ಹುರಿ ಮೀಸೆ ರಾಮ.. ತಳಬುಡ ಇಲ್ಲದ ಗ್ರಾಫಿಕ್ಸ್.. ರಾಮಾಯಣಕ್ಕೆ ವೆಸ್ಟರ್ನ್ ಟಚ್.. 'ಆದಿಪುರುಷ್' ಟೀಸರ್ ಟ್ರೋಲ್!

ಹುರಿಮೀಸೆಯ ರಾಮ

ಸಾಮಾನ್ಯವಾಗಿ ರಾಮ ಎಂದು ಮೀಸೆ, ಗಡ್ಡ ಇರುವುದಿಲ್ಲ ಎಂದೇ ಬಹುತೇಕರು ಅಂದುಕೊಂಡಿರುತ್ತಾರೆ. ಆದರೆ ನಿರ್ದೇಶಕ ಓಂ ರಾವುತ್ 'ಆದಿಪುರುಷ್' ಚಿತ್ರದಲ್ಲಿ ಹುರಿಮೀಸೆಯ ರಾಮನನ್ನು ತೋರಿಸುವ ಸಾಹಸ ಮಾಡಿದ್ದಾರೆ. ಇನ್ನು ರಾಮ ಎಂದರೆ ನೀಲಮೇಘಶ್ಯಾಮ ಎನ್ನಲಾಗುತ್ತದೆ. ಆದರೆ ಉತ್ತರ ಭಾರತದಲ್ಲಿ ರಾಮನನ್ನು ಕೆಂಪಾಗಿ ತೋರಿಸಿರುವ ಉದಾಹರಣೆಯೂ ಇದೆ. ಈ ಚಿತ್ರದಲ್ಲೂ ತಂಡ ಅದೇ ಸಾಹಸ ಮಾಡಿದೆ. ಇದನ್ನು ದಕ್ಷಿಣಭಾರತದ ಮಂದಿ ಹೇಗೆ ಸ್ವೀಕರಿಸುತ್ತಾರೆ ಎನ್ನುವುದನ್ನು ಕಾದು ನೋಡಬೇಕು.

ರಾಮಾಯಣಕ್ಕೆ ವೆಸ್ಟರ್ನ್ ಟಚ್

ಇನ್ನು ಟೀಸರ್‌ನ ಜನ ಬಹಳ ಕೂಲಂಕುಶವಾಗಿ ನೋಡುತ್ತಿದ್ದಾರೆ. ರಾಮಾಯಣ ಕಾವ್ಯ ಓದಿಕೊಂಡಿರುವವರು ಇದು ಹೇಗೆ ಸಾಧ್ಯ? ಅದು ಯಾಕೆ ಹೀಗೆ? ಅಂತೆಲ್ಲಾ ಕೇಳುತ್ತಿದ್ದಾರೆ. ಐತಿಹಾಸಿಕ, ಪೌರಾಣಿಕ ಪಾತ್ರಗಳನ್ನು ನಾವು ಕಣ್ಣಾರೆ ಕಂಡಿಲ್ಲ, ಹಾಗಾಗಿ ನಮಗೆ ಬೇಕಾದಂತೆ ಕೊಂಚ ಬದಲಿಸಿಕೊಳ್ಳಬಹುದು ಎಂದು ಚಿತ್ರತಂಡ ಅಂದುಕೊಂಡಂತೆ ಇದೆ. ಅದರಲ್ಲೂ ಜಾಂಬವಂತನ ಲುಕ್, ರಾವಣದ ಹೇರ್‌ಸ್ಟೈಲ್ ನೋಡಿ ರಾಮಾಯಣಕ್ಕೆ ವೆಸ್ಟರ್ನ್ ಟಚ್ ಕೊಟ್ಟಂತಿದೆ ಎಂದು ಹೇಳುತ್ತಿದ್ದಾರೆ.

ಗ್ರಾಫಿಕ್ಸ್‌ನಲ್ಲಿ ರಿಯಾಲಿಟಿ ಮಿಸ್!

ಮೋಷನ್ ಕ್ಯಾಪ್ಚರ್ ಟೆಕ್ನಾಲಜಿ ಬಳಸಿ ಚಿತ್ರವನ್ನು ಕಟ್ಟಿಕೊಟ್ಟಿರುವುದು ಗೊತ್ತಾಗುತ್ತಿದೆ. ಜೊತೆಗೆ ಕೊಂಚ ಲೈವ್ ಆಕ್ಷನ್‌ ಕೂಡ ಸೇರಿಸಿ ಸಿನಿಮಾ ಮಾಡಿದ್ದಾರೆ. ವಿಷ್ಯುವಲ್ಸ್, ಗ್ರಾಫಿಕ್ಸ್ ಎಲ್ಲವೂ ಚೆನ್ನಾಗಿದ್ದರೂ ರಿಯಾಲಿಟಿಗೆ ಬಹಳ ದೂರ ಎನ್ನುವಂತಿದೆ. ಪ್ರಭಾಸ್‌ನ ದೇಹ, ಮುಖವನ್ನು ಕೂಡ ಗ್ರಾಫಿಕ್ಸ್ ಬಳಸಿ ತೋರಿಸಿರುವಂತಿದೆ ಎಂದು ಕೆಲವರು ಬೇಸರ ವ್ಯಕ್ತಪಡಿಸುತ್ತಿದ್ದಾರೆ. ಇನ್ನು ಕೆಲ ದೃಶ್ಯಗಳ ಗ್ರಾಫಿಕ್ಸ್‌ನಲ್ಲಿ ಲಾಜಿಕ್ ಮಿಸ್ ಆಗಿದೆ ಎನ್ನುತ್ತಿದ್ದಾರೆ.

ತಮಿಳು ತಂಬಿಗಳಿಂದ ಹೆಚ್ಚು ಟ್ರೋಲ್!

ಇತ್ತೀಚೆಗೆ 'ಪೊನ್ನಿಯಿನ್ ಸೆಲ್ವನ್' ಸಿನಿಮಾ ನೋಡಿ ಪ್ರಭಾಸ್ ಫ್ಯಾನ್ಸ್ ಟ್ರೋಲ್ ಮಾಡಿದ್ದರು. ನಮ್ಮ 'ಬಾಹುಬಲಿ'ಗೆ ಹೋಲಿಸಿದರೆ ನಿಮ್ಮ ಸಿನಿಮಾ ಏನೇನು ಅಲ್ಲ ಎಂದಿದ್ದರು. ಅದಕ್ಕೆ ಪ್ರತಿಕಾರ ಎನ್ನುವಂತೆ ಈಗ 'ಆದಿಪುರುಷ್' ಟೀಸರ್ ನೋಡಿ ತಮಿಳು ತಂಬಿಗಳು ಹೆಚ್ಚು ಟ್ರೋಲ್ ಮಾಡುತ್ತಿದ್ದಾರೆ. ಇದೇನಾ ನಿಮ್ಮ 'ಆದಿಪುರುಷ್' ಆರ್ಭಟ, ಅಬ್ಬರ, ಮತ್ತೊಂದು 'ಕೊಚಡಿಯನ್' ಸಿನಿಮಾ ನೋಡಿದಂತಿದೆ ಎಂದು ವ್ಯಂಗ್ಯ ಮಾಡುತ್ತಿದ್ದಾರೆ. ಸಂಕ್ರಾಂತಿ ಸಂಭ್ರಮದಲ್ಲಿ 'ಆದಿಪುರುಷ್' ಸಿನಿಮಾ ಪ್ಯಾನ್ ಇಂಡಿಯಾ ಲೆವೆಲ್‌ನಲ್ಲಿ 5 ಭಾಷೆಗಳಲ್ಲಿ ತೆರೆಗೆ ಬರ್ತಿದೆ.