ರಾಜಮೌಳಿ ಜೊತೆ ವೈಮನಸ್ಸು: ನಮ್ಮ ಅಣ್ಣನಿಗೆ ಯಾರನ್ನು ಹೇಗೆ ಬಳಸಿಕೊಳ್ಳಬೇಕು ಗೊತ್ತು ಎಂದ ತಂಗಿ ಶ್ರೀಲೇಖ!

ರಾಜಮೌಳಿ ಬಗ್ಗೆ ಸಹೋದರಿ ಮಾತು

"ನಮ್ಮ ಕುಟುಂಬವೆಲ್ಲಾ ಒಟ್ಟಾಗಿಯೇ ಇದ್ದೇವೆ. ನಮ್ಮ ಕೆಲಸಗಳ ವಿಷಯದಲ್ಲಿ ಅವರವರ ನಿರ್ಧಾರ ಅವರದ್ದು. ರಾಜಮೌಳಿ- ಕೀರವಾಣಿ ಕಾಂಬಿನೇಷನ್ ಹಿಟ್ ಆದ ಕಾರಣ ಅದನ್ನು ಮುಂದುವರೆಸುತ್ತಿದ್ದಾರೆ. ರಾಜಮೌಳಿ ಅಣ್ಣನಿಗೆ ಯಾರನ್ನು ಹೇಗೆ ಬಳಸಿಕೊಳ್ಳಬೇಕು ಎನ್ನುವುದು ಬಹಳ ಚೆನ್ನಾಗಿ ಗೊತ್ತಿದೆ. ನನ್ನ ಹಾಗೂ ಅಣ್ಣ ರಾಜಮೌಳಿ ನಡುವೆ ಉತ್ತಮ ಒಡನಾಟ ಇದೆ" ಎಂದು ಶ್ರೀಲೇಖಾ ಹೇಳಿದ್ದಾರೆ.

ಡೈರೆಕ್ಟರ್ ಆದ್ಮೇಲೆ ಅಣ್ಣ ಬದಲಾದ!

"ಒಂದು ವೇಳೆ ನಾನು ಅವರ ಚಿತ್ರಕ್ಕೆ ಅವಸರ ಎಂದರೆ ಕಂಡಿತ ಅವಕಾಶ ಕೊಡುತ್ತಾರೆ. ಮುಂದೊಂದು ದಿನ ನನಗೂ ಅವರು ಅವಕಾಶ ಕೊಡುತ್ತಾರೆ. ಹೇಳುವುದಕ್ಕೆ ಆಗುವುದಿಲ್ಲ. ನಮ್ಮ ನಡುವೆ ಯಾವುದೇ ಭಿನ್ನಭಿಪ್ರಾಯ ಇಲ್ಲ. ನಾವು ವರ್ಷಕ್ಕೊಮ್ಮೆ ಸಂಕ್ರಾಂತಿ ಸಂಭ್ರಮದಲ್ಲಿ ಎಲ್ಲರೂ ಒಂದೆಡೆ ಸೇರುತ್ತೇವೆ. ರಾಜಮೌಳಿ ಚಿತ್ರರಂಗಕ್ಕೆ ಬರುವ ಮುಂಚೆ ಬಹಳ ಆತ್ಮೀಯವಾಗಿ ಇರುತ್ತಿದ್ದರು. ನನ್ನ ಗಾಯನಕ್ಕೆ ಸಾಕಷ್ಟು ಸಲಹೆ ಸೂಚನೆ ಕೊಡುತ್ತಿದ್ದರು. ಚಾಕ್ಲೆಟ್ ತಂದುಕೊಡುತ್ತಿದ್ದರು. ಡೈರೆಕ್ಟರ್ ಆಗಿ ಸಕ್ಸಸ್ ಕಂಡಮೇಲೆ ತಮ್ಮ ಕೆಲಸಗಳಲ್ಲಿ ಬ್ಯುಸಿಯಾಗಿಬಿಟ್ಟರು" ಎಂದಿದ್ದಾರೆ.

ಕನ್ನಡ ಚಿತ್ರಗಳಿಗೂ ಶ್ರೀಲೇಖಾ ಸಂಗೀತ

ಶ್ರೀಲೇಖಾ ಸಾಕಷ್ಟು ಹಾಡುಗಳನ್ನು ಹಾಡಿದ್ದಾರೆ. ಕೆಲ ಸಿನಿಮಾಗಳಿಗೆ ಸಂಗೀತ ನಿರ್ದೇಶನ ಮಾಡಿದ್ದಾರೆ. ಕನ್ನಡದಲ್ಲಿ 'ಮದುವೆ ಆಗೋಣ ಬಾ' ಹಾಗೂ 'ಬೆಂಕಿ ಬಿರುಗಾಳಿ' ಸಿನಿಮಾಗಳಿಗೆ ಟ್ಯೂನ್ ಹಾಕಿದ್ದರು. ತೆಲುಗಿನಲ್ಲಿ 'ಅಮ್ಮಾಯಿ ಬಾಗುಂದಿ', 'ಪ್ರೇಯಸಿ ರಾವೆ', ಶ್ರೀಕೃಷ್ಣ 2006, ಅ ಆ ಇ ಈ, ಶ್ರೀವಲ್ಲಿ, ಹಿಟ್-2 ಸೇರಿದಂತೆ ಒಂದಷ್ಟು ಸಿನಿಮಾಗಳಿಗೆ ಮ್ಯೂಸಿಕ್ ಕಂಪೋಸ್ ಮಾಡಿದ್ದಾರೆ.

ಮಹೇಶ್ ಬಾಬು ಚಿತ್ರಕ್ಕೆ ಮೌಳಿ ನಿರ್ದೇಶನ

ರಾಜಮೌಳಿ ನಿರ್ದೇಶನದ 'RRR' ಜಪಾನ್ ಭಾಷೆಗೆ ಡಬ್ ಆಗಿ ಸದ್ದು ಮಾಡ್ತಿದೆ. ವಿದೇಶದ ಫಿಲ್ಮ್ ಫೆಸ್ಟಿವಲ್‌ಗಳಲ್ಲಿ ಪ್ರದರ್ಶನ ಕಂಡು ಮೆಚ್ಚುಗೆ ಪಡೆದುಕೊಳ್ಳುತ್ತಿದೆ. ಸದ್ಯ ಮುಂದಿನ ಸಿನಿಮಾ ಬಗ್ಗೆ ರಾಜಮೌಳಿ ಗಮನ ಹರಿಸಿದ್ದಾರೆ. ಮಹೇಶ್ ಬಾಬು ಜೊತೆ ಪ್ಯಾನ್ ವರ್ಲ್ಡ್ ಸಿನಿಮಾ ಪ್ಲ್ಯಾನ್ ಮಾಡುತ್ತಿದ್ದಾರೆ.