ಆಂಧ್ರಪ್ರದೇಶ ದಿಕ್ಕೆಟ್ಟ ರಾಜ್ಯವಾಗಿದೆ: ನಟ ಬಾಲಕೃಷ್ಣ ಕಟು ವಾಗ್ದಾಳಿ

ಜಗನ್ ವಿರುದ್ಧ ಕೆಂಡ ಕಾರಿದ ಬಾಲಕೃಷ್ಣ

ಬಾಲಕೃಷ್ಣ ನಟಿಸಿರುವ ಹೊಸ ಸಿನಿಮಾ 'ಅಖಂಡ' ಬಿಡುಗಡೆ ಆಗಿ ಐವತ್ತು ದಿನ ಪೂರೈಸಿರುವ ಕಾರಣ ಚಿತ್ರತಂಡವು ಹೈದರಾಬಾದ್‌ನಲ್ಲಿ 'ಥ್ಯಾಂಕ್ಯೂ ಮೀಟ್' ಏರ್ಪಾಡು ಮಾಡಿತ್ತು. ಈ ಸಂದರ್ಭದಲ್ಲಿ ಮಾತನಾಡಿದ ನಟ ಬಾಲಕೃಷ್ಣ, ಆಂಧ್ರ ಪ್ರದೇಶ ಸರ್ಕಾರ ಹಾಗೂ ಸಿಎಂ ಜಗನ್ ಮೋಹನ್ ರೆಡ್ಡಿ ವಿರುದ್ಧ ಕೆಂಡ ಕಾರಿದರು. ''ರಾಜಧಾನಿಯೇ ಇಲ್ಲದ ಆಂಧ್ರ ಪ್ರದೇಶ ದಿಕ್ಕೆಟ್ಟ ರಾಜ್ಯವಾಗಿಬಿಟ್ಟಿದೆ'' ಎಂದಿದ್ದಾರೆ.

ಆಂಧ್ರದಲ್ಲಿ ದೇವಸ್ಥಾನಗಳ ಮೇಲೆ ದಾಳಿ: ಬಾಲಕೃಷ್ಣ

ಆಂಧ್ರ ಪ್ರದೇಶದಲ್ಲಿ ದೇವಸ್ಥಾನಗಳ ಮೇಲೆ ದಾಳಿ ಆಗುತ್ತಿರುವ ವಿಷಯಕ್ಕೆ ಸಂಬಂಧಿಸಿದಂತೆ ಮಾತನಾಡಿದ ಬಾಲಕೃಷ್ಣ, ''ಆಂಧ್ರದಲ್ಲಿ ದೇವಾಲಯಗಳ ಮೇಲೆ ದಾಳಿಗಳು ನಡೆಯುತ್ತಿರುವ ವಿಷಯದ ಬಗ್ಗೆ ಹಲವು ವೇದಿಕೆಗಳಲ್ಲಿ ಚರ್ಚೆ ನಡೆದಿದೆ. ಸಿನಿಮಾ ಸಹ ಮಾಧ್ಯಮವಾದ್ದರಿಂದ 'ಅಖಂಡ' ಸಿನಿಮಾ ಮೂಲಕ ಆ ವಿಷಯವನ್ನೂ ಪ್ರೇಕ್ಷಕರಿಗೆ ತಲುಪಿಸುವ ಪ್ರಯತ್ನ ಮಾಡಿದ್ದೇವೆ. ಹಿಂದುಪುರ ಶಾಸಕನಾಗಿ, ಪ್ರಜಾ ಪ್ರತಿನಿಧಿಯಾಗಿ ಸಿನಿಮಾ ಮೂಲಕ ನಾನು ನನ್ನ ಪ್ರತಿಭಟನೆ ವ್ಯಕ್ತಪಡಿಸಿದ್ದೇನೆ'' ಎಂದಿದ್ದಾರೆ ಬಾಲಕೃಷ್ಣ.

ರಾಜಧಾನಿ ಇಲ್ಲದೆ ದಿಕ್ಕೆಟ್ಟಿದೆ ಆಂಧ್ರ: ಬಾಲಕೃಷ್ಣ

''ಜಾತಿ ಮತ್ತು ಧರ್ಮ, ಪ್ರದೇಶಗಳ ಹೆಸರಿನಲ್ಲಿ ಜನರನ್ನು ವಿಭಜಿಸುವ ಪ್ರಯತ್ನ ನಡೆಯುತ್ತಿವೆ. ಇವುಗಳನ್ನೇ ಆಧಾರವಾಗಿಟ್ಟುಕೊಂಡು ದೌರ್ಜನ್ಯ ನಡೆಸಲಾಗುತ್ತಿದೆ. ಅದಕ್ಕಾಗಿಯೇ ''ಪ್ರದೇಶಗಳಾಗಿ ವಿಂಗಡಿಸುತ್ತೀರ'' ಎಂಬ ಡೈಲಾಗ್ ಅನ್ನು ಸಹ ಸಿನಿಮಾದಲ್ಲಿ ಇಟ್ಟಿದ್ದೀವಿ ಎಂಬ ಬಾಲಕೃಷ್ಣ, ಆಂಧ್ರಪ್ರದೇಶ ರಾಜಧಾನಿ ಇಲ್ಲದ ರಾಜ್ಯವಾಗಿಬಿಟ್ಟಿದೆ. ಮೂರು ರಾಜಧಾನಿ ಎಂದು ಸರ್ಕಾರ ಹೇಳುತ್ತಿದೆ. ಅಮರಾವತಿಯೇ ರಾಜ್ಯದ ರಾಜಧಾನಿ ಆಗಬೇಕು ಎಂದು ರೈತರು, ಪ್ರಜೆಗಳು ಹೋರಾಟ ಮಾಡುತ್ತಿದ್ದಾರೆ. ಆಂಧ್ರದ ಪ್ರಸ್ತುತ ಪರಿಸ್ಥಿತಿಯನ್ನು ಟೀಕಿಸುವ ಅನೇಕ ದೃಶ್ಯಗಳು 'ಅಖಂಡ' ಸಿನಿಮಾದಲ್ಲಿವೆ'' ಎಂದಿದ್ದಾರೆ ಬಾಲಕೃಷ್ಣ.

''ಎನ್‌ಟಿಆರ್ ಆಶಯಕ್ಕೆ ವಿರುದ್ಧವಾದ ಕಾರ್ಯ ನಡೆಯುತ್ತಿವೆ''

''ಜಾತಿ, ಧರ್ಮ, ಪ್ರಾಂತ್ಯಗಳ ಭೇದಗಳು ಇಲ್ಲದೆ ಇಡೀ ತೆಲುಗು ಜನರು ಒಗ್ಗಟ್ಟಾಗಿರಬೇಕು ಎಂಬುದು ಸ್ವರ್ಗೀಯ ಎನ್‌ಟಿಆರ್ ಆಸೆಯಾಗಿತ್ತು. ಹಾಗಾಗಿಯೇ ತೆಲುಗು ರಾಜ್ಯ ನನ್ನದು, ಆಂಧ್ರ ನನ್ನದು, ತೆಲಂಗಾಣ, ರಾಯಲಸೀಮ ನನ್ನದು ಎಂದು ಸಿನಿಮಾಗಳ ಮೂಲಕ ಸ್ಪೂರ್ತಿ ತುಂಬುವ ಯತ್ನವನ್ನು ಎನ್‌ಟಿಆರ್ ಮಾಡಿದ್ದರು. ಆದರೆ ಎನ್‌ಟಿಆರ್ ಅವರ ಆಶಯದ ವಿರುದ್ಧವಾಗಿ ಕೆಲವು ಘಟನೆಗಳು ಆಂಧ್ರದಲ್ಲಿ ನಡೆಯುತ್ತಿದೆ'' ಎಂದು ಬಾಲಕೃಷ್ಣ ಹೇಳಿದ್ದಾರೆ.