ಸ್ಟಾರ್‌ಗಿರಿ ಪಕ್ಕಕ್ಕಿಟ್ಟು ಬೇರೆ ಸ್ಟಾರ್ ಚಿತ್ರಗಳಲ್ಲಿ ನಟಿಸಿದ ದುನಿಯಾ ವಿಜಯ್, ರವಿತೇಜಾಗೆ ಇದೆಂಥ ಅವಮಾನ?

ಚಿತ್ರಗಳಲ್ಲಿ ವಿಶೇಷ ಪಾತ್ರ ನಿರ್ವಹಿಸಿದ ಸ್ಟಾರ್‌ಗಳಿಗಿಲ್ಲ ಪ್ರಾತಿನಿದ್ಯ!

ನಂದಮೂರಿ ಬಾಲಕೃಷ್ಣ ನಟನೆಯ ವೀರಸಿಂಹ ರೆಡ್ಡಿ ಚಿತ್ರದಲ್ಲಿ ಕನ್ನಡದ ಸ್ಟಾರ್ ನಟ ದುನಿಯಾ ವಿಜಯ್ ಖಳನಾಯಕನ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದಾರೆ. ಕನ್ನಡದಲ್ಲಿ ಮಾಸ್ ಚಿತ್ರಗಳಲ್ಲಿ ನಟಿಸಿ, ಸಲಗ ರೀತಿಯ ಸೂಪರ್ ಚಿತ್ರವನ್ನು ನಿರ್ದೇಶನ ಮಾಡಿ ಗೆದ್ದಿರುವ ದುನಿಯಾ ವಿಜಯ್‌ ಅವರ ಫೋಟೊಗಳನ್ನು ವೀರಸಿಂಹ ರೆಡ್ಡಿ ಪೋಸ್ಟರ್‌ಗಳಲ್ಲಿ ಬಳಸಲಾಗಿಲ್ಲ. ಅಷ್ಟೇ ಅಲ್ಲ ಚಿರಂಜೀವಿ ನಟನೆಯ ವಾಲ್ತೇರು ವೀರಯ್ಯ ಚಿತ್ರದ ವಿಶೇಷ ಪಾತ್ರದಲ್ಲಿ ನಟಿಸಿರುವ ರವಿತೇಜಾಗೂ ಸಹ ಇದೇ ರೀತಿಯ ಉಪಚಾರ ಸಿಕ್ಕಿದೆ. ಚಿತ್ರದ ಯಾವ ಪೋಸ್ಟರ್‌ನಲ್ಲೂ ಸಹ ರವಿತೇಜಾ ಫೋಟೊಗಳನ್ನು ಬಳಸಿಲ್ಲ. ಮೈತ್ರಿ ಮೂವಿ ಮೇಕರ್ಸ್ ಈ ಎರಡೂ ಚಿತ್ರಗಳಿಗೂ ಬಂಡವಾಳ ಹೂಡಿದ್ದು, ಅಧಿಕೃತವಾಗಿ ಹಂಚಿಕೊಂಡಿರುವ ಬಿಡುಗಡೆ ಪೋಸ್ಟರ್, ಸಂಕ್ರಾಂತಿ ಪೋಸ್ಟರ್, ಮೊದಲ ದಿನದ ಕಲೆಕ್ಷನ್ ಪೋಸ್ಟರ್, ಬ್ಲಾಕ್‌ಬಸ್ಟರ್ ಪೋಸ್ಟರ್, ಹೀಗೆ ಯಾವ ಪೋಸ್ಟರ್‌ನಲ್ಲೂ ಸಹ ದುನಿಯಾ ವಿಜಯ್ ಹಾಗೂ ರವಿತೇಜಾ ಮುಖಗಳು ಇಲ್ಲ. ನಿರ್ಮಾಣ ಸಂಸ್ಥೆ ಬೇಕಂತ ಮಾಡಿದೆಯೊ ಅಥವಾ ಅರಿವಿಲ್ಲದೇ ಮಾಡಿದೆಯೋ, ಆದರೆ ಈ ಕಡೆಗಣನೆ ಈ ಇಬ್ಬರು ಸ್ಟಾರ್ ನಟರ ಅಭಿಮಾನಿಗಳಿಗೆ ಬೇಸರ ಮೂಡಿಸಿರುವುದಂತೂ ಖಚಿತ. ಅದರಲ್ಲೂ ವೀರಸಿಂಹ ರೆಡ್ಡಿ ಚಿತ್ರದ ಕರ್ನಾಟಕ ಪೋಸ್ಟರ್‌ಗಳಲ್ಲಾದರೂ ದುನಿಯಾ ವಿಜಯ್ ಫೋಟೊಗಳನ್ನು ಬಳಸದಿರುವುದು ನಿಜಕ್ಕೂ ಬೇಸರದ ಸಂಗತಿ.

ಪೋಸ್ಟರ್‌ಗಳಲ್ಲಿ ಹೆಸರೂ ಇಲ್ಲ!

ಇನ್ನು ಪೋಸ್ಟರ್‌ಗಳಲ್ಲಿ ಈ ಇಬ್ಬರು ಸ್ಟಾರ್ ನಟರ ಚಿತ್ರಗಳು ಮಾತ್ರವಲ್ಲದೇ ಹೆಸರನ್ನೂ ಸಹ ಬಳಸಲಾಗಿಲ್ಲ. ಸ್ಟಾರ್‌ಗಿರಿ ಬಿಟ್ಟು ಚಿತ್ರದಲ್ಲಿ ನಟಿಸುವ ನಟರ ಹೆಸರುಗಳನ್ನು ಪೋಸ್ಟರ್‌ಗಳಲ್ಲಿ ಹಾಕದಿರುವುದು ದೊಡ್ಡ ಕಡೆಗಣನೆ ಎಂದೇ ಹೇಳಬಹುದು. ಈ ಹಿಂದೆ ಕನ್ನಡದ ಒಡಹುಟ್ಟಿದವರು ಚಿತ್ರದ ಬಿಡುಗಡೆ ವೇಳೆ ರಾಜ್‌ಕುಮಾರ್ ರೀತಿಯ ಮೇರು ನಟನೇ ತನ್ನ ಕಿರಿಯ ನಟ ಅಂಬರೀಶ್ ಅವರ ಕಟ್‌ಔಟ್ ತನ್ನ ಕಟ್‌ಔಟ್‌ಗಿಂತ ಎತ್ತರವಿರಬೇಕು ಎಂದು ಹೇಳಿದ್ದದ್ದು ಇಂಥ ಪ್ರಸಂಗಗಳಲ್ಲಿ ನೆನಪಿಗೆ ಬರುತ್ತದೆ.

ದುನಿಯಾ ವಿಜಯ್ ಪಾತ್ರಕ್ಕೂ ಬೇಸರ!

ಇತ್ತ ನಟ ದುನಿಯಾ ವಿಜಯ್ ವೀರಸಿಂಹ ರೆಡ್ಡಿ ಚಿತ್ರದಲ್ಲಿ ನಿರ್ವಹಿಸಿರುವ ಪಾತ್ರದ ಕುರಿತೂ ಸಹ ಸಿನಿ ರಸಿಕರು ಬೇಸರ ವ್ಯಕ್ತಪಡಿಸಿದ್ದಾರೆ. ಇಲ್ಲಿ ಸ್ಟಾರ್ ನಟನಾಗಿ ಮಿಂಚಿ ಅಲ್ಲಿ ಹೋಗಿ ಕಡೆಗಣನೆಗೆ ಒಳಗಾಗಬೇಡಿ, ಇಲ್ಲೇ ಚಿತ್ರಗಳನ್ನು ಮಾಡಿ ರಾಜನಂತಿರಿ ಎಂದು ಸಲಹೆ ನೀಡಿದ್ದಾರೆ.