ತೆಲುಗಿನಲ್ಲೂ ಕಾಂತಾರ ಹವಾ; ಕಾಂತಾರದಿಂದ ಗಾಡ್‌ಫಾದರ್ ತನ್ನ ನೆಲದಲ್ಲಿ ಕಳೆದುಕೊಂಡ ಚಿತ್ರಮಂದಿರಗಳೆಷ್ಟು?

300ಕ್ಕೂ ಹೆಚ್ಚು ಚಿತ್ರಮಂದಿರಗಳಲ್ಲಿ ಕಾಂತಾರ

ಕಾಂತಾರ ತೆಲುಗು ಅವತರಣಿಕೆ ತೆಲುಗು ರಾಜ್ಯಗಳಲ್ಲಿ 300ಕ್ಕಿಂತ ಅಧಿಕ ಸಂಖ್ಯೆಯ ಚಿತ್ರಮಂದಿರಗಳಲ್ಲಿ ಬಿಡುಗಡೆಗೊಳ್ಳುತ್ತಿದೆ. ನಿಜಾಮ್ ವಿಭಾಗದಲ್ಲಿ 115ಕ್ಕೂ ಅಧಿಕ ಚಿತ್ರಮಂದಿರಗಳು, ಸೀಡೆಡ್ ಭಾಗದದಲ್ಲಿ 50ಕ್ಕೂ ಹೆಚ್ಚು ಚಿತ್ರಮಂದಿರಗಳಲ್ಲಿ ಹಾಗೂ ಆಂಧ್ರ ಭಾಗದ 140ಕ್ಕೂ ಹೆಚ್ಚು ಚಿತ್ರಮಂದಿರಗಳಲ್ಲಿ ಕಾಂತಾರ ತೆರೆ ಕಾಣಲಿದೆ. ಈ ಮೂಲಕ ಬಿಡುಗಡೆಯ ಹಿಂದಿನ ದಿನ ಕಾಂತಾರ ತೆಲುಗು 305ಕ್ಕೂ ಹೆಚ್ಚಿನ ಚಿತ್ರಮಂದಿರಗಳನ್ನು ಪಡೆದುಕೊಂಡಿದೆ. ಇನ್ನು ಬಿಡುಗಡೆಯ ದಿನ ಚಿತ್ರಮಂದಿರಗಳ ಸಂಖ್ಯೆ ಮತ್ತುಷ್ಟು ಹೆಚ್ಚಾಗಲಿದೆ.

ಒಂದೇ ವಾರಕ್ಕೆ ತೀವ್ರ ಕುಸಿತ ಕಂಡ ಗಾಡ್‌ಫಾದರ್

ಗಾಡ್‌ಫಾದರ್ ಎರಡನೇ ವಾರ ನಿಜಾಮ್ ವಿಭಾಗದಲ್ಲಿ 100ಕ್ಕೂ ಅಧಿಕ ಚಿತ್ರಮಂದಿರಗಳು, ಸೀಡೆಡ್ ಭಾಗದದಲ್ಲಿ 60ಕ್ಕೂ ಹೆಚ್ಚು ಚಿತ್ರಮಂದಿರಗಳಲ್ಲಿ ಹಾಗೂ ಆಂಧ್ರ ಭಾಗದ 140ಕ್ಕೂ ಹೆಚ್ಚು ಚಿತ್ರಮಂದಿರಗಳಲ್ಲಿ ತನ್ನ ಪ್ರದರ್ಶನವನ್ನು ಮುಂದುವರಿಸಲಿದೆ. ಅಂದರೆ ಒಟ್ಟು 300 ಚಿತ್ರಮಂದಿರಗಳಲ್ಲಿ ಗಾಡ್‌ಫಾದರ್ ಎರಡನೇ ವಾರದ ಪ್ರದರ್ಶನ ಕಾಣಲಿದ್ದು, ಮೊದಲ ವಾರ 715 ಚಿತ್ರಮಂದಿರಗಳಲ್ಲಿ ಪ್ರದರ್ಶನ ಕಂಡಿತ್ತು. ಈ ಮೂಲಕ ಗಾಡ್‌ಫಾದರ್ ಎರಡನೇ ವಾರ 415 ಚಿತ್ರಮಂದಿರಗಳನ್ನು ಕಳೆದುಕೊಂಡಂತಾಗಲಿದೆ.

ಕಾಂತಾರ ಎಫೆಕ್ಟ್ ಆಗಿರುವುದು ನಿಜ

ಇನ್ನು ಬಿಡುಗಡೆ ದಿನ ಒಳ್ಳೆಯ ಓಪನಿಂಗ್ ಪಡೆದುಕೊಂಡ ಗಾಡ್‌ಫಾದರ್ ಸಿನಿ ಪ್ರೇಕ್ಷಕರನ್ನು ನಂತರದ ದಿನಗಳಲ್ಲಿ ಹೆಚ್ಚಾಗಿ ಚಿತ್ರಮಂದಿರಕ್ಕೆ ಕರೆತರುವಲ್ಲಿ ಯಶಸ್ವಿಯಾಗಲಿಲ್ಲ. ಅದರಲ್ಲಿಯೂ ಈ ವಾರ ಕೆಲ ತೆಲುಗು ಚಿತ್ರಗಳು ಹಾಗೂ ಕಾಂತಾರ ಬಿಡುಗಡೆಯಾಗುತ್ತಿರುವುದು ಗಾಡ್‌ಫಾದರ್ ಚಿತ್ರಮಂದಿರಗಳ ಗಣನೀಯ ಇಳಿಕೆಗೆ ಕಾರಣ ಎನ್ನಬಹುದು. ಗಾಡ್‌ಫಾದರ್ ಕಳೆದುಕೊಂಡಿರುವ 415 ಚಿತ್ರಮಂದಿರಗಳನ್ನು ಇತರೆ ನೂತನ ತೆಲುಗು ಚಿತ್ರಗಳಿಗಿಂತ ಕಾಂತಾರ ಚಿತ್ರವೇ ಹೆಚ್ಚು ಪಡೆದುಕೊಂಡಿದೆ. ಒಟ್ಟಿನಲ್ಲಿ ಈ ಹಿಂದೆ ತೆಲುಗು ಚಿತ್ರಗಳ ಹಾವಳಿಯಿಂದ ಕನ್ನಡ ಚಿತ್ರಗಳು ಚಿತ್ರಮಂದಿರಗಳು ಕಳೆದಕೊಂಡವು ಎಂದು ಕೇಳಿಬರುತ್ತಿದ್ದ ಮಾತು ಈಗ ಉಲ್ಟಾ ಆಗಿದೆ.