಳ್ಳುವ ಮನಸ್ಸು ಮಾಡಿದ್ದರು. ಕೊರೊನಾ ಲಾಕ್‌ಡೌನ್‌ನಿಂದ ಆ ಸಿನಿಮಾ ನಿಂತು ಹೋಗಿತ್ತು. ಮತ್ತೆ ಅದಕ್ಕೆ ಜೀವ ಕೊಡುತ್ತಾರಾ ಎನ್ನುವುದನ್ನು ಕಾದು ನೋಡಬೇಕಿದೆ. ತಮ್ಮ ನಿರ್ದೇಶನದಲ್ಲಿ ಹೊಸ ಸಿನಿಮಾ ಯಾವ ಘೋಷಿಸುತ್ತಾರೋ ಗೊತ್ತಿಲ್ಲ.