ಜೂ.ಎನ್‌ಟಿಆರ್ ಪಾತ್ರದ ಬಗ್ಗೆ ನಿಜ ಕೋಮರಂ ಭೀಮ್ ಮೊಮ್ಮಗನ ಆಕ್ಷೇಪ

ಕೋಮರಂ ಭೀಮ್ ಮೊಮ್ಮಗ ಸೋನೆ ರಾವ್

ಕೋಮರಂ ಭೀಮ್ ಮೊಮ್ಮಗನ ಹೆಸರು ಸೋನೆ ರಾವ್, ಅವರು ಕೋಮರಂ ಭೀಮ್ ಪಾತ್ರಧಾರಿ ಜೂ ಎನ್‌ಟಿಆರ್ ಅನ್ನು ಸಿನಿಮಾದಲ್ಲಿ ಮುಸ್ಲಿಂ ವ್ಯಕ್ತಿಯಾಗಿ ತೋರಿಸುತ್ತಿರುವುದಕ್ಕೆ ವಿರೋಧ ವ್ಯಕ್ತಪಡಿಸಿದ್ದಾರೆ. ಇದು ಇತಿಹಾಸವನ್ನು ತಿರುಚುವ ಪ್ರಯತ್ನ ಎಂದಿದ್ದಾರೆ.

ಸೋನೆ ರಾವ್ ಮಾತನಾಡಿರುವ ವಿಡಿಯೋ ವೈರಲ್

ಟೀಸರ್‌ ಬಗ್ಗೆ ಸೋನೆ ರಾವ್ ಮಾತನಾಡಿರುವ ವಿಡಿಯೋ ಒಂದು ವೈರಲ್ ಆಗಿದ್ದು, ಇತಿಹಾಸವನ್ನು ತಿರುಚಿರುವ ಆರ್‌ಆರ್‌ಆರ್‌ ಸಿನಿಮಾದ ಜೂ ಎನ್‌ಟಿಆರ್ ಪಾತ್ರದ ಟೀಸರ್ ಅನ್ನು ರಾಜಮೌಳಿ ಹಿಂಪಡೆಯಬೇಕು ಎಂದು ಒತ್ತಾಯಿಸಿದ್ದಾರೆ.

ಇತಿಹಾಸವನ್ನು ತಿರುಚುವ ಪ್ರಯತ್ನ: ಸೋನೆ ರಾವ್

'ನಿರ್ದೇಶಕ ರಾಜಮೌಳಿ ಆಗಲಿ, ಆರ್‌ಆರ್‌ಆರ್ ಸಿನಿಮಾದ ಇತರೆ ನಿರ್ದೇಶಕರುಗಳಾಗಲಿ ನಮ್ಮನ್ನು ಸಂಪರ್ಕಿಸಿಲ್ಲ. ಬುಡಕಟ್ಟು ಸಮುದಾಯಗಳ ಆಸ್ತಿಗಳಾದ ನೀರು, ನೆಲ, ಅರಣ್ಯಕ್ಕಾಗಿ ಕೋಮರಂ ಭೀಮ್ ಹೋರಾಟ ನಡೆಸಿದರು. ಆದರೆ ಆತನನ್ನು ಅಲ್ಪಸಂಖ್ಯಾತನಾಗಿ ತೋರಿಸುತ್ತಿರುವುದು ಇತಿಹಾಸವನ್ನು ತಿರುಚುವ ಯತ್ನ' ಎಂದಿದ್ದಾರೆ ಸೋನೆ ರಾವ್.

ಕೋಮರಂ ಭೀಮ್ ಬಗ್ಗೆ ಸುಳ್ಳು ಹರಡಲು ಬಿಡೆವು: ಸೋನೆ ರಾವ್

'ಆದಿವಾಸಿಗಳು ದೇವರಂತೆ ಪೂಜಿಸುವ ಕೋಮರಂ ಭೀಮ್ ಬಗ್ಗೆ ಸುಳ್ಳು ಹರಡಲು ನಾವು ಬಿಡುವುದಿಲ್ಲ, ಕೋಮರಂ ಭೀಮ್ ಅನ್ನು ಮುಸ್ಲಿಂ ವ್ಯಕ್ತಿಯನ್ನಾಗಿ ಚಿತ್ರಿಸುವುದನ್ನು ಕೈಬಿಡದ ಹೊರತು, ನಾವು ಸಿನಿಮಾ ವಿರುದ್ಧ ಪ್ರತಿಭಟನೆ ಮಾಡುತ್ತೇವೆ' ಎಂದಿದ್ದಾರೆ ಸೋನೆ ರಾವ್.

ರಾಜಮೌಳಿಗೆ ಬುಡಕಟ್ಟು ಸಮುದಾಯದ ಬಹಿರಂಗ ಪತ್ರ

ಅಡಿಲಾಬಾದ್ ಬುಡಕಟ್ಟು ಸಮುದಾಯ ಸಹ ರಾಜಮೌಳಿಗೆ ಬಹಿರಂಗ ಪತ್ರ ಬರೆದಿದ್ದು, 'ಕೋಮರಂ ಭೀಮ್ ತನ್ನ ಕೊನೆಯ ಉಸಿರಿನ ವರೆಗೆ ನಿಜಾಮರು ಹಾಗೂ ಅವರ ರಜಾಕ್ ಸೈನ್ಯದ ವಿರುದ್ಧ ಸಶಸ್ತ್ರ ಹೋರಾಟ ನಡೆಸಿದರು. ಆದರೆ ನೀವು ಕೋಮರಂ ಭೀಮ್ ಅನ್ನು ಮುಸ್ಲಿಂ ಎಂದು ಹೇಳಲು ಹೊರಟಿದ್ದೀರಿ. ಇದು ಲಕ್ಷಾಂತರ ಆದಿವಾಸಿಗಳಿಗೆ ಮಾಡುತ್ತಿರುವ ಅವಮಾನ' ಎಂದು ಅಸಮಾಧಾನ ವ್ಯಕ್ತಪಡಿಸಿದ್ದಾರೆ.